Thawngpang Chia Fonh!
=================
Pur thla, kan hnu zarh chung khan Myandalay khuapi cheukhat ah pa pahnih namte hliam tuar in a thi mi ruak hmuh an rak si. Namte hliam in a thi mi hna ruak 2 hi Patheingyi peng le Maha Aungmye peng ah hmuh an si. Pur 4, khan Patheingyi peng Seta khua pawng ah kum 50 tluk upa ruak hi char hmaisa a rak si i Pur 7, ah Maha Aungmye peng chawdawr ah kum 30 tluk namte hliam in a thi mi pa ruak char a si ṭhan.
Nunnak liammi hna hi a ho ansi tiah dohthlat khawh asi lo. SAC ralhrang nih uknak an lak hnu hin Myandalay ah i thahnak a tam cang tiah an chim. Hi i thahnak ah hin NLD party riantlai tu hna zong an i tel chih tiah an langhter. Sagaing ramṭhen, Monywa peng, Yekaan-suh khua pawng Monywa PDF Battalion-27, Ṭet-khuai-2 sakhan pakhat cu SAC ralhrang nih an luhhnawh hna caah PDF nu 2 telh in minung 4 le khua mi 2 an thah hna, tiah kan theih.
June 7, zing suimilam 5 ah SAC ralhrang 80 rallam sial mi hna nih meithal le hriamngan he an kah hnu ah an luh hnawh hna hi a si. “Zing suimilam 4:30 ah Duty kan ngol bak ah an kan luh hnawh. Ralhrang lei hriamngan 40mm ruangah kan ralkap 2 an nunnak a liam. Nu zong an i thuhnak in an hmuh hna caah an thah colh hna i mei an khangh hna. P.T kan tlik lio he aa ton caah zeihmanh kan la manh lo” tiah Monywa PDF Battalion-27 Commander Soe Kyi nih a chim.
PDF minung 4 nunnak a liam mi hna cu Kyaw Lay (kum 17), BE (kum 24), Zin Zin Soe (kum 18), Khin Yadana Oo (kum 20) hna an si. Mah pin ah Yekaan-suh (ရေကန်စု) khua mi kum 50 tluk upa pakhat telh in 2 zong an thah fawn hna. Ralhrang nih PDF sakhan an luhhnawh lio hna ah hliamtuar PDF minung 5 hna zong a himnak hmun pakhat ah an thlop lio hna a si. Cheukhat zong hriamngan kuan peh nak in hma fak tuk lo an tuar hna.
Aluan cia May 28 lio zongah Monywa khua chungah tlop dingin a kal mi UG PDF minung 2 hna zong ralhrang nih an tlaih hna i pakhat cu an thah cang i pakhat zong ralphaw ah an hman caah a nunnak caah thinphang in a um lio a si tiah kan theih. Myanmar ram ah hramhram in uknak lak a si hnu kum 2 leng caan chung ah SAC ralkap nih sualnak ngei lo mipi 3,632 a thah cang hna i a tlaih/hren mi minung 23,292 tiang an um cang tiah Assistance Association for Political Prisoners (AAPP) nih a thanh.
Atu cazin hi 2021 February 1 in 2023 June 8 tiang AAPP nih a khawmhsuat mi a si i khawmhsuat khawh mi leng ah a thi mi an tampi rih lai tiah a langhter. Pau Dothlennak chung, tuni tiang ah minung 18,961 an tlaih/hren cang hna i cu chung ah minung 6,316 cu thawngthlak ding in biakhiah an si. Dothlennak he pehtlai in an tlaih/hren hna i thah ding tiah bia an khiah mi minung 116 an um cang i hriawh in thah ding tiah biak an khiah mi minung 42 telh in minung 121 cu hriawh in thah ding tiah biakhiah an si caah thah ding tiah biakhiah a simi an zapi te 158 an si cang. Atutiang ah biakamnak he thlah ṭhan an thlah ṭhan a si mi 4,331 an um tiah a langhter.
Sagaing ramṭhen, Kawlin peng, Khantha hmunhma ah SAC ralkap pawl an lut i khuami 16 an tlaih hna i cu chung ah 8 an thah hna tiah Kawlin Revolution – KR nih a thanh. SAC ralkap pawl cu May 28 ah Kyauktan khua Thitphu tlang ah an lut i ni 5 chung Kawlin pengkomh B01 he kahdohnak a chuak. Cu ni 5 chung kahdohnak ah mipi 16 an tlaih hna i cu chung ah 5 an luat ṭhan nain 8 cu SAC ralkap nih an thah hna tiah an thanh.
Kawlin Revolution – KR biachimnak nawl a ngeitu nih “An thah mi hna i June 5 ah kan hmuh hna”. An chungkhar zong nih thawng an theih cang. Mipi hna nih SAC ralkap he a hlatnak ah nan um a herh” tiah DVB ah a chim. Tlaih a tong mi hna hi Ko San Oo, Maung Win (a thih le thih lo theih rih lo) Inyar khua in Ko Tin Lwin Aung (a thih le thih lo theih rih lo), Banbwe khua in Ko Phoe Soe (a thih le thih lo theih rih lo), Mohwa khua in Ko Win Bo, Ko San Oo, Ko Win Naing, Ko Zaw Min, Ko Zaw Oo, Ko Moe Moe le Phatkhakone khua in Ko San Lin hna an si.
Thah a tong mi hna chung ah Phatkhakone khuami Ko San Lin, hi mipi uknak phu chungtel pakhat a si i Mohwa khua mi 6 hna hi cu hmunkhat te ah an tlaih hna i hmunkhat te ah an thah hna i an ruak kha Tasu tlang pawng ramlak ah an hmuh hna. Thah a tong mi hna sin ah sui le tangka tampi a um i zeihmanh a ngei lo mi cheukhat cu an thlah ṭhan hna tiah Kawlin Revolution – KR nih a thanh.