Breaking News: President Biden nih Putin cu a phomh taktak ko cang!
Putin Cu Lainawngpa Tiah American President Joe Biden Nih A Auh!
=======
Russia President Putin cu lainawngpa tiin American President Joe Biden nih hmasabik ah a uah cang. March 16 ah thawngpang fianternak an tuahnak ahcun thawnglatu pakhat i biahalnak cu President Joe Biden nih a cunglei bantukin a lehmi a si i, hi bantukin lainawngpa tiah a timi hi cohlan khawh le ngaihthiam khawhmi a si lo tiah Russia ram nawlngeitu chungin biachimnak nawlngeitu nih a leh ve.
Ukraine sinah American nih a bawmh dingmi zongah: vanlawng kahnak dung gyi, drone telh in Laungchia tampi an tel i, zarh khat chungah American bawmhnak lawngah 1 billion a tling cang tiah President Biden nih a chim. Cupinah Poland le Moldova ah Ukraine rammi ralzaam tamtuk an luh ruangah minung le minung i zawnruahnak le bawmhnak pek dingin biakamnak a tuah cang bangin eidin siseh, sii-aii telh in thil dang herhbaumi tete cu American cozah nih an timhtuah cuahmah lio a si.
Ukraine Kahdohnak Ah Russia Ralkap Bawi Ngan (4) An Thi Cang! Ukraine ramchung kahdohnak ah Russia ralkap ralbawi ngan pakhat a thi chap tiah Ukraine President nih a chim. Russia ralkap ralbawi ngan a thimi i min cu a langhter lo nain Bogyoke Oleg Mityaev a si tiah Ukraine ramchung runvennak zungah ruahnak cheutu/petu nih a chim.
Russia ralkap ralbawi Bogyoke cu Mariupol khuapi pawng kahdohnak ah Ukraine Battalion kutin a thi tiah Ukraine ramchung thawngzamhnak nih an langhter. Amah hi Ukraine ralkap nih an thahmi Russia ralkap bogyoke (4) nak a si cang tiah theih a si.
Atu tiangah Ukraine ramchung kahdohnak ah hin Russia ralkap bogyoke (20) nih an hruai hna tiin dothlatnak tuahtu nih an chim caah Russia ralkap bogyoke then (5) ah then (1) cu Ukraine ralkap kutin an thi cang tinak a si. Ukraine ah Russia ralkap bawi nganngan pawl cu a bikin kah that dingin ngiathlaitu phu an thlahnak kong cu Ukraine President he naihniammi pakhat nih Wall Street Journey ah a chim.
Russia Ralkap Pawl Nan Hriamnam Chiah U’ Tiah Ukraine President Nih A Forh Hna! Ukraine ramchung ah kahdohnak tuahtu Russia ralkap hna nih nan hriamnam chiah dih u tiah Ukraine President nih March (15) ah a forh hna.
Russia ralkap hna nih Ukraine ramchung ah kahdohnak nan tuahnak ah hin a thimi le hliammi nan tam tuk, nan sungh tuk tiah Ukraine President nih March 15 zaan ah a chim hi a si.
Kahdohnak ruangah zeibantuk teinak hmanh an hmuhlozia cu Russia ralkap nih fiang tein an hngalh tiah Ukraine President nih a chim. Russia ralkap hna nih nun man a ngeihzia le a herh loin thisen chuah le thih a herh lo ning an i fiang tuk cang caah hriamnam a chiahtu Russia ralkap paoh cu upatnak he kan in cohlang lai tiah a chim chih.
Ukraine kahdohnak kongah duhlonak signboard tlaih hratin Russia ram nih a ngeihmi thawngzamhnak nih direct in thawngzamhnak a tuah lio zongah duhlonak langhtertu Marina Ovsyannikova zong upatnak kan pek i, cu bantukin raltha taktakin a dikmi cu dirhkamh dingin i dinh loin aa zuam cuahmahtu Russia rammi hna cungah kan lunglawmhnak kan langhter tiah a chim chih.
Russia le Ukraine karlak itheihthiamlonak a daih khawh nakhnga tonbiaruahnak cu pehzulh in tuah ding a si i, cu bantukin tonbiaruahnak kan ngeihmi zong thatnak lei a panh thluahmah cang tiah Ukraine President nih a chim chih.
UNO-Humhimnak Council Phung Ning Aa Thlenh Khawh Nakhnga Japan Nih Biatak Tein Hma A Laak Cang Lai! UNO-humhimnak council ah Japan ram hi pehzulh in chungtel a si zungzal khawh nakhnga siseh UNO-humhimnak phung ning hna hi aa thlen khawh nakhnga Japan ram nih biatak tein kan i zuam cang lai tiah Japan ramdang vuanci nih March 15 ah thawngpang fianternak ah a chim.
Ukraine cu Russia nih kahdohnak a tuahmi kongah mawhpuhnak/sual phawtnak siseh Russia ralkap hna nih anmah umnak ram ah an kir dih nakhnga tiin chuahpimi agenda cu Febuary thla dih lai hrawngah tuahmi UNO-humhimnak council tonbiaruahnak ah Russia nih a nawlngeihnak Veto Power hmangin dohkalhnak a tuahmi cherhchanh in Japan ramdang vuanci nih a chim hi a si.
Humhimnak council ah chungtel a si zungzaltu Russia nih vawlei cung hmunkip ah remdaihnak le humhimnak ah tuanvo a ngei tiah Japan ramdang vuanci nih a chim. Humhimnak chungtel ramchung ah a buai ngaimi le a hnoksak ngaimi sipuazi ruangah humhimnak council phung ning thlenh ding hi a har ngaingai lai nain UNO-humhimnak phung hi rem that le sersiam a duhtu ramdang hna he tuanti hratin a si khawh chungin sersiam dih dingin kan i zuam lai tiah a chim.
UNO-humhimnak council phung ning hi biatak tein thlenh ka duh ko tiah March 14 ah Japan hluattaw tonbiaruahnak ah Japan Prime Minister zong nih a rak chim i, UNO-humhimnak chungtel a si zungzaltu Russia tuahsernak hi vawlei cung ram huap in zulhphung le policy thar hi a herh hringhran timi a langhter, tiah a chim ve.
Buainak a chuah deuh paoh ah UNO-humhimnak tonbiaruahnak ah Veto Power hman ngah lo dingin phihkhamnak tuah dingin France nih agenda a rak chuah bal cang. Japan Prime Minister nih France bantukin phung ning thlenh a duhtu ram hna he i fonhin UNO-humhimnak council phung hi thlenh dingin biatak tein thazaang kan chuah cang lai tiah a chim.
Credit: The Federal Times