Sittwe Khuapi Ah AA Nih ALP Party An Kah Hna; Vice President Telh In 3 An Thi__ALP
=========
Rakhine ramkulh, Sittwe khuapi tlanglawng lam pawng ah SAC ralhrang he ton biaruahnak a ngeimi Arakan Liberation Party (ALP) Vice President, Battalion Commander le ralkap 1 (An zapi 3) hna cu June 1 ah kahthah an tong, tiah ALP nih June 2 ah fehternak an tuah.
Kahthah a tongmi hna cu Arakan Liberation Party, Vice President Hkine Ne Yaung, No.1001 Battalion Commander Hkine Kyaw Myin le ralkap Kyaw Kyaw Nine hna an si, tiah an langhter. Mah hna 3 hi Rakhine ram ṭhanchonak le thlichia ruang ah harnak tongmi tualchungmi hna bawmchan dingin tonpumhnak an ngei i,
an tlun lei ah atu bantuk in Arakan Army (AA) nih an kah hna hi a si, tiah AA hriamtlai an puh hnanak cu cathanh an chuahmi ah an langhter. Arakan Army (AA) nih hikong he pehtlai in lehnak zeihmanh an tuah lo, tiah Tachileik News Agency nih a ṭial ve.
A luancia ni tlawmpal ah Arakan Liberation Party (ALP) cu SAC ralhrang kuttang ramri hngaktu Border Guard Forces (BGF) hriamtlai ah an min an thlen caah atu bantuk in kahdoh an ton hi a si, tiah tualchungmi hna nih an chim. ALP party hi June 26 le 27 lio ah SAC ralhrang he Naypyidaw khuapi ah tonpumhnak an ngei, tiah theih a si.
Chin ramkulh, Tedim peng, Taingen khua cu mipi nih a rianrannak in chuatak ding le a himnak hmun ah ralhrial ding in CDF CDM SIYIN nih June 30 ah cathanh an chuah. SIYIN hmunram Taingen khua um, SAC ralhrang sakhan ah umhmun a khuarmi ralhrang pawl nih sualnak ngeilo mipi hna cu tlaih in an chek hna i, PDF nan si ti ah an puh hna.
SAC ralhrang nih hriamnam he mipi hna cung ah PDF na si tiin sualphawt in ṭhatlonak an tuahmi cu nikhat hnu nikhat a karh chin leng mang caah tualchung mipi vengtu CDF CDM SIYIN nih kan zoh sawhsawh ti hna lai lo, tiah cathanh an chuahmi ah an langhter. Taingen khua um SAC ralhrang sakhan ah umhmun khuarmi ralhrang pawl nih khual a tlawngmi khuami hna cu mipi ralkap nan si ti ah puh in an tlaihkhihmi hna an um, tiah theih a si.
June 30, zan ah Mithla vehvai in a kal mi (Ghost hunter) pa nih a hmuh mi ruak cu July 1, zanlei suimilam 1:00 tluk ah an puh mi hna Palik nih an tlaih hna. Media cheukhat nih an langhter ning cun, mi thattu ah puh in palik nih an tlaih mi hna hi Lalroliana le Lalsiampuii ansi i zaam an i timh lio ah an tlaih hna tiah an chim.
An tlaihnak hna hmun hi Aizawl khua leng ah si in Aizawl palik sakhan ah an kalpi hna tiah an langhter. Mi thattu ah an puh mi hna hi Aizawl biaceihzung ah a harh ning in bia halnak le biaceihnak an tuah hna lai tiah theih asi. Sagaing ramṭhen, Mawlaik peng chung ah umhmun a khuarmi SAC ralhrang pawl cu luhhnawh in kahdoh an ton caah SAC ralhrang Officer 1 telh in 10 an thi, tiah National Unity Government of Myanmar (NUG) cozah in runvennak vuanci nih thanhca a chuah.
June 30, zinglei suimilam 5:15 tluk ah Mawlaik peng, Tawinn khua pawng ah umhmun a khuarmi SAC ralhrang Khah-mah-yiah 365, 366, palik le pyusawhti 50 hrawng hna cu mipi vengtu ralkap hna nih thazaang 80 tluk in an luhhnawh hna i, an kahdoh hna caah zing suimilam 11:45 tluk ah an sakhan an laak khawh, tiah theih a si.
Cu kahdohnak ah SAC ralhrang Officer 1 telh in 10 hrawng an thi i, hliam a pumi zong an tam pinah hriamthil tam ngai zong an laak chih khawh. Mipi ralkap in minung 9 nih hliamhma an tuar i, cu chung ah 2 cu an faak ngai, tiah NGU nih a langhter.
Kahdohnak a chuah hnu ah Kalaymyo in ra mi Mi-35 nih zing suimilam 8:00 tluk in 8:30 tiang voi khat, zing suimilam 11:10 tluk in 11:30 tiang voi khat, chun suimilam 1:50 in 2:20 tiang voi khat, Tada-U zong in chun suimilam 12:12 in 12:15 tiang, (A dihlak fonh) cunglei kahdohnak voi 4 tiang a tuah, tiah NUG nih a langhter chih.
Cu pinah Sagaing ramṭhen, Kalaymyo peng ah kahdohnak a chuak i, SAC ralhrang 20 an thi, tiah National Unity Government of Myanmar (NUG) cozah in runvennak vuanci nih a langhter. June 29, zinglei suimilam 10:30 tluk ah Kalay peng, Thazi khua pawng ah Myothar khua in rallam a rak sialmi SAC ralhrang le pyusawhti thazaang 70 hrawng cu Kalay pengkomh Battalion 4,5,6, Vakok-CNDF,
Kalay peng Pah-kah-phah, Kalay khuapi UG phu hna fonh nih bomb puahhnawh in an kahdoh hna caah kaphnih kar kahdohnak faak ngai in a chuak, tiah a langhter. Cu kahdohnak ah ralhrang lei in 20 an thi i, SAC ralhrang nih Tharzi khua nichuahlei um mipi inn 14 cu khangh in an hrawhpiak hna, tiah a langhter chih.