Breaking News: Min Aung Hlaing Ralhrang Zung Pakhat A Khangh Than!

Yangon Khuapi Chung Mytel Zung Pakhat Ah Bomb Puak In Mei A Kang!
==========
Yangon ramthen Alung khuapi Kuan Caung lamah a ummi Mytel zungkhan pakhat cu Febuary (2) zinglei sml 5:00 hrawngah bomb pahnih a puah hnuah mei a kang tiah pawngkam ummi nih an chim. “Bomb pahnih a puah hnuah mei nih a kang. Nizan zongah hmun dangah mei a kang cang. Mei kanghnak pawngah SAC ralhrang an um caah mei thattu phu cu an phan colh kho i, an hmih khawh colh tiah an chim.

Kawlram mei thattu phu nih zinglei sml 5:00 hrawngah level (1) in mei thah an thawk i, sml 5:10 ah an hmih khawh tiah cathanh an chuah. Cu bantukin bomb puah in kahdohnak tuahtu cu Special Task Agency of Burma (STAB) nih kanmah tuahmi a si tiah cathanh an chuah.

Febuary (1) zanlei sang zongah Yangon ramthen Twin Tyi peng chung Mytel Tower hngaktu ralhrang hna cu bomb in an cheh hna caah kaphnih kahdohnak a chuak. Cupinah Yangon khuapi Daw Pung peng chung Ya Mung Nar sang (1), Aung Myitter lamah Mytel Tower hngaktu ralhrang hna cu Yangon pyauh kyar phu nih an kahdoh hna caah ralhrang pakhat nih fak ngaiin hliam a tuar.

Yangon Khuapi Chung Hmun Tampi Ah Thisen He Aa Lomi Thilsenmi Thuh In Duhlonak An Langhter! SAC ralhrang ralkap nih kahdohnak siseh runvennak chah taktakin an laaknak hmun Yangon khuapi chung hmun tampi ahcun mino hna nih Febuary (2) zanlei sangah thisen aa lomi thilsen thuh hratin duhlonak an langhter hi a si.

Mino hna nih Yangon University hmai, Yangon ramthen hluattaw innpi hmai, Gyih Myin Taing Pan Pin Gyi lam, Han Ta Wa Tyi Awaing Bus Stop, Tin Kaing Kyun Junction Ya Wa Na lamtonnak zawn, Ka Bar Ayi Kyaw hlei tang hna tibantuk ah thisen he aa lomi thilsen thuh hratin SAC ralhrang ralkap an ralchanh hi a si. Cu bantuk thisen he aa lomi thilsen thuh hratin duhlonak langhternak cu khuapi chung pyauh kyar kahdohnak tuahtu phu hruainak in an tuahmi a si tiah theih a si.

Tidim Khuapi Chungah Meithal Puah Thawng An Thei! Chin ramkulh Tidim khuapi palek sakhan leikap in Febuary (2) zaan sml 7:30 thawkin meithal puah thawng kan theih tiah khuami nih an chim.

Meithal puah thawng vawihra (10) leng an theih hnu zaan sml 8:00 in cun a dai ngai than. Febuary (1) chun sml 12:00 zongah hriamngan puah thawng kan theih ruangah khuapi chungum dawr ngeitu vialte zong nih an dawr an khar colh tiah theih a si.

January 31 zaan sml 7:40 hrawngah palek sakhan cu PDF-Zoland, CDM Siyin hna i fonhin an kah hna hnuin hriamngan hmangin an rak kah hna ruangah Tidim in meng 1/30 tluk a hlatnak khua Gaungmual khua chungum minung umnak inn pakhat cungah a tla nain a puah lo caah hliam tuarmi an um hna lo. Tlanglo an tuahmi zongah a puak rih lomi hruamngan kuanfang an hmuh tiah theih a si.

Kalaymyo Thlanglei Kahdohnak Ah Kalay-PDF Pahnih Nunnak Liam! Kalaymyo thlanglei sang Ta Ya Kung le Htu Ma karlak ah Febuary (2) chun sml 12:00 ah nawlngeihnak latu SAC ralhrang le Kalay PDF karlak Battalion (2) karlak suimilam (1) chung kahdohnak a chuak i, Kalay PDF leikap ah ကိုပြည့်စုံဦး le ကို သူရစီုး pahnih nunnak a liam tiah Kalay PDF nih cathanh an chuah.

Febuary 2 zinglei sml 5:00 Kalaymyo in SAC ralhrang ralkap motor (7) hna cu Kalaymyo in thlanglei sang Ta Ya Kung leikap ah an rak kal tikah Sii Ta khua le Nat Myaung khua karlak ah motor dir hratin an ke bakin Nat Chaung leikap ah an kal.

Kalaymyo PDF nih timhcia tein an chiahmi bomb (28) hna cu pehzulh in an puah hnawh hna tikah SAC ralhrang ralkap (30) tluk a khenh hna. Bomb puah hnawh an ton hnuin ralhrang ralkap nih hriamngan he hriamhme he pawngkam ah heh le hnik in an puah. SAC ralhrang ralkap hna cu bomb puah nakin hliam a tuartu hna cu motor cungah an thiar hna i, Nat Chaung leikap ah pehzulh in an kal chih.

Anmah bawmh dingin Kalaymyo in SAC ralhrang ralkap motor (5) cu Nat Chaung leikap ah an kal i, Kalaymyo Technology sianghleirun camp chung an phak zawnah motor dir hratin an ke in Ta Ya Kung khua leikap ah an kal than caah chun sml 12:00 ah Kalay PDF phu he sml 1:00 chung an i kap hna i, cuka ahcun Kalay PDF Battalion (2) i mipi ralkap pahnih nih ram le miphun caah an nunnak a liam hi a si tiah cathanh an chuahmi ahcun an langhter. Credit: The Federal Times