Breaking News; Ralhrang nih Chin World Media Page An Hrawh Piak Hlei Ah CEO Salai Mang an tlaih Rih!

Breaking News; Ralhrang nih Chin World Media Page An Hrawh Piak Hlei Ah CEO Salai Mang an tlaih Rih!
==================
Kan Chinland ah Thawngthanh tu a ngan bik a si mi Chin World Media Page a si i Chinland chung thawngpang hna cu a caan he a ruan tein a langhtertu le a chimtu Chin World Media in CEO a si mi Salai Mang cu September 22, 2021 zan suimilam 11:00 ah ralhrang nih an tlaih.

Chin World Media page cu hrawh piak a si cang tiah NLD Acozah chan i Chin ramkulh Acozah phu in sipin lei in Minister a simi Vuanci hlun Salai Issac Khin nih a mah social media in theihternak a tuah. Atu lio dirhmun in Chin World Media i Online cahmai cu kan kawl zong hmu khoh a si ti lo.

Chin World Media cu Chinram chung ah kahdohnak dirhmun le ralzam hna kong felfai tein a langhtertu ramchung Media pakhat a si. Ralhrang nih nawlngeihnak a lak hnu ah thawnglatu tampi a tlaih hna i thong a thlak hna i atu September thla chung tuan deuh ah Yangon hrambunh a si mi thanglatu pa 3 zong a rak tlaih hna.

Hakha Khuachung Kahdohnak Kongah Mipi Sin Theihternak! 2021 February 1 in ralhrang ralkap nih hriamnam bochan in kan ram ah mipi sin in uknak nawl chuh an kan timh caah dinnak a tanhmi hna nih nihin tiang dohthlennak tuah cuahmah a si. Minung tampi nih ralhrang kut in tukthah, tlaih, hrem le harnak tampi an tong.

Cu bantuk ralhrang hna nih kan ram, kan khua le kan inn chungah sualnak an tuah cuahmah ko cu kan duh hrimhrim lo. Cucaah kan tei hlan tiang a lamkip in kan doh lai.

2021 September 7 zan thok in ngol loin ralhrang nih Hakha khua chungah meithal le bomb an puah i mipi chungin hliamhma an pumi minung tampi an um pinah inn a rawkmi le a kangmi tiang in a hung um. Cu bantuk in mipi umnak khua chungah duh paoh in meithal le bomb puah cu a phung zong a si lo i kan duh hrimhrim lo. Cu bantuk thil tha lo an tuahnak a ruangcu;

1. Mipi zawn a ruat lomi ralhrang misual an si caah a si ko. 2. Mipi nih kan tih hna sehlaw, a kan dohtu pawl zong kham hna seh, thlauh hna sehlaw mipi lakah thinlung theucheunak chuak seh, ti an duh.

3. Dinnak tanh in dohthlennak a tuahmi paoh khua chungah um ngam hna hlah sehlaw, duh paoh in tuah khawhmi lawng taang hna seh, ti an duh. 4. Cuti cun khua chungah an hram fekter i ralhrang uknak thawnter an i timh.

Ralhrang nihcun mipi cu an ral kham ah an hman zungzal. Mipi lakah an um. Mipi lakah an i duup. Mipi thi an dawp. Asinain, mipi lakah meithal le bomb duh paoh in an puah i sualnak a phunphun an tuah. Lih le Hrokhrawl in mithmai an kawl. Nihin Hakha zongah, hrokhrawl in mipi sinah an chimmi cu;

1. Khua chungah an kan kap paoh ahcun mipi nan tuar ko lai. Cucaah khua chungah kan kap hna hlah seh. 2. Cun khuapi le sakhan lak tiang an i timh rih tung lo ahcun ralfir cun khua chungah kah rih lo ah a tha. Cu locun mipi lam nan tem, tiah an ti.

Cu bantuk bia hna cu mipi hlennak an si. Ral cu an umnak ah kah an hau. Cun khuapi le sakhan lak timi cu lam khat lawng a um lo. Hriamnam in a thawng deuhmi ral teinak zong lam khat lawng a um lo. Cucaah lam a phunphun in kan doh hna.

CDF cu mipi covo, nunnak le ngeihchiah a kilvengtu a si bantuk in mipi caah tih a nungmi kahdohnak cu hrial khawh chung kan hrial. Hmailei zongah hrial khawh kan i zuam lai. Hakha khua chungah kahdohnak zong hrial khawh chung kan hrial ko lai. Mipi caah tihnung in cawlcangh ding a herh ahcun theihter le ralrin peknak zong a um te ko lai.

Asinain, caan karlak ah ralhrang lei in a rami kuan, bomb le sual thatlonak kong ahcun tuanvo kan la kho lo. Cucaah mipi ralring tein um uh. Ralhrang le an lei tang pawl zong i ralring u. Mipi caah hnahnawhnak le harnak tuah hlah u.