Thantlang Khuachung Kahdohnak Ah CDF Thantlang Ralkap Pakhat Nunnak Liam!
=========================
June 12 zaan Thantlang khuachung SAC ralkap le Chin ralkap karlak kahdohnak ah CDF Thantlang chung in ralkap pakhat nunnak a liam tiah theih a si. “Thantlang khuachung ah sau ngai an i kap. Kahdohnak ah SAC ralkap lei zong hliamtuar le a thi cu an um hrimhrim.
CDF Thantlang chung in ralkap Thawngṭha nih ram ca ah nunnak a pek i hliamtuar zong an um,” tiah thawng kan hlatnak nih a chim. Nunnak a liam mi CDF Thantlang ralkap Thawngṭha ruak zong an laak khawh cang i CDF Thantlang nih an bochan taktak mi zong a si. Thantlang Khuachung Kahdohnak Ah a nunnak a liam mi hi Salai Lai Thang Lung (Van Thawng Ttha) a si.
Shan ramkulh thlanglei, Mobye peng ah May 25 in SAC ralkap le Karenni ralkap phufonh kar kahdohnak fakngai in a chuak. May 25 in June 12 tiang kahdohnak ruang ah ngakchia 3 telh in tualchung mi 35 nak tlawmlo an nunnak a liam, tiah Karenni nuhrin covo lei rianṭuantu phu nih an chim.
Nunnak liam mi hna chung ah hin pa 20 leng le nu 10 leng pin ah kum 18 ngakchia pakhat, kum 13 le kum 8 tluk lawng a si mi ngakchia zong an i tel, tiah an chim. Nunnak liam mi hna hi hriamngan hliamhnak ruang ah le kahdohnak chung ah i hreng in kah a tong mi an si, tiah Karenni nuhrin covo lei rianṭuantu phu in director Ko Ba Ngyia nih a chim.
Mobye khuachung hmun kip ah SAC ralkap nih hmunhma an lak i, tualchung mipi an hmuh mi hna poh cu an tlaih i an hrem hna hnu ah an thah hna ruangah hliamhma tuar mi le nunnak a liam mi hna ruak zong lak ngam a si rih lo, tiah mi bawmchamtu phu chungtel Ma Nway Oo nih RFA ah a chim.
SAC ralkap hna nih Mobye sangchung lam cheukhat cu umkalnak nawl an phih i lampi lawng hmannak nawl an pek hna, tiah theih a si. Mobye peng kahdohnak ah hin kaphnih in a thi mi an um pin ah, tualchung mipi cheukhat cu chuak kho lo in aa hreng mi an um rih, tiah PKPF in ṭuanvo ngeitu pakhat nih a chim.
SAC ralkap nih uknak an lak 2021, February in 2023 June 12 tiang ah Mobye tualchung mi 50 leng nunnak a liam cang i, cu chung ah kum 18 tang ngakchia 13 an i tel, tiah PKPF nih an cazin chung ah an langhter. Mobye khuachung hi minung 30,000 tluk an umnak a si i, atu lio a cangmi kahdohnak ruang ah sang 10 in mipi tamdeuh cu a himnak hmun ah an tlizaam hna i, sang thum hrawng lawng ah minung tlawmpal an um, tiah tualchung mi hna nih an chim.
Australia ram, Hunter Vallay, Wine a chuahnak hmun tiah a minthang ngaimi hmun ah ṭhitumnak puai i hmanmi Bus pakhat cu June 11 ah aa let i, minung 10 nunnak a liam pinah minung 25 cu siizung ah kalpi an si, tiah BBC News nih a ṭial.
Hi motor canghsualnak he pehtlai in, kum 58 tluk motor khaltu pa cu rang tuk in motor a khalh ruangah palik nih taza an cuai, tiah theih a si. Palik lei nih cun motor aa lehnak hmun ah bawmhchanhnak le hlathlainak kan tuah cuahmah. Motor aa leh lio ah hin chum a zaam tuk lio a si, tiah an chim.
Motor canghsualnak ah hin aa ṭhi-um mi hna cu an i tel lo. Hliamhma pumi tam deuh cu Hunter siizung ah an kalpi hna i, a zual deuh mi cheukhat cu Sydney ah an zuanpi hna, tiah Australia PM Anthony Albanese nih a chim.