Breaking News: Ralhrang Nih Mithar An Kawl Than Cang Hna

Rallokap mithar khawmhsuat khawh an si lo caah, rallokap riantuan hlun simi hna cu rian luh than ding in an khawmhsuat!
=======
Nawlngeihnak la tu ralhrang phu hna nih rallokap mithar khawmhsuat dingah harnak a um caah, rallokap rian a tuan bal mi, mihlun chungin riantuan kho than tu ding hna cu checkhlat in ramkulh le ramthen cio in rianlut than kho tu ding hna cu a thli in sawm an si than tiah, rallokap hlun chungtel hna sin in theih a si.

A hlei in kutkiak, kee kiah ruang ah a din mi hna tel lo in le mithah lainawn ruangah rianchuah a tongmi hna telh lo in, zeidang ruangah rian a din mi le a ngol mi, riantuan tu hlun hna cu hmunkip cio ah checkhlat ding in ramkulh ralhrang bawi nih nawl pek a si tiah Mon ramkulh rallokap riantuan hlun pakhat nih a chim.

“Kanmah sinah rallokap riantuan hlun phu hna chung in riantlai than kho ding cazin an lak, a hlei in ralhrang phu nih a herh tiah a auh tik caan poah ah riantuan kho tu ding 13(d) in a chuak mi hna, kum zeizah an si le tlamtling in checknak an tuah, cun a dang zong in kum upa zongah ngandam mi a si ahcun khuachung security tibantuk ah hngahter ding in ” tiah Ayarwady times ah a chim.

Atu lio ah ralhrang phu hna nih ramkulh le ramthen hmunkip ah rallokap riantuan hlun simi hna sinah biaruahnak le bawmhchanhnak pehtlai in an tuah. Cun pyusawthi phu chungin ralhrang riantuan hlun zong an um, hmunkip cio in pyusawthi phu chungtel in ralhrang rianngol cang mi, mihlun minung 20 cu hriam pek an si cang tiah pyusawthi phu in minung pakhat nih a luancia ah thawngthanhnak an tuah. Asinain nawlngeihnak la tu ralhrang phu hna nih pyusawthi phu dirhnak a um lo, cun hriam pek zong an si lo tiah a chim than.

Demawhsu kahdohnak chungah PDF in minung pakhat a nunnak a liam,hliamtuar le a tlau mi an um. Kaya ramkulh, Demawhsu in Meng 6 hlatnak khua ah nizaan September 20 chunhnu suimilam 12:00 hrawngah kaphnih kar kahdohnak a chuak, cu kahdohnak chung ahcun KPDF lei in minung pakhat a nunnak a liam, a tlau mi le hliamtuar zong an um tiah theih a si.

“Kahdohnak cu suimilam 12:00 in an thok i, chunhnu suimilam 2:00 ah an dih.Ralhrang phu lei in kahnak an thok hmasa, minung thazaang le hriam thazaang a dan tuk caah, kanmah phu lei cu hnu ah kan tolh. PDF in minung pakhat a nunnak a liam, minung pali nih hliam an tuar, minung pahnih cu pehtlaih khawhlo in an tlau, kahdohnak a chuah lo nak khua tiang hriamngan in an duhnak hmun an kah” tiah a chim chungtel pakhat nih a chim.

Ralhrang phu chungtel hna cu minung thazaang 200 leng an si, kahdohnak chungah ralhrang phu lei in hliamtuar le a thi mi zat cu kan theih rih lo tiah a chimchap. Kaya ramkulh chungah ralhrang nih nawlngeihnak an lak hnu ah nunnak liammi minung 93 an si, tlaihkhih a tong mi hi minung 138 an si tiah PKPF nih September 18 ah a langhter. Credit: The Chin Post