Breaking News; Khayan ah Pyu Saw Htee Lutlai ti mi pa meithal in an kah

Khayan ah Pyu Saw Htee Lutlai ti mi pa meithal in an kah
========
Khayan khua Pyu Saw Htee Lutlai ti in a min a thang mi U Myo Naing cu nihin October 13, chun ah Yangon ramthen, Khayan khua, Bo Tay lam ah meithal in an kah. “Myo Naing cu Pyu Saw Htee Chairman a si tiah an ti. Rian a tuan mi a zoh hna lio ah a hnulei in voi hnih an kah, a thi kho” tiin mithmutu pakhat nih Mizzima ah a chim.

Sang khuabawi 80% leng an chuak (or) chuahnak ca an chiahnak Khayan khua ah caan karlak mipi uktu bu cu an ser i Yangon ramthen chung ah ralhraang uknak a rawh biknak khua a si.

Ye-Oo peng ah dalaan nu pahnih thah an tong. Sagaing Ramthen, Ye-Oo Peng, Watphyu khuate ah Council ralhraang thawng petu le lamhmuh saktu nu pahnih cu Oct. 12 ah thah an tong.

A thi mi nu pahinh hi Watphyu khua in Mah Cho Cho Win le Mah Htay Lin an si i zahan zaan suimilaam 9:00 hrawng ah khan a ho ti hngalh lo mi bu pakhat nih an hruai hna i Nyaungnikan chaklei inn pakhat ah nam in an thah hna tiah khuami sin in kan theih.

“Watphyu khua hi a luan cia September thla ah Council ralkap nih an luh hnawh hna i inn nga an khanghpiak hna pin ah khuami minung pali an rak tlaih hna i atu tiang an chuak rih lo. Thong an tla. Cu lio ah cun atu nu pahnih nih hin lam an hmuhsak hna, kutdong sawh in mi an tlaihter hna” tiah khuami pakhat nih a chim.

Thah a tong mi nu pahnih hi August thla ah NLD mino pawl a tlaitu le a hremtu hna an hruaitu Ramthen Pyu Saw Htee Lutlai U Taung Htay i a far le pahnih an si tiah kan theih. Ye-Oo peng chungah Ralkap Council nih rian pek mi khuabawi le ralkap thawngpetu dalaan/ Pyu Saw Htee tiah ti mi minung pakua hrawng thah an tong cang tiah kan theih.

Kyaukpadaung khua Sinpin Zung Bomb voi li an puah. Mandalay ramthen Kyaukpadaung khua Sinpin Zung cu Oct. 12, zaanlei sml. 6:35 ah bomb voi li kan puah tiah Defence Force-Kyaukpadaung (KDF) nawlngeitu nih a chim. Zaanlei sml. 6:35 ah voi khat a puak i Council ralkap pawl an rak phanh ah voi thum a puak than.

A rawk mi le hliamtuar kan hngal kho rih lo. A pawng i a um mi an tlaih hna. Minung zeizat an tlaih hna ti cu kan hlathlai cuahmah lio a si tiah KDF nawlngeitu nih Mizzima news ah a chim. Council ralkap he tangti in mizapi hnahnawhnak a pe tu an si ca ah Sipin Zung cu bomb kan puahnak a si tiah KDF nih ca an chuah.

Mizapi nih Council ralkap he aa pehtlai mi hmunhma pawl cu a hlaat khawh chung hlaat in nan hrial lai tiah KDF nih ralrin peknak a thanh than. A luan cia Oct. 11 zong ahkhan Kyaukpadaung peng chung ah a um mi Mytel Tower zong PDF-KPG nih an rak hrawh cang.

PDF phu hnih i bawm in palek sakhan an kah i a tlawm bik ah palek pahnih an thi, panga nak tlawm lo hma an pu. Magwe ramthen Poh le Myaing peng karlak ah a um mi palek sakhan cu rammi ralkap phu hnih fonh nih an kah hna i palek pahnih an thi, hliam tuar tampi an um. PDF lei in pahnih hliam an tuar tiah anmah PDF lei in kan theih.

Oct. 12 zaan suimilaam 9:00 hrawng ah Myaing PDF le Poh North PDF phu hnih i fon in an kah hna hi a si. “Phuhnih fonh in Zepya khua lu tlangbo ah a um mi palek sakhan cu kan kah hna. Palek thazaang 25 hrawng lawng an um. kan kah hna i panga hrawng cu kan hliamh hna, pahnih cu an thi colh” tiah Myaing PDF in nawlngeitu pakhat nih Mizzima ah a chim.

Kan i kah chung hi minutes 45 hrawng a rau i kanmah PDF lei in pahnih hliam an tuar tiah a chim chap. “A hlan bamtuk in tumi (Lai meithal) lawng si lo in meithal tha pawl zong kan hmanchih khawh cang. Cun anmah nakin thazaang lei ah kan tam deuh.

A hnu cun mei an hmih dih. An sakhan mei in kan khangh lai kan ti lio ah an sakhan pawng tlangbo in a kan kah caah kan hnu ah kan kir thannak a si” tiah a chim. Palek nih an Sakhan an chuahtak i mei in kan khangh lio ah a pawng tlangbo in an kan kah nain hliamtuar um lo tein kan kir than kho, tiah Myaing PDF nih an facebook cahmai ah Oct 13 nithla in an taar. Credit: The Hakha Post, Mizzima