Kahdohnak Thawngpang Fong!
===============
Bago ramṭhen, Kyaukgyi peng chung ah a um mi Nattankwin palek sakhaan le SAC ralkap gate pawl kahdohnak ah SAC ralkap a thi mi an tam i meithal zuun 3 le kuanzen pawl an lak khawh leng ah SAC ralkap pawl phukhat le phukhat bawmhnak ah an hman mi hlei 3 zong an hrawh khawh tiah KNU nih June 8 ah a thanh. June 6 zinglei ah KNU kuttang KNLA phufonh le PDF hna nih Nattankwin palek sakhaan le Yedwinkone lanṭhen sakhaan, Nattankwin a hmailei gate le a hnulei gate, Bonethabaw sakhaan hna cu hmakhat te ah an kah hna i kahdohnak chung ah SAC lei 40 an thi, 12 hliam an tuar i KNU kuttang phufonh lei in 4 an nunnak a liam i 13 an i hliam ve tiah KNU nih a thanh.
https://l.facebook.com/l.php?u=https%3A%2F%2Fwp.me%2Fp9Xzdz-5KM%3Ffbclid%3DIwAR2nistLB3ChlFOJAWcv_1qUErF3bZcSWFrF4oRM3zC2oVj-L4b4BSt1CTM&h=AT1m14lzuGQYwVrvN4PRbl44Z9vu3Vh0zK3XiwVschbXTFMqUVJFOqG6k50MslBI4VixLxGyOfZiELLeb4Iram0mslg_JSZXKUtJeQ_D40s5BKFPa-nKGFl__CS2dd1uwE7I&__tn__=H-R&c[0]=AT0cZF8e2cdTwoPglNVJl6yAS5LpJR05l4mtAb2Y0BqmBiRIFTaxQB_PtK25g9GvrYmnjM5ndx2HIYA9p66fA_Os3Xoo-O4_tzzkHGgG4bCsLuPVGzuqI1z8PKTfAuFOdz_aNDqGcng4_S3ohYyQOx_MQpAsS4NPeg6nvJW7EGJreeFCC2rGOi0ZMaWODhHLA2YCXqdK54ie
KNU kuttang KNLA phufonh nih an hrawh mi hlei hna hi Kyaukgyi le Nattankwin khua karlak Sittang tiva cung ah an sak mi Nattankwin hlei, Ongnepin le Nanwepin karlak ah a um mi hlei, Thasi le Thasung karlak ah a um mi hlei hna an si tiah theih a si. Kahdohnak a chuahnak ni ah SAC nih vanlawng, Helicopter hna in voi 9 hrawng kahdohnak a tuah leng ah tuni (June tiang Siitang tiva ni tlaklei in ni chuahlei ah hriamngan a kah lengmang tiah KNU nih a thanh.
Cubantuk in hriamngan a kah ruang ah Kyaukgyi peng chung in khuami 4,500 leng himnak hmun ah an zaam leng ah Nattankwin hlei le Nattankwin palek sakhaan hna ah hmunhma a khuar ṭhan mi SAC ralkap nih palek sakhaan pawng um mi sang No 2, 3 le 6 hna cu hramhram in an chuahter hna tiah KNU nih a langhter. A luancia June 2 zong ah KNU kuttang KNLA phu pawl le PDF phufonh nih Karen ram, Kyanseikgyi khua ah a um mi SAC kuttang palek sakhaan le zung pawl an doh hna i SAC lei 10 hrawng an thi tiah NUG nih a thanh.
Karen ram, KNLA Brigade 5 hmunhma ah June 1 in June 3 tiang kahdohnak a chuak i SAC ralkap 5 an thi tiah KNU nih a langhter. June 3 zinglei sml 10:00am hrawng ah Mawphukyo ah hmunhma a khuar mi SAC ralkap pawl KNLA Brigade 5 kuttang pawl nih chikhat an va kah hna i 1 a thi tiah theih a si. Cubantuk in June 2 zinglei sml 11:00am hrawng ah SAC ralkap Khawpu sakhaan an kah ṭhan i SAC ralkap 1 a thi, chun sml 12:45pm in 2:11pm tiang Yokhu hmunhma ah a um mi Bisakhi sakhaan an kah ṭhan i SAC ralkap 1 a thi.
June 1 ah Luthaw peng, Buthu peng le Dwailu peng chung ah hmunhma khuar ding in sakhaan a rak ser mi SAC ralkap pawl voi 5 tiang an kah hna i SAC ralkap 2 an thi, 1 hliam a tuar. Ni 3 chung ah KNLA phu lei him tein an kir kho tiah KNU nih a langhter. Magway ramṭhen, Pakokku in Myaing ah riahcaw a phor mi SAC ralkap mawṭaw cu bomrap voi 3 an puah hnawh hna i mawṭaw 1 a rawk, Pyusawhtee 3 a hmun ah an thi tiah Myaing PDF nih an thanh.
June 7 chun sml 12:23pm hrawng ah Pakokku in Myaing lei ah riahcaw a phor mi SAC ralkap mawṭaw cu bom voi 3 an puah hnawh i riahcaw phor mawṭaw le SAC ralkap mawṭaw 1 bom nih a khen caah pakhat a rawk, SAC ralkap mawṭaw cung ah a um mi ralkap 3 hliam an tuar tiah theih a si. SAC ralkap mawṭaw bomrap puah hnawh an ton hnu ah Yelarlaynyaungjitpin khuate in pyusawhtee pawl lamkam ah bomrap thianh ding in an kal lio ah bomrap an puah hnawh hna i pyusawhtee 2 cu van ah an i hlerh, 3 a hmun ah an thi i an taksa aa varh dih caah a char in an char hna tiah an langhter.
Kahdohnak chung ah KMDF, Myaing PDF B01, Company 1, Company 2 hna fonh in kahdohnak an tuah hi a si i him tein an kir ṭhan kho tiah theih a si.
Sagaing ramṭhen, Kawlin peng ah ni 3 chung kahdohnak a chuak i SAC ralkap 2 an thi, 13 an i hliam tiah Kawlin PDF – KLPDF nih a thanh. June 2 in June 4 tiang PDF Kawlin Battalion 1 le SAC ralkap Infantry 363, Infantry 369 hna karlak ah kahdohnak a chuah hi a si i kahdohnak chung ah SAC ralkap 2 an thi, 13 hliam an tuar leng ah raltuknak thilri cheukhat zong an lak khawh tiah thawng theih a si.
May 27 ah Kawlin peng in a rak chuak mi SAC ralkap 70 hrawng cu Kawlin pengkomh B01 hmunhma chung ah a um mi Kyaukputu khuate an luh lio ah B01 nih an kah hna. June 4 ah ralkap phu 2 an i fonh i Ongpin khuate lei an kir lio ah B01 nih an kah ṭhan hna i hmai an fon khawh ti lo caah Ongpin khua ah an lut ṭhan tiah an langhter. Cu SAC ralkap pawl nih vanlei le hriamngan bawmhnak hal in hnu kir ṭhan an i tim tiah theihternak an tuah. Crd-The Chinland Post