Manipur Ramkulh Meitei le Tlangcung Mi Buainak Ah Tlangcung Mi Chung In Minung 44 An Thi Cang!
===========
India ram, Manipur ramkulh chung i Meitei miphun le tlangcung mi(Kuki-Chin-Mizo) buainak he pehtlai in tlangcung mi hna chung in minung 44 nunnak a liam cang, tiah Lamka khuapi ummi TV reporter pakhat Mang Taithul nih a chim.
May ni 3 in aa thawk mi Manipur ramchung ummi miphun pahnih hna buainak hi nihin tiang ah a dai kho rih lo i, Manipur ramchung ahcun internet line zong phih rih a si. Tlangcung mi umnak hmun cheukhat ahcun meithal in an i kap, tiah theih a si. Manipur ramchung buainak a zual peng caah Mizoram lei ah mi tampi an zaam i, Mah umnak hmun a chuahtak mi tlangcung mi dihlak hi minung 20,000 hrawng an si cang, tiah TV reporter Mang Taithul nih cun a chim.
“Nunnak a liam mi fehter mi 44 pinah fehter rih lomi 50 leng an um i, 195 hliam an pu. Biakinn 220 leng cu an khangh i, biaknak lei he aa pehtlai mi inn quarter le zung tibantuk 73 an kaang cang. Khuate 112 leng an khangh i, inntung in inn 4000 an kaang. A fiannak bik in kan chim ahcun Miphun chihmih(genocide) kan tong cuahmah,” tiah a chim.
Mang Taithul nih a chim ning ah, an miphun chungin cozah rian sang a tlai mi hna cu rian ṭhumhpiak an si i, Imphal khuapi i inn ṭhaṭha an sak mi hna zong Meitei miphun nih an hrawh dih. Manipur ramkulh khualipi Imphal lei zong ah an kal khawh ti lo tikah eidin an laknak lampi cu Mizoram lawng a si cang. Mizoram chung ahhin Manipur lei in a rak zaam mi hi minung 8000 leng an si cang.
Magyisu Khua A Khangtu SAC Ralkap Cu PDF Nih Bomb An Puahhnawh Hna I 10 Hrawng An Thi; May 25 zanlei suimilam 5:00 hrawng ah Mandalay ramṭhen, Magyisu khua a khangtu SAC ralkap le an motor cu Nabuaing(နဘူးအိုင်) in Myingyan lei kap kalnak lam ah Shwe Chanthar Guerrilla phu le Myingyan peng um khuate vengtu(Pah Kah Phah) hna nih bomb in an puahhnawh hna i ralkap 10 hrawng an thi. Hliamhma pumi zong an tam, tiah Shwe Chanthar Guerrilla in ṭuanvo ngeitu pakhat nih a chim.
Bomb kan puah dih in SAC ralkap pawl nih an au-khuan pah in an kan kah ve nain kanmah lei a thimi le hliamtuarmi kan um lo, tiah a chim chap. May 24 zinglei suimilam 2:00 hrawng ah SAC ralkap le pyusawhti nih Mangyisu khua cu an khangh pinah SAC ralkap nih an hrem hna ruangah a zaam kho lomi khuami pahnih zong innkaang lakah an kaang chih. Inn 250 hrawng a ummi ah inn 100 hrawng an kaang, tiah theih a si.
Yinmarbin Peng Bomb Puahhnawhnak Ah SAC Ralkap15 An Thi; Sagaing ramṭhen, Yinmarbin peng, Banbuai khua pawng ah rallam a sialmi SAC ralkap cu bomb in kan puahhnawh hna i ralkap 15 an thi, tiah Chindwin Tiger phu in ṭuanvo ngeitu pakhat nih a chim.
May 25 zing suimilam 8:00 hrawng ah Kani peng, Alaykyun khua in rallam a sialmi SAC ralkap 200 hrawng cu Banbuai khua pawng ah bomb lung 3 in kan puahhnawh hna i pyusawhti 5 an thi. Cu pinah banbuai khua in a chuakmi SAC ralkap le pyusawhti cu Banbuai khua pawng ah bomb lung 12 in kan puahhnawh ṭhan hna i 10 nak tlawm lo an thi, tiah an langter.
“Kan i timh ning ahcun bomb lung 60 tluk in puahhnawh kan timh hna nain ruah a sur caah bomb chungah ti a lutmi an um i an puak kho lo,” tiah Chindwin Tiger phu in ṭuanvo ngeitu nih cun a chim.
SAC ralkap le pyusawhti a thimi hna cu May 25 zanlei suimilam 3:30 hrawng ah Banbuai khua thlanhmun ah an vui hna. Cu kahdohnak ah cun Chindwin Tiger, Union Liberation Front le Bo Shanshia phu hna i bawm in an kah hna, tiah theih a si. Credite; The Chin Post