Breaking News; PDF Nih Ralrin An Pek Hna Hnu In Yesagyo Peng Thil Cu A Ropui Ko!

PDF nih ralrin an pek hna hnu in Yesagyo Peng khuabawi dihlak deng nih rian chuahtak
============
Magway Ramthen Yesagyo Peng khuabawi dihlak cu nan rian in chuak dih u, tiah PDF nih ralrin an pek hna i October 5 ah an dihlak deng in an chuak.

Yesagyo Peng ah hin Khuatekomh 81 le khuapi ah Sang 8 tiin an um i khuabawi 89 chung ah minung 10 tluk lawng rian in a chuak lo mi an si cang, tiah theih a si.Hihi PDF-Yesagyo hna nih September 30 lio ah rian chuahtak ding in ralrin an rak pek hna hi a si, tiah Mizzima nih a tial.

Yesagyu ah ralhrangbu rianpek mi khuabawi minung 36 cu phungning in rian an chuak, khuabawi tam deuh cu an tlizaam. Magway ramthen, Yesagyu peng chung sanguktu le khuabawi riantuan mi 89 chungah khuabawi 36 nih phungning in rian chuahnak an tuah. Rian chuah lo in a ummi a dang khuabawi hna cu rian an ngeihnak khua ah um ngam lo in hmundang ah an tlik zaam caah khua uknak le cawlcangh nak ah hma a kal kho ti lo tiah khuachung thawngzamh nak hna nih an langhter.

Magway ramthen, Yesagyu peng chung khuabawi cheukhat cu rian chuah nak le rian ngolnak ca chiah lo in, an umnak le rian an ngeih nak hmun ah um ngam lo in, battalion 256, 257, 258 ralhrang hna sin ah chungkhar le rualchan tiang auh in an zam, cun ralhrang hna sin ah si lo in hmundang ah a tli zaam mi khuabawi an tam caah an rian hma a kal kho ti lo tiah khuami hna sin in theih a si.

Yesagyu khuachung mi Mino pakhat nih “Khuabawi tamdeuh cu rian an chuak ko. Cheukhat cu rianngol le rian chuah a um lo na in rian an ngeihnak hmunah um ngam lo in an tli zaam, cheukhat cu ralhrang sin ah an i fon, ralhrang hna zong cu leng ah an chuak ngam lo, cucu tu lio ton mi a si” tiah a chim.

Yesagyu khuachung ah sang 8 a um, peng chungah khua 89 an um. Cu chungah phungning in khuabawi rian ngolnak a tuahmi hna cu minung 36 an si tiah theih a si. Yesagyu khuachung sangngan 8 in sangbawi dihlak nih rian chuahnak ca an chiah cang tiah Khit Thit Media nih a tial.

DKBA-tengnge phu nih hliamh mi Du-Bohmugyi Kyaw Swar Myo nihin ah a thi. October 1 lio Kayin Ramkulh ah Southeast Commander, Bogyoke Ko Ko Maung khuallam runvennak tuanvo latu Du-Bohmugyi Kyaw Swar Myo cu DKBA-tengnge phu nih an kah i hliamhma fak a tuar ni 5 hnu, nihin October 6 ah a thi.

Hi kahnak lio ah Bogyi pakhat tel in minung 5 hmunril in an rak thi i Du-Bohmugyi Kyaw Swar Myo cu a zunbawm (tutuhlut) ah kuanfang a luut i sii-inn kip ah aa thial len nain ni 5 hnu ah a thi.

Khin-U, Nganzone, Tigyaing le Mandalay ah Dalaan, inn 100 uktu, le pyu-saw-htee tiin minung 8 thah. Sagaing Ramthen Khin-U Peng ah Dalaan Kyaw Thu Moe le Pyu-saw-htee hriamtlai hruaitu Soe Min, Ko Soe Myo, le Zaw Than an thah hna.
Cun, October 3 lio, Mandalay Ramthen Mingyan (Minchan) Pengkomh Nganzone Peng ah Dalaan siangcachim Saya Ar Nu @ Thiha le Sayama Mya Than Htay zong an rak thah hna.

October 6 zing, Mandalay Ramthen ah inn 100 uktu zong meithal in an kah i a thi. October 5 lio Tigyaing (Htee-chaing) Peng zong ah Dalaan U Shan (Palek in aa din mi) zong an thah, tiah Khit Thit Media nih a tial.