Breaking News; Min Aung Hliang Nih Tuanbia Thar A Tial!!

A Voi 30nak ASEAN Ram Tatmadaw Meithal Kah Zuamnak Ah Myanmar SAC Ralhrang Tatmadaw Ralkap Phu Hna Nih Laksawng 32 An Hmu!!
===========================
Vietnam ram Sikpar ni 4 in ni 11 tiang tuah mi a voi 30 nak ASEAN National Army (Army) meithal kah zuamnak ah Myanmar ralkap methal kah zuamtu phu hna nih Gold seal laksawng 12, Silver medal laksawng 12 le Bronze medal laksawng 8 telin laksawng 32 an hmu, tiah theih a si. Cu pinah laksawng a hmu mi ram hna chung zongah a pa 4nak ah an dir ii Pistol kah zuamnak ralkap Pa phu, Pistol kah zuamnak Nu ralkap phu, Carbine Nu rakkap phu, Rifle Pa ralkap phu le Machine meithal ralkap phu hna cu, cu meithal kah zuaknak ah an i zuam hna, tiah theih a si.

Zuam nak an ngeih hnu No. (A hmat) peek zuamnak ah Gold medal laksawng pa 6, Silver medal laksawng pa 6, ထိလဲပြာား ( kah zuamnak) ah Gold medal laksawng pa 6 le Bronze medal laksawng pa 4 an hmu, tiah theih asi. Meithal kah zuamnak ah top (1) cu Vietnam ram an si ii, Indonesian pa 2nak , Philippines pa 3nak an si ii Laos le Myanmar ralkap hhna cu level khat ah an dir veve ko nian Rifle kah zuamnak mark (a hmak) peek zuamnak (1) ah Myanmar ralkap phu hna cu a hmak fonh 335.14 ahmu ii Laos 220.05 an hmuh caah Myanmar ralkap cu a pa 4nak ah an i tel, tiah theih a si.

Myanmar SAC ralhrang ralkap meithal kah zuamnak ah hruaitu cu Lieutenant Colonel Thein Soe Htun a si ii, Cu meithal kah zuamnak ah aa zuam mi a hruaimi le a ukmi ralkap phu hna cu an zapi in minung 42 an si hna tiah theih a si. Myanmar ralkap phu hna cu Sikpar ni 12 chunlai hrawngah Nay Pyi Daw Airport an rak phan tthan ii Myanmar ralkap hmunhimtu zungin Lieutenant General Than Htun Oo le Tatmadaw ralkap nawl ngeitu hna nih an va dawnn hna, tiah theih a si.

Yangon Ah Chin Pa Pakhat Cu Taxi Khaltu Nih A Velh Hnu Ah A Phaisa le Thilri A Firpiak! Yangon, Aungmingalar highway gate in Chin pa pakhat nih taxi a hlan i cu taxi khaltu pa nih Chin pa cu a velh hnu ah a phaisa le thilri a firpiak tiah theih a si. Cu phaisa chuh a tongmi Chin pa cu Mindat in ramdang kal ding ah Yangon a phanmi a si.

Taxi khaltu nih a velh i, a phaisa le thilri a chuh hnu ah lamka ah a chiahtak i, Chin pa cu lamkam ah zarhkhat chung a it. Bawmchantu phu nih an hmuh tikah Yangon Chin bawmchantu phu sinah bawmhnak an halpiak i khua ah an kirter ṭhan, tiah theih a si.

CDF-Hualngoram Nih LIANDO Hospital Honnak An Tuah, Chin ramkulh, Hualngoram ah , Hualngoram Peoples Organization CDF-Hualngoram nih tuah mi LIANDO Hospital honnak cu November 12 ah tluang te in an tuah khawh, tiah theih a si. LIANDO Hospital onnak ah hin HPO/CDF-Hualngoram hruaitu hna le Mizoram Lianpui khua in VC, YMA, MHIP, NGOs hruaitu hna nih an telpi hna i hruaitu hna nih biatawi chimnak an ngeih hna pin ah lawmhpinak ah Rs.5000 an pek hna.

LIANDO Hospital honnak a dih hnu in CDF-Hualngoram hriamnam thar a phan mi le mawṭaw thar an ngeih mi Pathian sin pek chanhnak zong an ngeih chih, tiah theih a si. LIANDO Hospital hi CDF-Hualngoram vennak in Ṭio kam ah hon a si i Mizaw ihkhun 8 le Operations khankhat a um, Mizaw zoh man laak a si lai lo. Mizaw a rak i zohtermi hna tu nih mahle sian tawk cio bawm chung ah chiah khawh a si. LIANDO Hospital hi Hualngoram mipi ca lawng siloin Mizoram lei mipi hna ca zong ah santlai ngai mi a si, tiah CDF-Hualngoram hruaitu pakhat nih cun a chim.

Kyaikmaraw Chaunghnakhua sakhaan cu KNLA le Red Dragon phu nih an kah, palek 4 le hriam an lak khawh, Mon ram, Kyaikmaraw peng, Chaunghnakhua palek sakhaan cu KNLA le Red Dragon phufonh nih an kah hna i palek 4 a nung in an tlaih hna, hriam zuun 7 le adang thilri pawl an lak khawh tiah Red Dragon phu nih a thanh.

Kyaikmaraw peng, Chuanghnakhua palek sakhaan cu KNLA phufonh le Red Dragon phu nih an kah hna i palek 3 an thi, 2 an zaam i 4 a nung in an tlaih hna leng ah hriam zong an lak khawh. Kahdohnak chung ah AK 47 zuun 1, M 16 zuun 4, G3 zuun 1, 60mm zuun 1, bomrap 2, AK 47 kuan 200, M16 kuan 500, G3 kuan 300 le 60mm kuan 10 hna an lak khawh tiah theih a si.

KNLA hruai mi hriamtlai phu pawl nih SAC sakhaan 3 an lak, KNU Brigade 3 hmunhma chung ah KNLA battalion 7 le 9 fonh in SAC Tanseik sakhaan, Bawkahta le Tungtanṭa sakhaan hna cu November 12 zinglei ah an lak khawh i SAC ralkap 11 an thi, hriam phun tampi, meithal phun 17 le kuan thong tampi an lak khawh tiah KNU nih a thanh.

SAC sakhaan 3 cu November 12 zinglei sml 4:00am ah an kah hna i zing sml 11:30am hrawng ah sakhaan 3 ning tein an lak khawh i him tein an kir kho. Tanseik sakhaan le Bawkahta sakhaan cu KNLA kekal phu nih an lak khawh i Tungtanṭa sakhaan cu KNLA Drone phu nih an hrawh khawh.

SAC sakhaan 3 cu an hrawh lio ah SAC ralhrang 11 an thi i hliam a tuar mi zong an tam tiah theih a si. SAC sakhaan chung in MA meithal zuun 8, kuan 3,070, 9mm zuun 2, 81mm kuan 68, 60mm a sau mi zuun 1, 60mm a tawi mi zuun 4, 60mm kuan 113, RPG 7 zuun 1, RPG 7 kuan 77, Grenade 28, Short Gun zuun 1, Short Gun kuan 88, M14 bomrap 10, adang bomrap 10, kuanbawm 27 le bomrap kawlnak seh 1 hna KNLA nih an lak khawh.

Sakhaan an thianh lio ah SAC nih vanlei in voi 20 hrawng an kah hna caah thilri a zapi tein an la kho lo tiah a langhter. SAC nih hramhram in uknak an lak hnu ah Brigade 3 hmunhma chung ah KNLA le KNDO nih SAC sakhaan 7 an hrawh khawh cang tiah theih a si.