Breaking News: Ralkap Pawl Nih Sandahpiahtu Hna Ralrin An Pekmi Hna Cu Tihnung Tuk A Si Cang

Ralkap Pawl Nih Sandahpiahtu Hna Ralrin An Pekmi Hna Cu Tihnung Tuk A Si Cang
=========================
Ralkap ralchan in sandahpiahtu mino pawl hi an lu ah kahthahnak tuah khawh a si tiah State Administration Council nih MRTV in ralrin peknak an thanh. March 27, 2021 ni ah ram pumpi dihlak in sandahpiah ding timhhlamhnak a si lio ah SAC nih hi bantukin thawngthanh nak an tuah cu a poi taktak. Tuzan suimilam 8:00pm tling hlan deuh ah hin mino pawl nih ralkap ralchan in sandahpiahtu paohpoah cu an lu ah kah thah khawh a si, tiin ralrin peknak an tuah hi a si. Nihin ni tiang ah an lu ah an kahthah mi hna le an thih cuahmah mi hi tahchunhnak ah lak thiam a hau tiah an langhter.

Kawlram chung mino pawl nih zeihmanh theih loin cheukhat forhfialnak thawngin ralkap an ralchan hlei ah Game kah bantuk ah an ruah sual nakhnga lo le an cawlcanghnak hi control a hau deuh caah kan tuahmi a si tiah an tarlangh chih. RFA nih kan hlaithlai ning ahcun February 1, 2021 thok in nihin ni tiang ah Minung 270 an thi cang, tiah kan theih. Cun, a ruak hmuh khawh lomi le a thi le a nun theih khawh lomi minung 300 leng an si. Ralkap le palik nih meithal in an kahthahmi hna 25% percentage hi an lu ah kah in a thimi an tam tiah theih a si.

Relchap, RALBAWI PAWL NIH AN KAN HMUHSAKMI THIL ṬHALO LE MIPI NIH KAN LEHNAK. “Minung cu a hrin in hrin kan si i, ram miṭha cu aser in ser an sive” (Men are borne but good citizens are made) tiin ramkhel (uknak) lei mifim hna nih an chim tawn. Uknak le mipi hna hi dengteo tein kan rak i-pehtlaai i, uktu cozah le an ukmi mipi zong dengteo tein kan rak i-pehtlai rih. Uknak ṭha nih ram miṭha aser lioah, uknak ṭhalo nih ram caah miṭhalo a chuahter ve hna. Cubantuk ṭhiam² in, Uktu/Cozah ṭha nih ram miṭha aser lioah, Uktu/Cozah ṭhalo nih ram caah miṭhalo a chuahter ve hna. Nan theihcio btk.in, Kawlram cu ralkap uknak hlangin kum 50 deng uk asicang. Police, ralkap le cozah rian a phun² aṭuanmi kan siah siseh, chawletmi le lothlomi kan siah siseh, mipi kan dihlak ralbawi pawl le an kuttang minung hna nih an rak kan hmuhsakmi hi aṭha lei chimding nakin achia lei chimding a tamdeuh. Cucu, kan dih-lak hmuhning asi lai ti ka zumh. Rammi zapi kan i ralrin khawhnak caah thil ṭhalo an kan hmuhsakmi cungah alehnak mipi nih kan tuahding hi a tangleiah ka tuaktaan khawh ningin ka rak langhter lai.

1. A ṭhawng deuhmi le nawlngei deuhmi sikhawhnak caah minung fimthiamnak, lungthin le thluak hmang duhloin, hriam -naam thazaang hmangin a hramhramlo cawlcanghnak an kan hmuhsak. “Nawlngeihnak cu meithal kua in ara” tihi nihin ni le caan tiang an i tlaihmi cu asi rih. Kan nih mipi nih cun mahhi lam zulloin, kan i peeknak, kan fimthiamnak le kan ti khawhmi/ṭuan khawhmi he aa tlaakmi rian kha ram caah mizapi duhning tein kan ṭuan lai tihi asi. Ai dang ngai².

2. Ralbawi pawl nih an hman cuahmahmi le pehzulh peng an i timhmi thil ṭhalo adang cu; Cozah rianṭuan bu tampi lakah bukhat asi vemi, ralkap pawl politics (uknak) chungah luhve/ i-telve hi asi. Cozah rianṭuan bu lakah atambik an sinak kha an i uan-thlaarpi caah an rian asilomi ramkhel chungah hram hramloin umhmun laak an i timh pengnak asi. Democracy uknak sining he aa ralkah caah, mahhi phung athlulomi kalpi ning (practice) hi mipi nih zeitik hmanhah kan pom lailo i, kan doh zungzal ko lai. Hibantuk ramkhel kalphung (political culture) ṭhalo kha Myanmar ramah hram athlaak khawhlo nak lai, mipi nih nihinah siseh, thaizing zongah siseh, ralring tein kan veen zungzal ko lai.

3. Thil diklo kan thisen ah ronh an kan timhmi adang pakhat cu; ram i aṭhawnnak cu, “Mipi ṭhawnnakah siloin, ralkap ṭhawnnak ah asi” tihi asi. Hihi cu, Logical Sequence (thil aa chang tete i kalning) he zong ai remlo. Kawlram mipi hna nih zeitik hmanhah an pom khawhlomi thil asi pinah, mipi nehsawh le zeirello bia asi. Vawlei dongh tiang mahhi an kan hunhmi cawnpiaknak le pomning hi rammi hna nih kan ei-kho lailo i, kan dohpeng rih lai. Mipi nih kan pomning cu, ram pakhat i aṭhawnnak cu; a ramchung mipi kha ansi i, mipi chungah ram adawtu mifim, mithiam zeizat dah a ngeih i, ram caah rianṭuan khomi minung zeizat dah an um tihi asiko.

4. Cun, kan duhlo ngaiding ralbawi pawl nih an zulhmi lam cu; ram le rammi zapi ca ṭhatnak nakin ralbawi pawl le an mah minung mitlawmte ṭhatnak calawng ruatin timhlamhnak an ngeihmi hi asi. Anmah minung kha zei rianṭuannak pohah a hleiluat in hmaiah an i chuahter i, zapi-zaraan nih an ṭilṭawt kan i cuh tawn. Aluancia kum 20/30 in nihin tiang zoh law, cozah department tampi ah anmah minung an ṭhuṭhup ko rih. Tangka kawlnak caah an dirhmi, Kawlram chung Company ngandeuh pawl cu ralkap ta asiloah, ralkap he ai pehtlaaimi lawngte ansi. Vawlei, hmun-ram vialte mipi sin in ahramhram loin chuh anrak si rih. Kan nih mipi nih kan kalpi ning cu, zei rian pohah ahleice in duhpiaknak aho cung hmanhah ngeiloin, an thiamning aa chang² in (merit basis) le ziknawh eihmuarnak umlo tein rian i peek hi asi. Rammi hna nih Service ṭha an hmuh khawhnak kha pumpaak i theih hngalhnak le chawva ah thlending asi hrim² lo tikha asi.

5. Nan theihcio btk.in, atu kan vawlei cu “Civilised World” asi cang. Pakhat le pakhat lungthin lei i bomhnak, thlacam piaknak lawng siloin, pumsa le ngeihchiah in heh tiah kan i bawm hna i, kan i dirkamh hna. Hihi, atu kan vawleipi i a lungput le a dirhmun asi lioah, Kawl ralbawi pawl nih an ralkap cungah “tuah u” tiah order an peekmi hna zoh tikah ngaih achia ngai². Atu vawlei sining he aa thlautuk caah zumh awk hmanh ahar ngai. Thisen achuahmi le aliammi nunnak nih el-khawhloin bia achim fawn. Ram veennak caah sermi hriamnaam in ralkap cozah nih amah mipi thisen achuah hna i, an nunnak tampi alaak cang hna. Fapawi le hngakchia, kum tlinglo tiang-in. Hihi, thil ṭhalo bik, ṭihnung bik thil ralbawi pawl nih an zulh liomi lam asi. Mahhi lam hi, mipi nih a tu-ah siseh, hmailei zongah siseh, achuahṭhan tilonak lai le hibantuk ralbawi pawl hi an corhṭhan tilonak dingah a hrampi in bongh hrim² ahau tihi mikip i kan biahrennak sikho cio sehlaw aṭhatuk hnga. Ralkap bu thar (new military institution) dirhkhawh zong mipi ṭanrualnak in i timlaam hna usih.

6. Biaknak a phun² nih an sunhsak i, cawisaan an i timh cio mi; dawtnak, dinfelnak, diknak, tawidornak, midang cungah ṭihphaannak le nganfah tlunter duhlonak, minung nunnak ṭihzahnak tbk. hna hi Kawlram ralbawi pawl nih biapiah an chia lemlo. I nunpi ding zongah an ruat lem rualo. Nawlngeihnak an kutah chiah i, ram rumnak kha ralbawi mitlawmte hna nih an duhning pohin hman i, eihmuar kha achun-azan i an tuaktaan cemmi cu asi. An lam a dawnkhaantu mizeipoh hriamnaam hmangin thisen chuah i, an nunnak laak kha an i harh lemlo. Minung sawh² cu chimlo, an pathian asimi phungki pawl hmanh an zuah hnalo. Kawl ralkap nih Ne Win chan lioin nihin tiang an phungki pawl thawngthlak le thah-nawnnak hi voi 2/3 an tuah cang. Sehtan fa ciammaan! Cupinah, ralbawi pawl nih rammi hna an kan tuahpiakmi fim-cawnnak nih colony chanlio fimcawnnak hmanh atluklo. Arak tem-ingtu ka si ruangah kai fiang ngai. Ralbawi pawl a zuam cawh khotu mifim tampi an chuak sual lai ti an ṭih caah sidawh asi. Culawng asilo, rammi hna nih a ngandammi pumsa le lungthin-ruahnak kan ngeih hi an duh lemlo. Apum tlingmi ngandamnak nihin ni tiang kan ngeikho rihlo. Pumsa maw, lungthin ruahnak ngandamnak dek, pakhat poh hi hrawhpiak peng kan siko rih. Mahhi hi, Kawl ralbawi hna nih mipi cungah caan saupi anrak tuah cangmi asi i, tuahpeng hi an zulhmi lam cu asi rih. Rammi dihlak kan lungfim cang selaw, ralbawi mitlawmte le an minung pawl an lam phih i, cawl kholo tiang i tuah i timcang hna usih. CDM hi abiapi tak² mi lam pakhat asi tihi hngal hna usih. Ram le mipi chanh khawhnak caah a herhning pohin cawlcang kho dingin mar-zaang tein i timlaamko hna usih.

7. Adonghnak ah phunghrampi he pehpar in asi lai. Ralbawi Ne Win le Than Swe nih 1974 le 2008 ah an tuahmi Kawlram phunghrampi hna hi mipi nih kan duh naloin, hriamnaam he tlaihhreem buin an kan barh chommi phunghrampi ansi. Ne Win le a minung pawl nih an ṭialmi 1974 Burma phunghrampi nih zeitluk indah ram arak hrawh tihi tlangkhat telawng in ka chim lai. “Asangbik dirhmun in akan ṭumpi i, aniambik, ataw-neah akan chiatu phunghrampi asi” tiin kei cu ka chim tawn. Than Swe le aminung pawl nih an ṭialmi 2008 Myanmar phunghrampi nunter asinak kum 10 renglo asicang. Ram a cheutu le ramkhat chungah cozah pahnih asertu phunghram-pi tizong tikhawh asi. Ramdang he i-pehtlaihnak kongah dotlalo ramah acan tertu le i-hlitphuak kholo tiangin Myanmar ram aṭemṭawntu ngawr zawtnak btk. phunghrampi asi ka tifawn rih. 2008 phunghrampi thlen/hrawh khawhnak dingah Myanmar ram nih buaibainak faaklak a ton telai tihi ralbawi pawl hoi-her zohin, aluancia kum 5/6 lio khan alang cang. Adikmi/Ahmaanmi Democracy ai hngahhlangmi hna caah, thawngṭha tuk asimicu, nan theih ciomi asi, kan hnu zarhah CRPH nih 2008 Myanmar phunghrampi hrawh asi cang tiin vawleipi theihin a thanh cang.

Min Aung Hlaing le a minung pawl nih an mitmu btk.in an veenmi 2008 phunghram -pi cu anmah ralkap pawl AANA TING ruangah hrawh khawh-nak lam ai hung tikhawh asi. AANA TING nak nih mipi cungah ṭihphaannak le harnak a phun² a tlunter i, nunnak tampi an paam cang. Ngaihchia tuk asi pinah ram caah a ngan ngai² mi sungh le zatlaak asi rih. Vanchiat lioah vanṭhat khawhzong arak sive i, sungh lioah miak khawh zong arak si rih. Cucu, Myanmar ram le mipi hna hawi tluklo tiang i dir-hmun niam ah akan chiatu 2008 phunghrampi hrawh asinak hi asi. Vanṭhat asikhunnak cu, adikmi (genuine) Democracy calawng siloin, pumtling asimi (whole) Federal phunghrampi in thlen asicang lai caah asi. Myanmar mipi caah hinak thawngṭha hi a um lailo i, tlangmi kan ca lebang ahcun kum 70 renglo ṭah le hacang rialnak hmun in kan chuah cang lai i, duh anungmi hmailei nih akan don tihi philh hna hlah usih. Nihinah harnak a phun² le thih le lohnak tong rih hmanh usih law, hmailei panh in kan karhlaan akan der tertu siter hlah usih. Kan lungdong hrim² hlah seh. Kan rian kan liim deng cang. Kan i tinhmi Goal tung kan luut dengcang. Khuadei lai ah a muikhun tihi thei peng hna usih. “BEULAH RAM” chung ah kan luut dengcang. (Careeltu vialte Bawipa nih in veengko hna seh!) Credit: Siang Kung Tz.