Kanbalu Peng Ah Tualchung Mino Hna Cu Hramhram In Pyusawhti Ah An Luhter Hna!
=================
Sagaing ramṭhen, Kanbalu peng, Laikhto khuakomh, Inkyinsu khua ah SAC ralkap kuttang um Watawa hruai mi hriamtlai phu nih khuachung mino hna cu hramhram in pyusawhti ah an luhter hna, tiah tualchung mi nih Khit Thit Media ah an chim.
SAC ralkap kuttang um Watawa hruai mi pyituhsit phu nih Kanbalu peng, Inkyinsu khua cu pyusawhti khua ah canter ding in timhtuahnak an ngei. Khuachung ah inn hra uktu 23 an um i minung pakhat nih pyusawhti chungtel pakhat cio sawm ding in rian an khinh hna caah pyusawhti lut ding in cazin laknak le thimfung zuhnak an tuahter hna.
Pyusawhti lut ding in thim mi hna nih pyusawhti luh an duh lo a si ahcun Ks. sing 10 an liam lai, tiah SAC ralkap kuttang um hriamtlai phu hna nih an ti hna. SAC ralkap kuttang um pyituhsit phu hruaitu Watawa cu phungki thuam i hruk in SAC ralkap caah rianṭuan mi a si i, Kanbalu, Kyunhla le Taze pengchung ah biatak tein a cawlcang, tiah Khit Thit Media nih a ṭial.
Karenni le Thai ramri ah SAC ralkap le KNLA phufonh hna karlak ah June 13 thawk in June 16 tiang kahdohnak a chuak i SAC ralkap sakhaan 3 le Mese palek sakhaan hna KNLA phufonh nih an lak i Mese sakhaan ah KNLA phufonh pawl nih hmunhma an khuar khawh cang tiah Karenni kahdohnak lei rianngeitu nih Mizzima ah a chim.
“Mese sakhaan ah kan ralkap pawl an lut cang. Sakhaan 2 cu a tang rih. 14 sakhaan (BP-14 sakhaan, Metanwe sakhaan le Taunghla sakhaan hna cu kan lak khawh cang. Cun Mese sakhaan zong an thianh cang” tiah Karenni kahdohnak thawngzamh phu biachimnak nawl a ngeitu Khu Nge nih Mizzima ah a chim.
Kahdohnak pawl chung ah, June 14 ah SAC ralkap 7 cu Thai ram lei ah hriam he an zaam tiah kahdohnak chung i Commander pakhat sin in thawng kan theih tiah a chim. Kahdohnak ruang ah Thai ram lei a zaam mi SAC kuttang cozah rianṭuantu pawl, palek chungkhar pawl zong an i tel tiah theih a si.
“7 hi cu a fiang. Kahdohnak a chuah hnu an sakhaan kan va kai tik ah an luat ti lai lo ti aa thei mi pawl an si lai. Khoika dah an um cang ti zong kan thei ti hna lo. Thai lei an phan tiah thawngpang cu kan theih. Cuka hmunhma hrawng khuami hna cu Thai ram lei an zaam dih cang. Palek chungkhar zong an i tel. Mese G.M zong aa tel” tiah a chim.
Kahdohnak chung ah SAC Metanwe sakhaan in 120MM 2, Taunghla sakhaan in 60MM 2, Type 81 meithal zuun 1, a sau mi 1 le kuan pawl an lak khawh tiah Karenni kahdohnak lei thawngzamh phu biachimnak nawl a ngeitu nih Mizzima ah a chim.
Kahdohnak chung in SAC ralkap a nung in an tlaih mi hna an um bantuk in a thi mi zong a um nain cazin a fiang in theih a si rih lo tiah a chim.
“Metanwe sakhaan ah hriamngan 2 a um. A pahnih ning tein kan lak khawh. Cun Taunghla sakhaan in 60MM 2 le 81 a tawi mi 1 le a sau mi 1 kan ngah. Kuan cu tam lak kan lak khawh. SAC ralkap a nung in kan tlaih mi hna zong an um. A cheukhat an thi. A fiang in kan thei rih lo” tiah a chim. Kahdohnak aa thawk ni June 13 in June 15 tiang chun ah SAC nih vanlawng in a rak hlat i kahdohnak zong a tuah tiah theih a si.