Thla 6 Chung Ah $ 5million (Nuai 5) Leng Man Hriamnam Cu SAC Nih India Sin In A Cawk
===============
Thla 6 chungah India nih SAC sinah US dollar nuai 5 leng man hriamnam le zen-kuan a zuarh, tiah Justice For Myanmar (JFM) nih an langhter. 2022 November thla in 2023 April thla tiang (thla 6) chung ah India ram Bharat Electronics Limited (BEL) Company nih ralhriam lei fimnak le hriamnam thilri hna cu SAC a zuarh, tiah theih a si.
India Company nih SAC a zuarhmi lakah radio seh le radar he aa pehtlaimi thilri le ralram i hmanmi pehtlaihnak seh hna an i tel. Cu pin ah SAC ti ralkap submarine le battleship ca ah a biapi ngai mi catlap(documents) hna zong an i tel, tiah Justice For Myanmar (JFM) nih cun an langhter.
India nih SAC sinah voi 6 hrawng cu hriamnam a kuat cang i voi 3 hi SAC kut ah a kuat. Voi 3 hi SAC he aa pehtlaimi Company sinah a kuat, tiah theih a si. Rammi a thattu SAC bawmtu India cu SAC nih sualnak a tuahmi cungah teltumnak a ngei tluk a si ve, tiah Justice For Myanmar (JFM) nih cun an langhter.
Magway ramṭhen, Seikphyu peng, Seikphyu-Saw lam ah SAC ralkap pawl ni 2 chung pehzulh in bomrap an puah hnawh hna i SAC ralkap 20 an thi, 30 nak tlawm lo an i hliam tiah NUG Ministry of Defense nih a thanh. June 20 zinglei sml 7:50am hrawng ah Seikphyu peng, Seikphyu in Saw lam lei ah a kal mi SAC ralkap 30 hrawng nih an i cit mi mawṭaw 1 cu Thapyay khuate le Yekyaw khuate karlak ah bomrap lung 4 an puah hnawh hna i SAC ralkap 3 an thi, fak ngai in hliam a tuar mi 20 leng an um tiah an langhter.
June 20 ṭhiamṭhiam, zinglei sml 9:00am hrawng ah Thapyayaye khuate le Yekyaw khuate karlak ah a rak lut mi SAC ralkap mawṭaw 1 bomrap in an puah hnawh ṭhan hna caah SAC ralkap 2 an thi, 5 hliam an tuar tiah theih a si.
Kahdohnak chung ah Pakokku pengkomh PDF B04, C 1 le Seikphyu peng PDF hna bawm in an tuah.
Cubantuk in June 21 chun sml 11:00am hrawng ah bomrap ruang ah a thi mi SAC ralkap pawl rak phor ding in a rak lut mi SAC ralkap mawṭaw 1 bomrap an puah hnawh ṭhan hna caah an mawṭaw a rawk i SAC ralkap 15 an thi, 5 hrawng hliam tiah theih a si. Ni 2 chung bom puah hnawhnak ah SAC ralkap 20 an thi, 30 nak tlawm lo an i hliam. PDF phu pawl him tein an kir kho tiah NUG Ministers of Defense nih a thanh.
KNU Brigade 6 hmunhma May thla chung ah kahdohnak voi 31 a chuak tiah KNU nih a thanh. KNLA, KNDO phufonh hna le SAC ralkap karlak May thla chung kahdohnak ah SAC lei 46 an thi i 40 an i hliam tiah an langhter. SAC chungtel 3 zong a nung in an tlaih hna tiah theih a si.
May thla chung kahdohnak ah KNLA phufonh lei in 1 a nunnak a liam i 5 hliam an tuar tiah an thanh.
SAC ralkap nih May thlachung Dupala pengkomh ah vanlei kahdohnak voi 5 a tuah i hriamngan voi 102 an thlah tiah theih a si.
SAC ralkap hriamngan ruang le kahdohnak ruang ah Dupala pengkomh chung mipi 3 an thi i hngakchia 1 telh in minung 17 an i hliam tiah theih a si. Dupala pengkomh chung ah ralzaam 22,000 leng an um i fur caan a phanh cang lai caah eidin le ngandamnak lei sii hna an herh ko tiah theihternak an tuah.