Breaking News; Ralhrawng Motor 20 Leng An Hrawkpiak Hna!

Breaking News; Ralhrawng Motor 20 Leng An Hrawkpiak Hna!
===========
KNU Brigate (5) Hmunhma Chungah Kahdohnak Tuahtu SAC Ralhrang Ralkap Motor (20) Leng An Rawk Dih! KNU Brigate (5) hmunhma Pha Pun pengkomh chungah Brigate (3) hmunhma chungin Brigate (5) hmunhma ah a luttu SAC ralhrang ralkap hriamnam le eidin phortu motor le lampi sialtu motor (20) lengkai cu KNLA le KNDO phu nih an rak kah hrawh dih tiah thawng theih a si.

Atu i hmanthlak a cuangmi cu KNLA le KNDO phu nih lampi in an rak kahdoh ruangah nikhat chungah motor (6) bak an rawk dih tiah an langhter i, an kahnak hmunhma kong he pehtlai in Yangon Khik Thit nih a fehter kho lo.

Kahdohnak kong he pehtlai in fiang tein theihfian a si lo tiah KNU Brigate (5) i Padu Man Man nih Yangon Khik Thit ah a chim. SAC ralhrang ralkap motor kahdohnak le hrawhnak kong he pehtlai in KNU nih thawngthanhnak a tuah rih lo.

SAC Ralhrang Nih Mei An Khanghmi Inn Lo Hna Cu Yisagyo PDF Nih An Thenh Piak! Yisagyo peng chung mipi vengtu hna nih SAC ralhrang ralkap nih hramhram in mei an khanghpiakmi inn thenhnak ah kan bawmh hna tiah Yisagyo PDF nih nihin ah cathanh an chuah.

Mei an khanghnak hmunhma le inn zeizat a si timi an langhter lo nain mipi vengtu PDF hna i riantuannak hmanthlak pawl cu an langhter. A liamcia Febuary 26 ah khan Yisagyo pengah mipi vengtu phu le SAC ralhrang ralkap karlak ah kahdohnak a chuak.

Cu lio ahcun SAC ralhrang ralkap nih mei an khanghmi Maggui ramthen Yisagyo peng Yi Lay Kyun, Syin Te khua chung inn cheukhat cu mei nih a kaang. Cu kahdohnak ah kaphnih kahdohnak cu sml 5:00 chung a rau i, SAC ralhrang ralkap leikap ah a thimi an um tiah an chim.

Nizan Ah CNA Ralkap Pakhat Nunnak Liam Than! Chin ramkulh Falam peng Dokthek khua ah zaan a riakmi SAC ralhrang ralkap hna cu March 3 zinglei sml 3:00 hrawngah CNA nih an kah hna. CNA ralkap hna cu hnulei ah an i zukphiak lioah electric hri a lamhsual tu Salai Thiang Bik Lian kum 19 cu a nunnak a liam tiah theih a si.

Nizan zongah CNA ralkap pahnih nunnak a liam cang i, an tlaihmi meithal zong SAC ralhrang ralkap nih an laak tiah theih a si. Dokthek khua ah tuzing tiang meithal puah thawng le hriamngan puah thawng lawngte a thang tiah khuami nih an chim tiah Zalen nih a tial.

Dokthek Khua Cu SAC Ralhrang Nih Mei An Khangh! Sagaing ramthen Chin ramkulh Falam peng Falam-Hakha karlak motor lampi cungah a ummi Dokthek khua cu nawlngeihnak latu SAC ralhrang ralkap nih March (2) zanlei sml 5:00 hrawngah mei an khangh tiah theih a si.

Zinglei thawkin mipi vengtu ralkap le nawlngeihnak latu SAC ralhrang ralkap cu Dokthek khua le Tlangzar khua karlak ah faktukin an i kap. Dokthek khua chungum Baptist biakinn cihmi caan phyu zong hriamngan nih a tlak, minung umnak inn zeizat tluk a kaang timi theihfian a si rih lo.

India-Kawlram Ramri Ah A Puak Khomi Thilri Le Kuanfang Tam Taktak An Tlaih! India ramchung Mizoram ramkulh Siaha pengkomh ah Aatan Rifles ralkap le palek hna nih Kawlram leiah an kalpimi a puak khomi thilri le kuanfang tampi cu an tlaih tiah Febuary 28 ah anmah lei thawngzamhnak nih a langhter.

Kawlram ramri leikap ah a kalmi motor pakhat cu Ainak khua pawngah thawngpang an theih ningin Aatan Rifles ralkap le Mizoram palek hna nih zohfelnak an tuah tikah motor monghtu pahnih le hriamnam tampi an tlaih hi a si. An tlaihmi a puak khomi thilri hna cu BELOX-10 a puak khomi thilri (124.2 gram), Granular a puak khomi thilri (121.5 gram), Gun Powder Exclusive (49.9 kg), a puak khomi thilri (3950 Nos), Lellier – Belliot 30-06 kuanfang (100 Nos), Mini Mag.

22 Bullet (100 Nos), Codex (12000 Mtr), Tac Shotgun Amn Belts (106) hna an si. Siaha pengkomh ah hriamnam thilri phortu motor pakhat cu Febuary thla thar ah khan Aatan Rifles ralkap nih an tlaih bal cang. Credit: The Federal Times