Breaking News: Police Nih Myat Thet Thet Khine A Nunnak An Lak Cang, Tihnung Chinchin Cang

Kawlram chung buaibai nak cu a linsa chin lengmang cang caah thinphang a si cang. Kawl ralkap cu chimh loin Police sawhsawh hmanh nih mah tin mi sawhsawh a nunnak an lak ahcun ralkap lebang cu tihnung tuk an si lai ti a fiang tuk cang. Nihin ni Kawlram chung duhlonak an langhtermi video le hmanthlak pawl zoh tikah lung a nuam hrimhrim lo. A ruang cu Police nih mi sawhsawh an tuahto mi hna zoh tikah an luan deuh cang ti khawh a si. Meithat zung motor bak in ti in an kah hna lawng siloin ti chuang ah a phunphun sii-vai an chiah khawhmi le an cawlkhawhmi a si caah thinphang a si.

Nihin NayPyiTaw khuapi chung duhlonak langhternak ah Siangngakchia pakhat a simi Myat Thet Thet Khine cu a nunnak a liam cang, tiah thawngpang theih a si. Myat Thet Thet Khine hi kum 2021 duhlonak langhternak ah a pakhatnak a nunnak a liam a si lai tiah zumh a si. Kawlram kong ruah ah thinlung a ba tuk hringhran i, tha a dih tuk hringhran ko. Min Aung Hlaing zong nih zahan a bia chim ngai tikah a thinlung thuh a duh hlei lo i, kumkhat chung bak amah nih hruai le pen a timhti fiang tein hngalhkhawh le theih a si cang fawn.

Tutan Kawl ralkap nih hramhram in aana ting kong ah UN lei siseh, US lei siseh, Europe lei siseh, Asian ramchung le vawleipi nih an buaipi mi issue ngan taktak pakhat ah a cang. Hi buaibai nak kongah mipi lei nih thazaang thawng chinchin in kan chuah i, kar kan hlan lo ahcun Police le ralkap pawl an i nuam tuk lai. Nihin Naypyitaw khuapi ah a nunnak a liammi Myat Thet Thet Khine chungkhar cingla vialte hna zong ingtuar khawhnak ngeih hram ko hna seh. Kawlram tuanbia ah a kong ceih le phai a zungzal cang lai.