Breaking News; Nihin Nikhat Chung Lawngah Ralhrang Lei Minung 137 An Thi!

Nihin Nikhat Chung Lawngah Ralhrang Lei Minung 137 An Thi!
=============
November 16, ni khat chungte ah Ralhrang 137 an thi. Nihin November 16, ni khat chungte ah Ralhrang 137 an thi, PDF 6 an thi ve i PDF nu 8 an tlaih hna, tiah KTM nih cazin (record) an tuah.

1. Kachin-Hpakant (Pharkent) ah 30 thi; 2. Kayin-KNU nih 32 thah; 3. Sagaing-Shwebo 10; 4. Sagaing-Yee-U 5; 5. Sagaing-Pale 30; 6. Sagaing-Salingyi 4; 7. Sagaing-Monywa 1; 8. Mandalay-Mogok 15; 9. Ayeyarwaddy-Pathein 10. Sagaing Ramthen Minkin ah PDF 3 an thi. Sagaing Ramthen Kalaymyo ah PDF 3 an thi.

Ralhrang ruak le hriamnaam kan laak, tiah MNDAA (Kokant) nih thanh. Shan Ramkulh Chaklei ah Kokant ralkap MNDAA nih November 15 lio ah Ralhrang ruak le hriamnaam kan laak, tiah The Kokang Media nih an thanh.

Ralhrang phu No. 99 nih an hlonhtak mi anmah ralkap ruak pakhat, raikhamsii an chunh mi a sinak fehtertu cazin tibantuk zong ruak sin ah an hmuh.

Aluancia October 19 lio zong ah Ralhrang pawl an hriamnaam an laakpiak hna nak kong mahte khuakhan lairelnak nawlngei mi Kokant ralkap (MNDAA) nih an thanh.

Tamu Peng Uknak Zung riantuantu hna nih Tamu PDF ca ah Kyats sing 10 bawmhnak an pek. Sagaing Ramthen, Tamu Peng Uknak Zung ah rian a tuan lio i CDM a tuah lo mi pawl nih Tamu PDF ca ah tangka Kyats sing 10 bawmhnak an pek tiah theih a si.

Tamu PDF Battalion No. 1, No. 3 Company (Burma Student Organization) ca ah a herh mi hriamnam le kuanzeen cawk nakding ah nihin, November 16 ah bawmhnak an pek tiah theih a si.

Shwebo PDF nih Ngunkhuai Zung le Myawaddy Zung bomb an puah: Ralhraang palek pahnih an thi. Sagaing ramthen Shwebo khua um Ngunkhuai Zung le Myawaddy Bank cu November 16 ah Shwebo PDF nib bomb an puah hna i palek pahnih an thi tiah kan theih.

“Zinglei ah ralhraang pawl tangka a kawlpiaktu Shwebo Ngunkhuai Zung cu bomb kan puah. Cun chun ah ralhraang ta a si mi Myawaddy Bank a hngak mi palek buk ah bomb in kan cheh hna,” tiah Shwebo PDF chimnak nawlngeitu nih a chim.

Cu bomb puahnak ah Myawaddy Bank a hngak mi palek pahnih an thi tiah khuami nih an chim. Mizapi nih ralhraang zung he aa naihniamnak hmunhma ah umkal loding in Shwebo PDF nih ralrin peknak an tuah.

Mogok ah kahdohnak a chuak i ralhraang 15 an thi. Mandalay ramthen Mogok ah, November 15 zaanlei ah ralhraang le ပတ္တမြားမြေ PDF kar kahdohnak a chuak i ralhraang 15 an thi tiah kan theih.

“Zaanlei suimilaam 4:00 hrawng ah puahkeh thawng pehtlai in kan theih. Khua he aa hlaat pah caah kan va zoh ngam lo. Kap hnih i kah thawng zong kan theih. Rlahraang pawl zong motor le cycle in an kal ka hmuh,” tiah tualchung mi pakhat nih a chim.

Ralhraang le ပတ္တမြားမြေ PDF cu suimilaam pakhat leng kahdohnak a chuah hnu ah ralhraang 15 an thi tiah Moegok PDF nih an thanh. Kaphnih kahdohnak ah ပတ္တမြားမြေ PDF hliamtuar an um lo tiah kan theih.