Khampat Khuapi Ah Mipi Hriamtlai Nih Ritnak Siivai A Zuartu 5 An Tlaih Hna
=========
Sagaing ramṭhen, Tamu peng, Khampat khuapi ah riatnak siivai bingrang a zuartu minung 5 hna cu May 7 ah CNO/CNDF, mipi palik hna nih an tlaih hna, tiah theih a si. Tlaihkhih a simi ritnak siivai bingrang cu 150 Gram a rit i, tangka in sing 30 man a si, tiah Zalen nih a langhter. Tlaihkhih a tongmi hna cu upadi ning in dantat an si lai, tiah an langhter chih.
CDF-Senthang In Salai Duh Len Hmung A Nunnak A Liam Ṭhan; Chin ramkulh, Hakha pengkomh, Senthang peng CDF-Senthang humhaknak hmunram chung um Khuapi khua cu SAC Ralhrang Nih May ni 8, zanlei suimilam 5:00 hrawng ah jet vanlawng in Bomb a thlak caah CDF-Senthang in (Assistant Secretary General) Salai Siang Cung Hnin a nunnak a liam i, minung 4 nih hliamhma an tuar, tiah kan theih.
Hliamhma a tuarmi hna chung in CDF-Senthang ralkap in Salai Duh Len Hmung cu May ni 9 zing thlopbul cuahmah in a um lio ah a nunnak a liam, tiah kan theih.
Ram le miphun caah nunnak a petu pasalṭha hna upatnak sangbik kan in pek hna.
Myitkyina Peng Ah Pafa Hna Tikhur Chungah Tlaknak In An Nunnak Liam; Kachin ramkulh, Myitkyina peng Lah-myaing khua ah May 9 zinglei ah a fapa cu tikhur chung ah a tla i a pa nih a va chanhnak ah an pahnih in an nunnak a liam tiah mibawmchan tu tuanvo ngei pakhat nih a chim.
” Zing suimilam 11 tluk ah thil a can hi a si, an tlak nak suimilam cheu hnu ah an nau nu pakhat nih zung ah phone an kan chawnh, kan va chanh hna tikah cun an nunnak a liam cang. Tikhur ti a um lo caah an ti kan tuah lai an ti nak a fa cu a tla i a pa nih a va chanh nak ah an pa hnih in an nunnak a liam. An tlak nak tikhur hi pe 40 in 60 kar tluk a thuk mi a si” tiah a cunglei upa nih a chim. A thi mi pafa hna hi a pa kum 40 leng le a fa pa kum 20 tluk an si. An ruak cu chungkhar duh ning tein an inn ah chiah an si.
Bangladesh Ralkap Nih Bawmmi (Laimi) Pathum An Thah Hna; 2023, May 8 ah Bangladesh ralkap nih Bawmmi (Laimi) minung pathum hna cu zohchia ngai in an thah hna caah kan unau Chin miphun hna nih kan temtuarnak hi rak kan theihpi ve uh, tiah Bawmmi (Laimi) cheukhat hna nih Lungmili Post ah thawng an thanh.
Thah a tongmi hna cu Nem Thang Bawm (Kum 35), Sang Lian Bawm (Kum 19) le Lal Lom Lian Bawm (Kum 25) hna an si i, dawr ah thilcawk dingin an kal lio ah Bangladesh ralkap nih an tlaih hna hnu ah atu bantukin an thahmi hna hi a si, tiah an langhter.
A liamcia April thla thawhṭhan ni zong ah Zurvarawng khuami minung 8 hrawng an kan thah cang. Atu thil a cangmi he hin sualnak ngeilo mipi sawhsawh an kan thah a voihnihnak a si cang, tiah Bawmmi (Laimi sinin) thawng kan theih.Credite; Lungmili Post