Thawngpang Chia Fonh!
======================
June 11, zan suimilam 9:00 tluk ah Karen ramkulh Hpa-An peng Naungkyan khua motor lampi pawng ah a ummi inn pakhat cung ah hriamngan tla in puahkehnak a chuak pa pakhat nunnak liam tiah kan theih. Nunak liammi pa hi Yangon ramṭhen Khayit khua ah khuasa mi U Zaw Myin Htun kum 42 mi Yangon in a rak tlawng mi si in kir a timh lai zan ah a tu bantuk in thil a can hi si tiah an langhter.
Cu bantuk ṭhiam in June 12, ah Karen ramkulh Yin-Yea peng Hnitkayin khua ah hriamngan kahnak in nu pakhat Than Aye nunnak a liam pa pakhat hliam tuar tiah kan theih. Cu bantuk ṭhiam in a luan cia June 9, zanlei sang ah khan Karen ramkulh Kamain-Kone khua chung hriamngan voihnih tlaknak in nu pakhat le pa pahnih hliamfak an tuar tiah an langhter.
Shan ramkulh thlanglei, Mobye peng ah May 25 in SAC ralkap le Karenni ralkap phufonh kar kahdohnak fakngai in a chuak. May 25 in June 12 tiang kahdohnak ruang ah ngakchia 3 telh in tualchung mi 35 nak tlawmlo an nunnak a liam, tiah Karenni nuhrin covo lei rianṭuantu phu nih an chim.
Nunnak liam mi hna chung ah hin pa 20 leng le nu 10 leng pin ah kum 18 ngakchia pakhat, kum 13 le kum 8 tluk lawng a si mi ngakchia zong an i tel, tiah an chim. Nunnak liam mi hna hi hriamngan hliamhnak ruang ah le kahdohnak chung ah i hreng in kah a tong mi an si, tiah Karenni nuhrin covo lei rianṭuantu phu in director Ko Ba Ngyia nih a chim.
Mobye khuachung hmun kip ah SAC ralkap nih hmunhma an lak i, tualchung mipi an hmuh mi hna poh cu an tlaih i an hrem hna hnu ah an thah hna ruangah hliamhma tuar mi le nunnak a liam mi hna ruak zong lak ngam a si rih lo, tiah mi bawmchamtu phu chungtel Ma Nway Oo nih RFA ah a chim.
SAC ralkap hna nih Mobye sangchung lam cheukhat cu umkalnak nawl an phih i lampi lawng hmannak nawl an pek hna, tiah theih a si. Mobye peng kahdohnak ah hin kaphnih in a thi mi an um pin ah, tualchung mipi cheukhat cu chuak kho lo in aa hreng mi an um rih, tiah PKPF in ṭuanvo ngeitu pakhat nih a chim.
SAC ralkap nih uknak an lak 2021, February in 2023 June 12 tiang ah Mobye tualchung mi 50 leng nunnak a liam cang i, cu chung ah kum 18 tang ngakchia 13 an i tel, tiah PKPF nih an cazin chung ah an langhter. Mobye khuachung hi minung 30,000 tluk an umnak a si i, atu lio a cangmi kahdohnak ruang ah sang 10 in mipi tamdeuh cu a himnak hmun ah an tlizaam hna i, sang thum hrawng lawng ah minung tlawmpal an um, tiah tualchung mi hna nih an chim.
Tanintharyi ramṭhen Thayetchaung peng Yangyet khua pawng ah SAC ralhrang le mipi hriamtlai phu karlak ah kahdohnak a fak SAC ralhrang nih khuachung ah luh in inn an khangh hna tiah kan theih. June 11, i Thayetchaung peng mipi hriamtlai phu le SAC ralhrang karlak kahdohnak fakpi in a chuah hnu ah ralhrang nih Yangyet khua ah khuasaknak inn pakhat, sianginn le lakphakti dawr cu mei in an khangh tiah theih asi.
Cu bantuk ṭhiam in June 11, ah Thayetchaung peng Yangyet khua ah Ko Wa Yan Hein cu ralzam a nu hrang ah a harh mi si-ai la in a rak kir lei ah khua chung ah a thup mi SAC ralhrang nih an kahthah tiah Ko Wa Yan Hein a hawipa nih a chim. SAC ralhrang nih Ko Wa Yan Hein ruak hi a umnak inn hnu lei ah an chiah i tualchung mipi hna nih a hnu ah an lak i an vui tiah theih asi.