Gangaw peng ah SAC ralhraang nih Pyosawhtee lut ding in an hneek hna caah khuami dihlak an zaam
==========
Magwe ramthen, Gangaw peng ah SAC ralhraang nih Pyosawhtee ah luh ding in an hneek hna caah a rak zaam mi Taung Khinyan khuami hna dor nakding ah ABSDF nih deu an sakpiak hna tiah Khit Thit Media nih a tial.
ABSDF B-12 battalion, Yaw le tualchung PDF pawl i bawm in Gangaw peng Taung Khinyan khua Palek Sakhan cu May 25 ah kah hram an thawk. Cu hnu cun SAC ralhraang nih inn khat ah pakhat Pyosawhtee ah nan lut hrimhrim lai tiah hramhram in an hneek hna caah khuami hna cu khua chuah taak in an zaam tiah theih a si.
Taungkhinyan Palek Sakhan nih khuami hna cu meeting an auh hna i Pyosawhtee luh ding ah hramhram in an hneek hna. Atu ah Taungkhinyan khuami hna cu an khuapi ning in an zaam i minung a thong in an si tiah theih a si.
Mindat hrambunh SAC ralhraang battalion Commander Changtu sniper kahnak in a thi; Chin ramkulh, Mindat khua hrambunh SAC ralhraang battalion IB-274 ah Commander Changtu a si mi Major Soe Htet Paing Toe cu sniper kahnak in a thi tiah theih a si. Mindat le Kyaukhtu kar ah CDF-Mindat le tualchung rammi ralkap phu komh hna nih SAC ralhraang 200 hrawng cu May 28 thawk khan an kah hna i pehtlai in kahdohnak a um tiah theih a si.
May 31 kahdohnak ah rammi rungvengtu ralkap phu komh nih sniper in SAC ralhraang battalion Commander Changtu cu an kah i, ralhraang pawl nih IB-274 Battalion chung ah a ruak thlahnak caan tawi an tuah tiah theih a si. Sniper kahnak in a thi mi Major Soe Htet Paing Toe cu Mindat hrambunh SAC ralhraang battalion IB-274 ah Commander Changtu (2iC) rian a tlai mi a si tiah kan theih.
ZFU/PDF Zoland nih a Voi 10nak Ralkap Training an lim; ZFU/PDF Zoland nih a tuah mi A Voi 10nak Ralkap Training limnak cu 2023 May 27 ah tlamtling tein an tuah khawh i ZFU Deparment pawl a si mi Fimcawnnak, Ngandamnak le Palek lei in tuanvo ngeitu hna an i tel kho tiah theih a si.
KNDF nih SAC ralkap thong khat leng an thah cang hna; Kum hnih chung ah SAC ralkap 1000 leng kan thah khawh hna i dohthlengtu ralkap 153 nih ram ca ah an nunnak an pek tiah Karenni Nationalities Defense Force (KNDF) nih nihin ah an tuah mi ralkap phu dirh kum hnih tlinnak ni ah an thanh.
Cu chung ah cun SAC ralkap he voi 1000 leng kan i kap i hriamnam 600 leng kan laak khawh pin ah SAC ralkap camp hme 10 kan laak khawh tiah an thanh. Kahdohnak ah hma a pu mi KNDF ralkap 75 pum tlinglo an um tiah an langhter.
“Kannih KNDF battalion pawl kan i tawlrel ning, hriamnam serchuahnak le cawknak lei kan thangcho. Kan ralkap pawl raal lei thiamnak le technology hman thiamnak zong a thangcho ngai. Raal pawl an tha dernak le kanmah lei thazaang thawnnak kan hngalh khawh i kan i siamremh khawh ahcun caan sau raltuknak ah teinak kan hmuh chin lengmang lai ti ka zumh,” tiah KNDF Hruaitu Khun Be Du nih a chim.
Hi caan chung ah Karenni National Progressive Party/Karenni Army (KNPP/KA) nih a kan hruai i, KNU/KNLA sin zong in ralkap training le raal lei thiamnak kan hmuh. Myanmar ram Chaklei ttangtti phu thum a si mi MNDAA, TNLA le AA hna sin in hriamnam, kuanzen lei raal lei bawmhnak kan hmuh ti zong an langhter. KNDF cu 2021 May 31 ah Karenni ramkulh pumpi ah battalion 22 ah then in dirh mi SAC a dohtu hriamtlai phu a si tiah kah theih. Credite; The Hakha Post