SAC Ralkap Nih Kahdohnak Fak An Tuah Caah Bomb Khor I Cawh Cio Ding In Mindat Zatlang Uktu Phu Nih Thanh
====================
Chin ramkulh, Mindat peng ah SAC ralkap nih vanlawng le hriamngan hmang in kahdohnak fakchin an tuah caah mipi nih a rannak in bomb khor i cawh cio hrimhrim ding a si lai, tiah Mindat peng zatlang uktu phu nih ralrin peknak an thanh.
“SAC ralkap nih June 28 ah Laukkhe khua ah bomb an thlak, hriamngan in voi nga an kah. Cu ni ṭhiamṭhiam ah cun Yawnatoe khua zong hriamngan in an kah. July 1 zong ah Mindat peng khua pakhat cu vanlawng in bomb an thlakhnawh pin ah hriamngan zong an thlak.
Cuhlan deuh zong ah bomb khor i cawh ding in thawngthanhnak an rak tuah cang nain nawl zulmi an tlawm, atu tan ah cun vanlawng le hriamngan hmang in atu le tu bomb an thlak lengmang caah mizapi nih mah nun himnak ca ah bomb khor i cawh cio hrimhrim ding in ralrin peknak cathanh kan chuah ṭhan hi a si,” tiah Mindat peng zatlang uktu phu in ṭuanvo ngeitu Ko Yaw Man nih a chim.
Atu hrawng ah SAC ralkap nih van lei in siseh hriamngan in siseh kahdohnak a tuahnak ah tualchung mipi nunnak liam mi cu an um lo nain, Biaknak lei inn telh in tualchung mi hna umnak inn zeimawzat an rawk, tiah Ko Yaw Man nih cun a chim.
Mindat mipi nih phung le lam he aa pehtlaimi puai tuah le mibupi in cawlcanghnak tuah tibantuk hrial rih ding in Mindat peng zatlang uktu phu nih April 14 ah khan cathanh an rak chuah.
SAC ralkap nih an thlakmi bomb a puak rih lo mi le bomb ci tibantuk nan hmuh ahcun khuabawi a si lo ah CDF-Mindat sin ah thawngthanh ding a si lai, tiah theihternak an tuah chih.
Tiṭa i Chin ralkap hna sin in lunglawmhnak, US ah a um mi Tlangrua khuami Dawt Ṭha Sung nu le pa nih Tiṭa ah ral a doh cuahmah mi kan Chin ralkap hna caah tiin vok thau sumh 5 an pekchanh hna kongah Chin ralkap hna nih The Chin Post in lunglawmhnak an langhter. Dawt Ṭha Sung nu le pa bantukin midang zong nih nunthap in miphun caah ral a doh mi kan ralkap hna caah thazang chuah dingin kan in sawm hna.
Sagaing ramṭhen, Kalaymyo in Chin ramkulh kalnak motor lampi cu SAC nih July 2 thawk in khualtlawng motor le thil phor motor an kham dih hna i tlunkal an onh ti hna lo, tiah tualchung mi hna sinin theih a si. Chin ramkulh in Kalaymyo lei ah a kalmi cycle le motor tu cu an lanhter hna nain Kalaymyo in Chin ramkulh lei a kalmi tu cu an kham dih hna, tiah Kalay ummi pakhat nih a chim.
“Thil phor motor, khualtlawng motor le cycle in Chin ramkulh lei a kalmi cu an kirter dih hna. Chin ramkulh in Kalaymyo lei a kalmi tu cu an lanhter hna. Eidin thilri pawl hi Kalaymyo in Chin ramkulh chaklei peng khua hna ah phorh le zuar a si. Cu pinah Kalaymyo cu India ramri kalnak khua pakhat a si,” tiah a chim chap. Kalay in Chin ramkulh kalnak motor lampi cu a luancia April 22 ni thawk in May thla hram thawk tiang hrawng SAC nih lam an rak kham cang.