Kawkareik Peng Ah A Um Mi SAC Ralkap Hriamngan Umnak Le Battalion Pawl Kahdohnak Ah 8 An Thi
=============
Karen ram, Kawkareik peng ah a um mi SAC ralkap hriamngan umnak tlangbo le Battalion pawl an kah hna i 8 an thi, tampi an i hliam tiah Kyaphyu phu nih an thanh. Kawkareik peng ah a um mi SAC ralkap hriamngan pawl an sersiamnak Bawdikone cu June 24 zaanlei sml 4:30pm hrawng ah Kyaphyu phu Captain Puaidaw hruainak in Southern Eagle PDF, Kyaphyu C4, C5 (Justice Soldier) hna bawm in 60MM in an kah hna tiah theih a si.
Kahdohnak ruang ah SAC ralkap 3 an thi i 6 an i hliam tiah theih a si. Cun June 23 zinglei sml 11:00am hrawng ah Kyaphyu phu nih Kawkareik khua ah a um mi SAC Infantry 97 cu 60MM in an kah ṭhan hna i cozah rianṭuantu pawl an umnak tualchung a tlak caah 5 an thi i 7 an i hliam tiah theih a si. Kawkareik peng ah Kyaphyu phu, Naga Ni phu, Naga phyu phu, Dawna phu le SOF hna nih SAC ralkap Battalion, Sakhaan le tlangbo pawl an doh lengmang hna tiah theih a si.
Myinmu Palek Sakhaan le GAD Zung Federal Wings Drone Phu Nih An Doh Hna; Sagaing ramṭhen, Myinmu palek sakhaan le GAD zung hna cu June 24 zaan ah Drone in bom an thlak hna i palek sakhaan inn 2 le GAD zung inn 3 a rawk cikcek tiah Federal Wings nih an thanh.
Cubantuk Drone in an doh hna ruang ah SAC ralkap lei a hliam mi le a thi mi dirhmun a fiang in theih a si rih lo tiah an langhter. Cuka hmun palek sakhaan le GAD zung cu SAC ralkap pawl nih hmunhma an khuarnak a si i Drone Jammer pawl in an kulh dihnak hmunhma a si tiah an langhter.
Federal Wings Drone phu nih Sagaing ramṭhen chung ah June thla thawk in kahdohnak ah an i teltum i June 18 le June 19 ah Mandalay-Monywa lam pawng ah a um mi Nyaungbinwon palek sakhaan zong Drone in bom an rak thlak cang hna tiah theih a si.
Federal Wings phu cu Karen ram ah tlangcung hriamtlai phu pawl he bawm in kahdohnak an tuah bantuk in hmundang zong ah dothlennak phu pawl he bawm in kahdohnak an tuah thluahmah tiah theih a si. Crd; The Chinland Post