Mizoram Ah Ralzam In Aa Dor Mi Hna Nih Mizoram Thimnak Tuah Dingmi Ah I Teltum Lo Dingin CRCH Nih Ralrin Peknak Thawngthanh
=========
Mizoram chungah Myanmar mi ralzam dirhmun in aa dor mi hna nih a ralai mi Mizoram thimnak tuah dingmi chungah i teltum le i thlak ve lo dingin Committee Representing Chin State Hluttaw-CRCH nih May 2 ah thanh ca an rak chuah mi cu May 16 ah a thar in mipi sin ah an langh ter than.
Chin Hluttaw palai hna cu Mizoram ramkhel kong le a ralai mi thimnak kongkau ah kan i thlak lo i hmailei zongah kan i thlak lai lo. Cu bantuk thiam in Mizoram chungah Myanmar mi ralzam in aa dor mi hna zong nih ramkhel kong le thimnak kongah i thlak le i tel tum lo dingin kan in theihter hna.
Mah pin ah Myanmar ralzam mi hna nih kanzam nak ram nih a ngeih mi phung le lam zulh in zeibantuk sualnak hmanh tuah lo ding le rithaisii zuar le tonghtham lo dingin theihternak kan rak in tuah hna” tiah CRCH nih an langhter chih.
Thailand ramchung thimnak cu May 14 (Sunday) ah tuah a si i mipi nih uar ngai mi Move Foward Party (MFP) nih vote 14 million hmuh in Hluttaw thutden hmunhma 150 leng an hmuh tiah kan theih. Move Foward Party (MFP) cu phundang in Opposition Party (dohtu party) tizong ah auh mi an si. An party lutlai a si mi Pita Limjaroenrat zong Thailand ram Prime Minister a si lai zumh a si.
Thailand ram chungah Cozah a ser kho mi hna nih House of Representative (MP) 280 leng hmuh a hau mi a si nain Move Forward Party nih cozah ser kho lo hmanh seh Opposition party a si ve mi Pheu Thai Party nih thutden 140 leng a hmuh ve caah an mah he i bawm in Cozah an ser lai zumh a si.
Atu lio Thailand ram cozah tlai lio mi Thai Royal Army Chief hlun Prime Minister Gen. Prayut Chan-ocha Party pawl tu cu a tutan thimnak ah thutden 36 lawng an hmuh. A tutan teinak a hmuh tu party lutlai Pita Limjaroenrat cu Prime Minister a si ah cun US cozah nih Burma act a lungtlin pi cang mi zong pehzulh le tuanchuah dingin timhtuahnak a ngei.
Tutan ah Opposition Party pawl nih Thailand ram chung ah teinak an hmuh mi cu Thailand ram um Myanmar mipi hna zong nih an lawmh pi hna. “Tutan teinak a hmu mi Party hna nih Myanmar ram thlennak le thatnak dingah duh ningin riantuan kho hna hlah hmanh seh law, Myanmar ram nuhrin covo kong le ramri ah ralzam mi hna thutdir nak kongah tampi a kan bawmh chanh khawh lai” tiah U Aung Thu Ngeing a hmuhning a langh ter.