Thawngpang Chia Fonh!
=====================
Bago ramṭhen, Htantapin peng Nyaungpinthar khuami ngakchia 7 telh in tualchung mi 17 cu SAC ralkap nih mei in an khangh hna, tiah PDF in ralkap pakhat nih a chim. May 10 zinglei suimilam 10:00 in zanlei suimilam 5:00 tiang Nyaungpinthar khua pawng ah SAC ralkap le KNU, PDF kar kahdohnak a chuak i SAC ralkap 20 an thi, ralbawi pakhat telh in ralkap 3 an tlaih hna.
SAC ralkap lei a thimi an tam caah ngakchia 7 telh in tualchung mi 17 cu mei in an khangh hna, tiah theih a si.
“May 10 zing suimilam 10:00 in zanlei suimilam 5:00 tiang kahdohnak voi 5 a chuak i SAC ralkap 20 nak tlawm lo an thi, 10 hliamhma an tuar. A thimi an tam caah tualchung mi 17 cu a bu in mei in an khangh hna,” tiah PDF in ralkap pakhat nih a chim.
Shan ramkulh, Kalaw peng cu May 11, zing suimilam 8:00 renglo hrawng khan fak ngai in ruahpi a sur caah Kalaw peng le Thazi (သာစည်) peng ramri ṭhennak tiva in tilian a chuak, tiah theih a si. Cu tilianhnak nih Kalaw peng Shwe-hpone-min (ရွှေဖုန်းမင်:) khua um suikhur co in rian a ṭuantu hna umnak thlam inn 73 tluk ti nih a khuh dih, tiah Myanmar ram meithattu phu le mi bawmchantu hna nih an langhter.
“Ti nih a khuhmi hna inn hna hi hmunkip in rianṭuan ah a rami hna an umnak inn an si i, a himnak hmun ah kan ṭhialkam pi hna. Minung nunnak liammi cu an um hraw lo” tiah mi bawmchantu phu in minung pakhat nih a chim.
Atu bantukin a bawmhchantu hna cu Kalaw peng mei thattu bu in mei thattu hna le mi bawmchantu phu hna kan si, tiah an langhter chih.