KIA Nih Momauk Peng Dasai SAC Ralkap Sakhan An Laak. Bhamo pengkomh, Momauk peng Nawnglaik khua pawng ah a um mi Dasai Khah-Mahṭ-Yah 437 SAC ralkap sakhan cu KIA ṭangṭi phu nih nihin March 14, zinglei ah an laak i SAC ralkap nih dongcat lo in vanlawng in bomb an thlak, tiah theih a si.
Dasai SAC ralkap sakhan cu a luancia March 7 ni thawk in KIA ṭangṭi phu nih an rak kah i zarh khat tluk an kah hnu ah a ningpi in an laak khawh, tiah KIA thawng laaknak hrampi nih an chim. “Dasai sakhan cu nihin zinglei suimilam 7:00 hrawng ah an laak nain SAC ralkap nih.
vanlawng le hriamngan in kahdohnak an tuah, voi khat rat ah vanlawng pathum hna ra in bomb an thlak bu ah sakhan cu KIA nih an laak khawh ṭhiam,” tiah KIA thawng laaknak hrampi nih cun an chim.
KIA ṭangṭi phu nih sakhan chung thianhfelnak an tuah ko nain SAC ralkap nih vanlawng le hriamngan he dongcat lo in kahdohnak an tuah ruang ah SAC ralkap thi zat le hriamnam laak zat belte hngalh a si rih lo.
A luancia March 7 ni thawk in KIA nih Laiza kiangkap SAC ralkap sakhan pawl cu an kah i zarh khat chung kahdohnak ah sakhan a fa he a ngan he, a zate 20 hrawng an laak cang kong KIO in chimnak nawlngei Colonel Nawbu nih a chim. The Chin Post