Breaking News: President U Win Myint Le U Hla Thein Cu Supreme Court Ah An Phan Ve Cang Lai

Kawlram President U Win Myint Le UEC Chairman U Hla Thein Cu Court Ah Khin An Timh Cang Hna. January 29, 2021 ah Kawlram Supreme Court nih pom ding le pom lo ding kongkau an ceih lai, tiah thawng theih a si. Hi kong he pehtlaih in January 5, 2021 ah Union Supreme Court nih cathanh an chuahnak ah Mandalay Sihni (Lawyer) U Zaw Weih nih President U Win Myint cu U/S Case No. 198/2020 hmangin biaceihzung ah a khin i, a ra lai dingmi January 29, 2021 ah pompiak le pompiak lo ding kong video conferencing in Supreme Court Judge minung 3 nih an writ petition kong an ceih te lai. Hi video conferencing kongah hin tehte cu ralkap an si lai tiah thawng theih a si.

Cun cu bantuk thiamthiam in UEC Chairman U Hla Thein zong NPD Party President Thazi Shitu Shoe Maung (Ex- Major General le Ex- Union Minister) nih U/s Case No.199/2020 in Court ah an khin ve. Online video chungah NPD Party President Thazi Shitu Shoe Maung nih a chimning ahcun Case buaipi tu ding cu Lawyer’s U Zaw Weih le Daw Khin Khin Tye an si lai. January 29,2021 ah Myanmar Supreme Court nih Writ Petitions an pom le pom lo aa fiang te lai ti’ah NLD Spokesman Dr. Myo Nyunt nih a chim.

Tukum 2020 thimnak kong hi US an buai bantuk tein Kawlram chung zongah an buai taktak ve ti khawh a si. NLD party cu USDP Le a dangdang party pawl nih thimnak a dik lo, tiah nihin tiang an auh hnawh peng hna. January 29, 2021 ni ah Lawyer’s minung 3 nih an pompiak hna a si sual ahcun zei dah a cang ve te lai, zoh rih ko hna sih. USDP Le NPD party lei nih tehte ah ralkap an si lai tiah an chim.