Karenni Ram Thlakhat Chung Kahdohnak Ah SAC Ralhrang 160 Leng An Thi, Tualchung Mi 25 Nunnak A Liam. Karenni ramkulh chung ah SAC ralhrang le ṭangṭi phu hna karlak thla khat chung kahdohnak ah ralhrang lei in 160nak tlawm lo an thi i SAC sakhan 3 zong kan laak khawh, tiah Karenni Nationalities Defence Force (KNDF) nih an thanh.
2024, February thla chung Karanni ramkulh, Loikaw peng, Shadaw peng, Bawlakhe peng le Pekon pengchung hna ah SAC ralhrang pawl le Karenni ralkap ṭangṭi phu hna karlak ah kahdohnak a chuak i Shadaw khuapi cu Karenni ralkap ṭangṭi phu hna nih tlamtling tein an laak khawh.
Shadaw khuapi kahdohnak ah SAC ralhrang Colonel, Lt.Col, Major, Deputy Chief pawl telh in 160nak tlawm lo an thi i ralhrang le an chungkhar pawl kan tlaih khih mi hna cu kan hren hna, tiah an langhter.
Cu pinah Thanlwin tive pawng, Karenni-Thailand ramri thluangthluan ah ummi SAC caah a biapi ngaimi an sakhan 3 cu ralhrang pawl nih an chuahtaak i an zaamtaak.
Bawlakhe le Ywathit khuapi karlak um SAC ralhrang meng 12 hmun sakhan pawng ah Karenni ralkap ṭangṭi phu hna le SAC ralhrang kar ah kahdohnak a chuak i SAC ralhrang sakhan cu tlamtling tein kan laak khawh pinah meithal zuun 12, hriamngan zuun 4 le hriamthil pawl zong kan laak chih khawh, tiah an thanh.
February hla khat chung ah SAC ralhrang nih thahnawnnak an tuah mi ruang ah tualchung mi 25nak tlawm lo an nunnak a liam i minung 42 nih hliamhma an tuar. Tualchung mi hna inn cheukhat zong an kaang i an rawk, tiah Karenni Nationalities Defence Force (KNDF) nih thawng an thanhmi ah an langhter chih. Lungmili Post