Breaking News: PDF Pawl An Khuaci A Mui, Ram pumpi PDF Sin Bawmh An Hal Cang!

Breaking News: PDF Pawl An Khuaci A Mui, Ram pumpi PDF Sin Bawmh An Hal Cang!
===============
Sagaing ramthen, Kawlin district chung in Kawlin, Wantho, Pinlebu myone hna chung ah tuzing in SAC ralhrang pawl nih phone line le internet line an phit dih hna. Cu ti cun phone line le internet line an phit dih hnu ah SAC ralhrang phu nih PDF fawl cu cung he tang in ralkap thazaang a thong in an doh hna caah Kawlram pumpi PDF/LDF hna nih voi voikhat ah an zapi tein Ralhrang doh ti ding i Pinlebu PDF nih nawlnak ca an chuah.

Nawlnak cathanh an chuahmi cu a tanglei bantukin a si. Pinlebu myone chung ah phone line le internet line an phit dih riangmang i SAC ralhrang nih an ralkap thazaang a thong leng le Jet fighter in an kan doh. Thawngpang thup riangmang in an kan dohnak cu myone mipi le PDF pawl nih fah piin kan tuar cang lai.

Thazaang khawmhsuah in caan sau timhtuahnak kan ngei nain sahrang lungput ngei SAC ralhrang pawl raldoh phung a zulh lomi hna ruang le, ‘Aho paoh an thih zong ah keimah ka thi lo ahcun a poi lo’ timi lungput an ngeih ruangah mipi pawl an tuar khun cang lai.

Tu bantuk dirhmun kan um lio ah rampumpi PDF pawl nih nanmah le nan umnak hmun myone cio ah raldoh cio ding in kan in nawl hna.Hi nak tam deuh a thimi le a tlaumi an tam hlan le kan tuar tuk hlan ah kan tuarnak aa ning deuh hnga maw tiah nanmah le nan peng cio zong in ralhrang nan duh cio nak lai zaangfah kan in nawl hna.

Atu bantuk caan ah peng/myone kip in kan doh lo ahcun pengkhat hnu pengkhat in SAC ralhrang nih an ei dih te lai. Rampumpi in voi voikhat ah kan doh ti lawnglawng ah hi dohthlennak kan tei lai. Kan dohpi cio ko u’ tiah Pinlebu PDF nih nawlnak cathan an chuah hi a si.

Pinlebu myone chung ahhin tu zarh chung ah SAC ralhrangbawi telh in ralhrang 40 hrawng an thah khawh pinah an hriamnam tam taktak cu PDF pawl nih an lak piak hna. Cucaah tu bantukin SAC ralhrang lei nih cung he tang he thazaang tampi hmang in an doh hi a si tiah KTM nih a tarlangh. Ref: Khin Thit Media

Sagaing PDF Bu 3 Fonh nih SAC Ralhrang an Den Hna. Nizaam Seprember 22, zaanlei sml. 4:00 hrawng ah Sagaing ramtthen, Pyinlaybu peng chung ah PDF bu 3 fonh nih SAC ralhrang an kah hna i ralhrang tampi an thih hnu ah saimahrang in an zaam dih hna.

SAC ralhrang bu no. 44 pawl cu Pyinlaybu peng, Naung-moe khuate in Wanbe-in khuate lei an kal lio, Moemit Tiva hlei cung ah PDF-Pyinlaybu, PDF-Kawlin le PDF-Wanthu nih an kah hna hi a si.

“A thimi SAC ralhrang lak ah major rank pakhat aa tel. Miruak cheukhat motor cung ah an khin i an zaampi hna. Asinain, acheu cu hlei tang tiva chung ah an hlonh ta hna,” tiah khuami pakhat nih a chim. SAC ralhrang pawl nih an tliktakmi ralhraim tampi zong PDF nih an lak khawh hna.

Chin Miphun Runvennak Fund ca ah Thazaang Chuah Cio ding in CNF nih Sawmnak Tuah. October 2021 in thawk tthan dingmi Chin miphun runvennak lakhruak fund (Emergency National Security Fund-ENSF) ca ah ramleng khuasa, rian ngei Chinmi zapi nih thla khat ah $100 nak tlawm lo thazaang chuah cio ding in CNF nih sawmnak ca a chuah.

Rian a ngei lomi hna zong nih mahle ti khawh tawk cio in thazaang chuah ding in forhfialnak le sawmnak an tuah chih. Hi hlan ah ENSF fund thawh ding in sawmnak voi khat rak tuah a si cang i, atutan hi a voi hnihnak a si.
“Miphun chanhchuahnak ah thisen sung a luan cang bantuk in a taang rihmi rianhma pehzulh awkah Chin miphun dihlak ttuanvo kan ngei,” tiah sawmnak ah an langhter chih.

Pastor Cung Bawi Hum Thih Kong ah Sualpalhnak Ngei Lo Phun in SAC nih Thawng an Chuah. Thantlang TCBC pastor Cung Bawi Hum meithal in kah a tongmi kong nih vawleipi a cul hnu ah SAC nih sualpalhnak ngei lo bang in September 22 chuak SAC thawngzamhnak (The Global New Light of Myanmar) ah an langhter.

“PDF 100 hrawng nih runvennak a tuahmi ralkap pawl cu Thantlang khuachung ah an kah hna caah i kahnak a chuak. Meikanghnak hmun lei ah a kalmi Pastor Cung Bawi Hum cu meithal kuan nih a khen i a thi. Hi kong ah hlathlainak kan tuah lio a si,” tiah thawngthanhnak ah an langhter.

“Pastor Cung Biak Hum kutdong an tan i a Ring an fir tiah Khit Thit Media nih lih a ttial,” tiah SAC nih thian an i cheh chap. September 18 Thantlang khua thilcang kong he pehtlai in UN nih Myanmar nuhrin covo kong ah Special Palai ah a hmanmi Tom Andrew nih, “Thantlang innkangh le pastor pakhat ruru hranghrang in thah a tonmi nih a langhtermi cu rialdip uktu ralkap kut tang khuasak hi nun buin Hellram tlak he aa khat ti hi a si,” tiah Twitter ah a ttial.

Tu zaan UN tonpumhnak ah Tom Andrew nih Myanmar ram kong chimrelnak a ngei lai i Thantlang thilcang kong hi a chim chih te lai tiah zumh a si.