Breaking News; Min Aung Hlaing Ralhrang Phu Nih Thla 3 Chungah Mipi Ralkap Hna Thianh Dih Ding An I Tim!

Ralhrangbu Nih Thla 3 Chungah Mipi Ralkap Hna Thianh Dih Ding An I Tim
=======
Ramchung hmunkip ah a cawlcangmi mipi vengtu ralkap (PDF/CDF) hna cu thianh dih dingin ralhrang ralbawi hna cu nawlpek an si i thla 3 chungah lim khawh dingin an zumh.

A liamciami thla ah khan Deputy Commander-in-Chief Soe Win nih nawlpeknak pakhat a chuah. Cucu ramchung hmunkip ah a cawlcangmi PDF/CDF hna cu kawl i khuachung ah aa thupmi hna zong tlaih dih dingin nawlpeknak a si.

Cu nawlpeknak chungah aa telmi cu Rangoon, Sagaing, Magway, Chin ramkulh le Kaya ramkulh hna an si. Hi a cunglei ramthen le ramkulh hna hi ralhrang le mipi ralkap kahdohnak a fak i ralhrang tampi an thihnak a si.

Nawlngeihnak lak hnuin ralhrangbu duhlonak le dohnak a tuahtu hna tlaihkhih le thahnawnnak ruangah a chuakmi mipi nih hriamtlaih in tukdohnak daihter dingah ralhrangbu nih biatak tein aa zuam. Khatlei ah nawlngeihnak lakmi a cohlang lo i PDF bawmhnak a petu China ramri hrawng tlangcung hriamtlaitu hna he zong an i kah caah China cozah nih a ramri daihnak a rawk sual lai ti a phang.

Yunan ramkulh khuapi pakhat ah Myanmar lei in kahmi miakpi kuanfang pakhat le kuan dangdang an tlak caah China cozah nih August thla ah khan Myanmar cozah sinah lungtlinlonak ca an rak kuat bal cang. Shan ramkulh thlanglei i tlangcung hriamtlaibu chuekhat le ralhrang kahdohnak a um lioah China ramhcung i kuanfang a va tlak kha a si.

China cozah kuatmi ca chungah an ramchung i kuanfang a tlak ruang i an thinphannak le China-Myanmar ramri kong hnatlaknak an buarnak kong an tial. Ramri kiangkap ah a ummi China rammi hna nunnak le thilri caah tihnung a si caah kan ramchungah kuanfang a tlak than a si ahcun a herhning in dantatnak kan tuah lai tiah Myanmar cozah cu ralrin an pek fawn.

Cu kong cu Naypyidaw lei nih an theih tikah ralhrangbu upa hna nih ramri kahdohnak nih ramri daihnak a hnorsuang lai lo, PDF hna dohnak cu Myanmar ramhchung lawngah a si lai, mipi hriamtlaitu hna cu thla 3 chungah thianh dih an si ko lai tiah China cozah sinah amahkhan in lehnak an tuah tiah theih a si.

Fur a dihlei a si cang caah ralhrangbu nih Sagaing, Magway le Chin ramkulh hna ah ralhrang tampi a thlah chap. China cozah sinah ramri daihnak kong amahkhan in bia an chim cang bantukin cunglei hmunhma (Upper Myanmar) i a cawlcangmi mipi ralkap hna cu biatak thlak in a dohnak hi a si.

Ralhrang nih Chin ramkulh Thantlang khua inn 2000 renglo chungah inn 160 leng an khangh i cucu CDF nih an tuahmi a si tiah ralhrangbu nih an chim. Ralhrangbu nih Chin ramkulh ah an tuahmi sualnak cu US cozah nih fak piin a mawhchiat i ramkip nih ralhrangbu dantat cio dingin a forh hna. US cozah lawng si loin Norway, Sweden le tlangcung hriamtlaibu cheukhat hna zong nih Thantlang thilcang kongah ralhrangbu mawhchiatnak cathanh an chuah ve.

Ralhrangbu nih cun PDF/CDF chungtel le hruaitu hna tlaih dingin aa zuam chin lengmang. October donghlei ah Ko Jimmy tiah theihmi 88 siangngakchia hruaitu Ko Kyaw Min Yuh cu PDF le NUG karlak ah rian a tuan tiin an lunghrinh caah an tlaih. PDF le NUG cu ralhrangbu nih “ralhrangbu (terrorist)” tiah a chiahmi an si.

Ralhrangbu nih PDF/CDF hna cu an hram in coih dih aa tim ko nain kahdohnak ah ralhrang lei a thi le hliamtuar an tam caah an i timhmi bantukin an hluhchuah kho lai lo tiah zumh cio a si. Ralhrangbu nih a si te lai tiah a ruah bal lomi mipi hriamtlaih dohnak a tonmi hi zeitihmanh in a hmit (tei) kho lai tiah tiah ramkhel thiamsang hna nih an zumh.

NUG nih Sept 7 i D-Day a thanh hnuin ralhrangbu nih PDF/CDF kahdohnak an tuar chin lengmang. Ramchung ramleng bawmhnak in hriamnam tha tha, Sniper meithal le miakpi hna zong mipi ralkap nih an i tlaih khawh cang.

CDM a tuahmi ralbawi hna chimnak in ralhrangbu chungah pakhat le pakhat i zumh lonak, nawl i zulhlonak le lungtlinlonak a karh chin lengmang ti theih a si. Dinh caan hmu loin ralram ah a kalmi ralhrang hna cu an taksa a ba i an thinlung a zaw tuk cang, tiah CDMer ralbawi hna nih an chim.

Cucaah cun ralhrangbu nih an i timh bantukin thla 3 chungah mipi ralkap hna thianh dih ding timi cu si khawh dawh a si lo. Anmah tu hi a hla lomi kan hmailei caan ah khin an sung lai, an rawk lai i an tuhmi an zun lai. By. Salai CP Lian

Note: The Irrawaddy News i Mirang holh in tialmi “Myanmar Junta Aims to Wipe Out Armed Resistance in Three Month” kha ka lehmi a si. A herh lem lo ka timi zawn ka hlonh.