Yargyi Tower Tung Sakhaan Yinmarbin Pengkomh PDF Phufonh Nih An Kah
============
Monywa-Yargyi-Kalewa lamcung, Yinmarbin pengkomh, Kani peng ah a um mi SAC ralkap sakhaan pakhat a si mi Yargyi Tower tung sakhaan cu PDF phufonh pawl nih an kahnak muicawl cu Yinnarbin pengkomh B01 nih an langhter.
Yinmarbin pengkomh B01 hruainak in Yinmarbin pengkomh B18, B24, B27 hna nih April 17 zinglei sml 7:00am hrawng in kah hram an thawk tiah an langhter. Kahdohnak chung ah SAC ralkap 30 leng an thi i meithal zuun 15, 60MM 1, hriamngan bom 100 leng, kuan 9,000 leng telh in hriam tampi an lak khawh tiah an thanh.
https://fb.watch/lg2tjZ93V1/
Naypyitaw, Lewe Palek Sakhaan Kahdohnak Ah Palek Bawi Telh In 4 An Thi; Naypyitaw, Lewe palek sakhaan le MICC 2 gate cu bom an puah hnawh hna i palek bawi telh in 4 an thi tiah Siitaung Guerrilla phu nih an thanh.
June 12 zaanlei sml 5:05pm hrawng ah Lewe palek sakhaan cu bom in an kah caah palek bawi 1, palek 1 an thi i 3 hliam an tuar tiah theih a si. Cubantuk in Zabuthiri peng ah a um mi SAC hruaitu Min Aung Hliang telh in ralkap pawl tonnak an tuah tawnnak hmun a si mi MICC 2 Hall an puah hnawh hna i 2 an thi 2 fak pi in an i hliam tiah theih a si.
Mindat Khua Luhnak Gate CDF Nih Voi 2 An Kah, SAC Ralkap A Thi Mi An Um; Chin ramkulh, Mindat khua ni chuahlei ah a um mi gate ah kahdohnak voi 2 an tuah i a thi mi an um tiah CDF-Mindat nih June 18 ah a thanh. June 11 kahdohnak ah SAC ralkap 2 an thi i June 13 ah an doh ṭhan hna i SAC chungtel 2 an i hliam tiah an langhter.
SAC ralkap nih June 18 ah khuachung ah meithal an thlah thlorh tiah theih a si. Cun June 17 zaanlei zong ah vanlawng 2 a rak zuang tiah theih a si. Crd; The Chinland Post