June Thla Chung Kahdohnak Ah SAC Ralkap 400 An Thi, Pau Dohthlennak Ah Ralkap 30,000 Leng An Thi Cang — NUG
===========
Sagaing, Magway, Mandalay ramṭhen le Shan ramkulh chaklei in June thla chung ah No. 1 Military Area Command kuttang PDF, Pah Kah Phah le EROs ṭangṭi phu le SAC ralkap kahdohnak voi 439 a chuak i SAC ralkap 400 an thi, 574 hliamhma an pu. PDF ṭangṭi phu lei in ralkap 26 nih ram le miphun ca ah nunnak an pek i, ralkap 59 hliamhma an pu, tiah NUG runvennak zung nih an langhter.
Kahdohnak ah SAC ralkap meithal phuntling zun 26 telh in zen-kuan tam pi an laak. No. 1 Military Area Command hmun in May thla chung ah kahdohnak voi 500 a chuak i April thla chung lawng ah kahdohnak voi 400 leng a chuak. Cu thla hnih chung kahdohnak zong ah SAC ralkap a thimi le aa hliammi an tam, tiah NUG runvennak zung nih cun an langhter.
PDF le SAC ralkap kahdohnak ah PDF nih SAC ralkap tam ngai an thah hna i hliamhma pumi an tam caah SAC ralkap a zaam mi zong an tam cang, tiah NUG runvennak zung chimphuannak nawlngeitu Maung Maung Shwe nih a luancia ni tlawmpal ah a chim.
SAC ralbawi hna nih an kuttang ralkap an hmanmi hna hi thla khat chung ah ralkap 1,000 leng an si tiin SAC chung ummi nih thawng an kan pek. Pau dohthlennak chung ah SAC ralkap 30,000 leng an thi i thilri chantu ralkap le IT Battalion in ralkap hna zong ralhmai kal dingin an hman cang hna, tiah NUG runvennak zung chimphuannak nawlngeitu Maung Maung Shwe nih cun a chim.
Vawleicung Fashion Thilri Zuartu Company Ngan Bik Pahnihnak H&M Nih Myanmar An Chuahtaak Cang Lai. Vawleicung fashion thilri a zuartu company ngan bik pahnihnak H&M Company nih Myanmar ram chung i an thilṭhitnak sehzung le rian vialte cu an ngol lai i Myanmar ram an chuahtaak cang lai, tiah Khit Thit Media nih a ṭial.
SAC ralkap nih thilṭhitnak sehzung hna ah nuhrin covo an buar ruangah le phihkhamnak an tuah ruangah H&M Company nih Myanmar ram chuahtaak kan timh cang, tiah August 17 ah an langhter. Atu tiang ah rianṭuantu hna nuhrin covo buarnak case 20 a um i chekhlatnak an tuah cuahmah lio a si.
H&M Company hi ramleng fashion company lakah Myanmar ram a chuahtaak hmanung bik ding an si i anmah hlan ah Inditex (ITX.MC), Primark (ABF.L), Marks & Spencer (MKS.L) le ramdang company ngan pawl nih Myanmar ram an rak chuahtaak cang.
Kalay-YeU Lam Zarhhnih Chung Phihkhar Ruang Ah Kalaymyo Ah Thilman A Kai; Arti Pum 2 Ah 1000 In An Cawk. Sagaing ramthen Kalaymyo in Yangon-Mandalay kalnak lampi Kalay-YeU (မဟာမြိုင်လမ်း) lam cu zarh hnih chung an phihkhar ruang ah Kalaymyo khuachung ah Sa le thil dangdang a man an kai tiah tualchung mi nih an chim.
Kalay-YeU motor lampi cu August 5 in mipi ralkap hriamtlai le SAC ralhrang kar kahdohnak ruang ah caan karlak an phihkhar hi a si. “Abik in Mandalay, Yangon lei in Nga sa le Arsa a rak luh tawnnak lampi a si caah a tu ah cun cuaikhat ah 2000 in 3000 tiang a man kai cang. Ngasa/Arsa man a kai si lo in a phurh man tu a kai caah a si.
Lam an on in cun a sining kel in a tum dih than te ko lai.” tiah tualchung mi pakhat nih a chim. Hi motor an phihkhar ruang ah Ngacin cuai khat ah 15,000 a rak si tawn mi cu a tuah 18,000 ah a kai, Arsa (Boilar) cuaikhat 12,000 in 16000 a kai i Arti zong pum 4 ah 1,000 cu pum 2 ah 1,000 in a kai tiah kan theih.
Gangaw Peng Ah SAC Ralhrang Hriamngan Kahnak In Mipi Thimi Le Hliam Pumi An Tam! Magway ramṭhen, Gangaw peng, Myaukkhinyan khua ah umhmun khuarmi SAC ralhrang pawl nih duhpaoh in an kahmi hriamngan ruang ah a pawngkam khuami hna nunnak liammi le hliam a pumi an tam, tiah taulchung thawngzamhnak nih an langhter.
August 8 lio ah SAC ralhrang nih 120MM hriamngan in an duhpaoh an kahmi nih Yethar khua a tlak caah kum 34 pa 1 nih a lu ah hliamhma a tuar. August 11 zong ah 120MM hriamngan an kahmi kuan 2 cu Gangaw peng, Myinthar khua a tlak caah tualchungmi kum 58 nu upa 1 le kum 33 pa 1 hna cu hmakhatte ah an nunnak a liam i kum 12 ngakchia 1, kum 28 pa 1 le kum 63 nu 1 nih hliamhma an tuar, tiah Gangaw peng mipi hriamtlai Pah-kah-phah nih thawng an thanh.
A luancia August 8 thok in SAC ralhrang nih hriamngan an kah lengmang caah nunnak liammi le hliamhma tuarmi an tlawm ti lo. August 13 lio zong ah Taung-hkin-yan khua inn 2 cung ah SAC ralhrang hriamngan kahmi an tla i an rawk dih, tiah an langhter chih. Credit: The Chin Post, Lungmili Media