Breaking News: Ralhrang khuabawi hna nupa meithal in an kah hna caah a nupi a thi!

Yangon Ramṭhen, Shwepyita Peng Ah Khuabawi Hna Nupa Meithal In An Kah Hna Caah Anupi A Thi
=======
Yangon ramthen, Shwepyita peng Pyidawta sang khuabawi hna nupa cu meithal kah an ton caah a nupi a thi tiah tualchung hriamtlai pah-kah-phah nih an chim.

October 24, chunhnu suimilam 3:45 ah Pyidawta sang khuabawi zung ah khuabawi Myo Min Tan le a nupi Mala Maw le zung riantuantu pakhat tiin minung pathum an um lio ah chaklei pengkomh tualchung hriamtlai phu le Yangon Urban Guerrilla Army(YUGA MO 7 Egale) phufonh nih an kah hna i Daw Mala Maw cu hmakhat te ah a thi tiah theih a si.

Cu khuabawi zung nih cun zung ah theihpinak ca a la mi hna le khualtlung cazin min petu hna cu bo ngai in an chawnhbiak hna leng ah phaisa kholhnak zong an tuah tiah tualchung mi pakhat nih a chim.

Moemauk Peng Ah SAC Ralkap Jet Fighter Nih Bomb Thlak Aa Palh Caah Anmah Ralkap Lila A Thimi Le Aa Hliammi An Tam. Kachin ramkulh, Moemauk peng ah KIA, PDF le SAC ralkap kar kahdohnak a chuak i, SAC ralkap nih Jet Fighter in bomb an thlak caah anmah ralkap lila an umnak ah bomb a tla i, ralkap tam tuk hliamhma an pu, tiah theih a si.

Nizan October 23 ah Moemauk peng Wawan tlang nichuah lei ah SAC ralkap le KIA, PDF kar kahdohnak a zual ngai caah SAC ralkap nih Jet Fighter in bomb an thlak i, anmah lei ralkap lila pawng ah a tlak caah SAC ralkap tam tuk hliamhma an pu, tiah tualchung mi hna nih an chim.

“SAC Jet Fighter in bomb an thlak caah an mah lei ralkap lila tam tuk hliamhma an pu. Motor 4 in hliamhma pumi ralkap cu Moemauk sii-inn lei ah an kalpi hna. SAC ralkap nih timh ciammam tein Moemauk khua chungah bomb an thlak i, dum cheukhat a rawh pinah vok pakhat a thi,” tiah Kachin ram um SAC ralkap he naihniam in a ummi sinin theih a si.

Kachin ramkulh ah SAC ralkap le KIA, PDF kar kahdohnak a zual tuk caah SAC ralkap a thimi le aa hliammi an tam, tiah theih a si.

Pakokku, Kawkareik Pengkomh Palik Sakhan Le Khah Lah Yah 97 Cu PDF Nih An Kah Hna Caah SAC Ralkap 5 An Thi. Magway ramṭhen, Pakokku peng check gate ah khualtlawng mi a checktu SAC ralkap pawl cu, bomb puahhnawh an ton caah ralkap 2 an thi, tiah theih a si. Nizan October 23 zing sml 10:30 ah Pakokku khuahelnak lam le khuathar lam tonnak ah checkhlatnak a tuahtu SAC ralkap pawl cu, PDF nih bomb lung 2 in an puahhnawh hna caah SAC ralkap 2 an thi, tiah theih a si.

Nizan October 23 zanlei sml 4:55 ah Karen ramkulh, Kawkareik pengkomh palik sakhan le Khah Lah Yah 97 SAC ralkap pawl cu drone in bomb kan thlakhnawh hna caah SAC ralkap 3 an thi, tiah Lion Battalion Commando Special Force nih cathanh an chuah tiah theih a si.

Mahlaing Khua Ah Umhmun Khuarmi SAC Ralkap Cu Drone In Bomb Thlakhnawh An Ton Caah Pahnih An Thi. Mandalay ramṭhen, Mahlaing peng Tayet Kaungpin(သရက်ကောင်းပင်) khua ah umhmun a khuarmi SAC ralkap pawl cu, drone in bomb kan thlakhnawh hna caah ralkap 2 an thi, tiah Myingyan No. 4 Battalion Natogyi People Defence Force(NPDF) ṭuanvo ngeitu nih a chim.

October 21 zanlei sml 4:00 hrawngah Mahlaing peng Tayet Kaungpin khua ah umhmun a khuarmi SAC ralkap cu, NPDF nih drone in bomb kan thlakhnawh hna caah SAC ralkap 2 cu a hmun ah an thi colh. Ralkap a thi chapmi le aa hliammi an um rih ko nain, fiang in kan thei kho rih lo, tiah Natogyi PDF in ṭuanvo ngeitu nih cun a chim tiah theih a si.

“Cheukhat ralkap cu an phei zong tan a haumi an um. SAC ralkap nih Tayet Kaungpin khua pawng ummi khuate cu khual cazin an check hna. Mithar nan hmuh hna ahcun nan kan chimh lai an ti hna pinah CDM a tuahtu le NLD party chungtel hna zong tangka an hal hna,” tiah a chim chap.

Loikaw Peng Konethar Ralhrial Camp Cu SAC Ralkap Nih Hriamngan In An Kah Caah Ralhrial Pakhat A Nunnak A Liam. Loikaw peng Konethar ralhrial camp cu, SAC ralkap nih hriamngan in an kah caah ralhrial pakhat a nunnak a liam i, hliamhma pumi an tam, tiah ralhrial zohkhenhtu hna nih nihin October 24 ah cathanh an chuah tiah theih a si.

Nizan October 23 zing sml 9:00 hrawngah Mobae hrambunh SAC ralkap 422 Battalion nih, ralhrial camp cu timh ciammam tein an kah caah kum 35 tluk pa pakhat a nunnak a liam i, a nupi zong hliamhma fak ngai a pu. “Kan va phak ahcun pa cu a nunnak a rak liam cang nain a nupi cu a lu ah hliamhma he a rak ril ko. Kum 8 tluk ngakchia pakhat zong a phei ah hliamhma a pu,” tiah mi ralhrial zohkhenhtu in ṭuanvo ngeitu nih a chim.

October thla chung Karenni ramkulh ah SAC ralkap nih hriamngan kah nakin tualchung mi 1 a thih pinah 5 hliamhma an pu cang. SAC ralkap nih nawlngeihnak an lak hnu in Karenni ramkulh chung, ralhrial nak ah a nunnak a liammi tualchung mi 65 an phan cang, tiah PKPDF nih October thla thawk ah cathanh an rak chuah.

SAC Ralkap Nih Myaung Peng Tualchung Mi 5 An Thah Hna Pinah Inn An Khangh Caah Inn 19 A Ciam. Sagaing ramṭhen, Myaung peng Shwepaukpin(ရွှေပေါက်ပင်) khua ah October 22 zinglei ah SAC ralkap nih khuami 5 an thah hna pinah inn zong an khangh, tiah theih a si.

Myinmu peng Shwekugyi khua ah umhmun a khuarmi SAC ralkap pawl cu zing sml 5:00 hrawng in hmunhma thianhhlimhnak kan tuah an ti i, khuami inn le lo an khangh caah inn 19 a ciam, cu chungah tlakrawh inn 2 aa tel, tiah Pah Kah Phah chungtel pakhat nih a chim.

“SAC ralkap khua chung an luh hlan in khuami cu an zam dih cang. Shwepaukpin khuami 6 zong varal lei tlik ding in an i timh lioah SAC ralkap nih 60mm in an kah hna caah pa pakhat lawng a nung in kan hmuh. A dang 5 cu kan hmu kho hna lo,” tiah Myaung PDF ralkap pakhat nih a chim.

Shwepaukpin khua cu SAC ralkap nih an luhhnawhnak voihnih a si cang. Atu a voihnihnak lawngah khuami inn le lo an khangh hi a si, tiah tualchung mi hna nih an chim. Credit: The Chin Post