Pago Ramthen Hluttaw Palai Pakhat Kum 19 Thongthlak Hnu Ah Thihdan Pek Khawhnak Upadi In Taza An Cuai Than
=========
Pago ramthen Pyay khua ah SAC cozah nih Upadi poh-mah 6 in kum 19 thong an thlak lio mi NLD Hluttaw palai Kyaw Zay Ya cu thih dan pek khawhnak upadi phun 2 in taza an cuai than tiah chungkhar neihniam pakhat nih a chim.
Amah cu SAC cozah nih lainawnnak, phungning lo thimnak kong, zuu zuar zamhnak kong le 505 (a) case phun 2 in kum 19 thong an thlak lio mi a si pin ah Lainawn nak upadi phun 2 in sual an puh than hi a si.
“A ra lai mi May 19 ah biaceih zung ah an chuah pi lai ti kan theih caah sihni hlan a hauh caah a tu lio cu sihni hlan ding an har ngai, an duh hna lo. Upadi phun 2 an chap piak mi hi kum 10 thong pin ah thih dan tiang pek khawh mi a si caah a si khawh chungin sihni kawl kan i tim” tiah chungkhar neihniam pakhat nih a chim.
Amah cu SAC cozah nih 2022 June 9 ah an rak tlaih i Pyay khua thonginn ah 2022 December 19 ah kum 19 thong thlak dingin bia an rak ceih piak mi a si. Kyaw Zay Ya cu Pago ramthen Pyay peng ah ramthen Hluttaw palai hmunhma 2015 le 2020 ah voi hnih tiang teinak a hmu mi a rak si tiah kan theih.
CDF – Asho Headquarters Cu Thlichia Nih A Hrawh ; Magway ramhen hrambunh mipi hriamtlai phu pakhat simi Chin Defence Force-Asho (CDF-Asho) sakhan (Headquarters ) cu May 14, chun suimilam 2:00 tluk ah Cyclone thlichia nih a hrawh dih, tiah theih a si,
“A cungkhuh a chawihpiak dih hna i, a vampang tu cu tlawmpal lawng aa rawk. A dang thilri hna tu cu kan hialkam manh hna” tiah CDF-Asho in uanvo ngeitu pakhat nih a chim. Cyclone Thlichia Cu Myanmar Ram Lengah A Chuak Cang Tiah Khua Caan Zohnak Zung Nih An Langh Ter
Mokha Cyclone thlichia cu May 15 chun hnu ah Myanmar ram leng ah a chuak cang i thlichia thazaang dermi ah cang in Tuluk ram lei ah a lut cang tiah Myanmar ram khua caan zohnak zung nih May 15 zanlei sang ah an langh ter. Thazaang thawng ngai mi thlichia cu May 15 ni ah thazaang der mi (a hring mi muici)ah aa thlen cang caah a rawkral mi kawl hawl le thianh hlimhnak tuah khawh a si cang.
Thlichia cu Myanmar ram lengah a chuak cang nain khuadawm le tikhu ruangah Sagaing, Mandalay ramthen, Kachin le Shan ramkulh hna ah thlihran ning suimilam pakhat ah meng 30 tluk a rang kho. Thlichia thazaang ruangah ruahsur, ruah lo piin ti lianh le mincimh nak zong a chuak kho rih tiah an langh ter chih. Thazaang thawng ngai mi Cyclone thlichia cu Rakhine ramchung ah fakngai in a hran caah inn le lo zong zatuak 90 tluk a rawk tiah kan theih.
Thlichia Ruang Ah Matupi Peng Hpanine Khua Cheu 4 Chung Ah Cheu 3 A Rawk ; Chin ramkulh, Matupi peng, Hpa-nine (ဖနိုင်) khua cu cyclone thlichia ruang ah mipi inn cheu 4 chung ah cheu 3 tluk a rawk, tiah tiah theih a si.
Hpanine khua hi thlichia a hran lio ah mipi hna cu tlakrawh inn le a thar sakmi inn deuh ah a bu in an i dor hna. Biakinn 3, sianginn 4 le cozah rianṭuantu hna umknak telh in cheu 4 chung ah cheu 3 tluk a rawk, tiah The Matupi Times nih a langhter.
“Tualchung mipi hliam tuar an um hraw lo nain inncung khuh tu a hawhpiak dih nawn hna. Atu cu thli a dai cang caah mah inn cio kan hlam hna nain sakremh ṭhan ding ah a fawi ti lo, Matupi khuapi ah inn cungkhuh a dih tiin thawng kan theih, cu pinah tlunkal zong a ngah fawn lo, khuapi luhchuahnak Gate phihkhar a si, eii-din ding cu kan ngeih ko hna nain a chumhchuannak hmunhma kan ngei ti lo, thli a hran ṭhan sual ah cun harsatnak kan tuar ngai rih lai” tiah tualchungmi pakhat nih a chim.
Matupi khuapi le Hpa-nine khua cu Electric mei a rat ti lo naak zarhkhat hrawng a si cang i Sola pawl hman deuh an si hna nain thli nih a chawihpiak dih hna caah harsatnak an tuar ngai, tiah theih a si. Credite; Lungmili Post