Min Aung Hlaing Fapa Sizung Saknak Ding Ah Pyin Oo Lwin Khuapi Inn 1,200 Hrawh Dingin SAC Nih Nawl A Chuah
=========
Pyin Oo Lwin peng, Taung yatanar sang cu SAC ralhrang nih May ni 8 ah hramhram in hrawh dih ding in nawl an chuah caah sangmi mipi hna nih anmah te in an inn an hrawh dih hna, tiah tualchung mipi nih an langhter. Taung yatanar sang cu an dirhnak kum 40 lengkai a rau cang i, hrawh ter an sinak a ruang bik cu Myin Aung Hlaing fapa sizung saknak ding caah a si, tiah tualchung mipi nih an chim.
“May ni 5 lio ah a voi khatnak hrawh ding in nawl an chuah lio ah SAC ralhrang bawi le a kuttang hna cu motor 2 he a rak ra i, hrawhpiak nan si tik ah vuivai lo le lehrulhnak tuah lo dingin mipi chimhchnawhnak a rak tuah hna. Cu hnu ah SAC ralhrang motor pakhat in a rak ra ṭhan i, hrawhpiak nan si ṭhan lei lo ti ah an au nain May ni 8 ah an hrawh ṭhan hna, SAC ralhrang pawl zeihmanh zumhawk an tlak lo, mipi dehhlen lawng an rian” tiah tualchungmi pakhat nih Khit Thit Media ah a chim.
Taung yatanar sang hi inn 1,200 leng a umnak sang a si, Gram inn pawl le Meter Box tampi a hmumi inn zong an tampi, atu cu mah inn cio hrawhdih a si caah mipi hna harsatnak phunkip kan tuar, tiah tualchung mipi nih an langhter.
Academy Laksawng Peknak Puai In An Tlunlei Ah Lemcang U Aung Thar Motor Cung Ah A Thi; May 6 Naypyidaw ah tuah mi Academy laksawng peknak puai ah a kal mi lemcang U Aung Thar cu Yangon an kir lei motor cung ah ruah lo piin a thi tiah kan theih. May 7 zinglei suimilam 8 tluk ah a thih hi a si. “Motor cung an kai ka ah ka ba tuk tiin a chim lengmang, tlawmpal ah bawmchan tu sii lei riantuan an phak tik ah cun a nunnak a liam cang” tiah lemcang pakhat nih a chim.
“May 6 zan ah a paw that pah lo caah ekinn ah a kal, a kum zong upa a si cang, a chungkhar zong kan pehtlaih khawh cang hna” tiah a cunglei upa nih a chim. U Aung Thar cu nupi ngei lo in a u nu he Shwepyithar khua ah a um mi an si, a mah cu kum 74 a si ah a tubantuk in a thih hi a si.
Naung-kyiai Palik Sakhan Drone Bomb An Thlak Caah SAC Ralhrang 3 An Thi; 12 Hliam An Tuar; Sagaing ramthen, Naung-,kyiai (နောင်ကြီးအိုင်) palik sakhan cu Drone Bomb in an thlak hnawh hna caah SAC ralhrang 3 an thi i 12 nak tlawm lo hliam an tuar tiah PDF- Zero Battalion-7 tuanvo ngeitu pakhat nih a chim. SAC ralhrang thazaang 30 tluk umhmun an khuarnak palik sakhan cu May 3 zanlei suimilam 3 tluk ah Drone Bomb 4 in an thlak hnawh hna hi a si.
“Bomb kan thlak hnawh mi nih an um nak inn dingteo in a khen caah inn cung di zong aa rawk dih, hi inn ah hin Drone rawk nak seh (Jammer)an chiah mi zong a rawk chih. Bomb kan thlak hna tlawmbal in nan kan bawm lai lo maw tiah ralhrang pawl cu an au len” tiah a cung lei PDF upa nih a chim.
“Kahdohnak kan tuah lio ah SAC ralhrang cu an cawl ngam lo, meithal zun 5 tluk lawng an puah i dai tein an um” tiah a chim chap. Aluan cia April 16 lio zongah Min-mu peng Toll gate pakhat ah PDF ralthuam aa hruk mi SAC ralhrang pawl cu PDF Zero Battalion-7 nih kuthlonh bomb in an rak doh bal hna tiah kan theih. Credite;Lungmili Post.