Breaking News; Min Aung HLaing Ralhrang Faktukin An Sungh!

Breaking News; Min Aung HLaing Ralhrang Faktukin An Sungh!
=======
Sagaing ramthen Pale peng chung Ing Pin khua ah January 30 ah a chuakmi kahdohnak ah SAC ralhrang ralkap faktukin an sunghnak video record cu mipi vengtu PDF nih an post. SAC ralhrang nih Buesawtyi hna cu raltuk ningcang an cawnpiaknak caan karlak sakhan cu Pale peng chung mipi ralkap ပ.က.ဖ phu le PRA 28, 23, PPDG le Pale Joker phu i fonh in an kahdoh tiah theih a si.

Cu kahdohnak ahcun SAC ralhrang ralkap faktukin an sungh pinah kharkhumh an ton ruangah raltuknak vanlawng pahnih hmangin an rak bawmh tiah theih a si. Cu kahdohnak ahcun SAC ralhrang ralkap leikap ah a thimi le hliammi an tam ngaingai tiah PRA nih cathanh an chuah.

Kani Ah SAC Ralhrang Ralkap Tilawng Pawl Cu Vawithum Bak Kah An Tong, Ralhrang (30) Nak Tam An Thi! Sagaing ramthen Kani peng chung Kin khua pawngah umnak sakhan tuahtu SAC ralhrang tilawngpawl cu PDF fonhmi phu nih January 31 ah kulh hnawh in an kahdoh hna caah ralhrang (30) nak tam an thi tah People’s Defense Force (Kani) nih an langhter.

Cu SAC ralhrang ralkap tilawngpawl cu Ma Hu Ya Na Ga Kani PDF Battalion, M&K The Boys phu le anmah lei mipi vengtu ralkap telh in an hawile phu he i fonh hratin an kah tiah theih a si. Cu bantukin SAC ralhrang ralkap tilawngpawl kahdoh an ton ruangah Pha Let Khun (2) bak an rawh caah SAC ralhrang ralkap (30) nak tam an thihnak a si tiah People’s Denfese Force (Kani) nih cathanh a chuah.

Cu SAC ralhrang ralkap tilawngpawl cu Brigate 101 phu an si i, January 29 ah Kani peng chung Kin khuami minung (6) cu an tlaih hna hnuah January 31 ni ah kum 58 minung mipa ruak pakhat lawng an hmuh hna i, a dang mipa (4) le nu (1) hna cu nihin ni tiang an tlau tiah cathanh an chuahmi ahcun an langhter.

Ayardaw Ah A Ummi Buesawtyi Sakhan Cu PDF Fonhmi Phu Nih Luhhnawh In Kah! Sagaing ramthen Ayardaw peng chung Ngui Dwin Gyi khua ah Buesawtyi sakhan cu PDF fonhmi phu nih an kah caah Buesawtyi le SAC ralhrang ralkap a tlawmbik (5) an thi tiah Ayardaw peng chung thawngzamhnak nih cathanh a chuah.

Kahdohnak caan cu January 31 chun lai ah Ngui Dwin Gyi khua ah sakhan tuahtu Buesawtyi le SAC ralhrang ralkap hna cu luhhnawh in an kah hi a si. SAC ralhrang ralkap nih taltuknak vanlawng hmangin Ayardaw thlenglei sangah kahdohnak an tuah lioah Ayardaw peng chungum nichuahlei sangah a ummi Ngui Dwin Gyi khua cu luhhnawh in kan kah tiah Ayardaw peng chung PDF chungtel pakhat nih a chim.

SAC ralhrang ralkap leikap ah a thimi hna chungin PDF fonhmi phu nih an kahmi hriamngan puah nak nih a khenhmi hna an um tiah an chim. Kum 2021 Dec 6 ah khan Ayardaw peng chung Buesawtyi thazaang thawnnak Ta Lee Bar khua cu ARA hruainak in PDF fonhmi phu nih luhhnawh in an kah nna caah Buesawtyi (6) bak an thi.

Tidim Khuapi Chungum Palek Sakhan Cu Mipi Ralkap Nih Luhhnawh In An Kah! Chin ramkulh Tidim khuapi ah January 31 ni ah daiziar tein um hratin duhlonak langhternak tuah lo dingin palek pawl nih thlerh khawnnak thawngthanhnak an tuah ruangah zaan sml 7:40 ah palek sakhan cu PDF Zoland, CDM (Siyin) i fonh in luhhnawh in an kah tiah anmah nih cathanh an chuah.

Cu kahdohnak ahcun zaan sml 8:18 ah hriamngan puah thawng vawikhat theih a si. Cupinah Kalaymyo khuapi in SAC ralhrang ralkap motor 20 leng cu Lairam ah an kai hna i, zanlei sml 4:00 hrawngah motor 10 hna cu Tidim khuapi chungah an lut tiah an chim. Khuapi chung luhnak zawnah meithal an puah len tiah an chim. Zanlei sml 4:00 lengah meithal puah pah in SAC ralhrang motor 10 leng an lut tiah Zalen nih a tial.

January 31 Ah Tamu Khuapi Chungah Covid Zawtnak Ngeimi Minung 49 Bak Hmuh Chap An Si! Sagaing ramthen Tamu khuapi ah January 31 ah covid zawtnak ngeih le ngeih lo minung 280 checking an tuah hna tikah minung 49 nih zawtnak hrik an ngei tiah theih a si.

January 31 ah sizung in a chuakmi minung 10 an um hna i, an thlop cuahmahmi minung 277 bak sizung ah an um rih. Tamu pengkomh Min Taa sizung ah covid zawtnak ngeitu minung 48 bak an um caah Tamu pengkomh chungah covid damlonak in mizaw 325 bak an um tiah theih a si.

Tamu khuapi ah covid zawtnak ngeitu hna cu pengkomh sizung, Min Taa sizung le အ.ထ.က (၁) le (၂) ah an thlop cuahmah hna tiah theih a si. Tamu khuapi ah zawtnak hnu bik i chawnh fawi bikmi (Omicron) zawtnak ngeitu minung 48 bak an um hna tiah January 28 ah khan SAC ralhrang kuttang ah a ummi ngandamnak zung nih cathanh an chuah. Credit: The Federal Times