kadohnak Thawngpang Fonh!
================
Shan ramkulh, Mabein peng ah kahdohnak a chuak i SAC ralhrang nih jet vanlawng in bomb a thlak, tiah tualchungmi hna nih an chim. Tuzing, June 6 zing ah Mabein peng, Pyachaung khuapawng ah SAC ralhrang le Kachin ralkap KIA PDF ṭangṭi phufonh karlak ah kahdohnak a chuak i zinglei suimilam 11:00 tluk ah SAC ralhrang nih jet vanlawng in bomb a thlak, atu zong pehtlai in kahdohnak a chuak, tiah theih a si.
” Pyachaung khua pawng um Tuluk banhla cinnak dum No.1 le No.6 hna cu SAC ralhrang nih raltuknak vanlawng in bomb a thlak. A luancia June 1 in mahka lei hmun ah hin SAC ralhrang nih rallam an rak sial cang i tuzing ah kahdohnak a chuah hi a si, a rawkmi le a thimi kong ah thawngfiang kan thei kho rih lo” tiah min langhter a duh lomi tualchungmi pakhat nih Khit Thit ah a chim.
Shan ramkulh, Kokang hmunram ah Myanmar National Democratic Alliance Army(MNDAA) le SAC ralkap kar kahdohnak a chuak i, SAC ralkap 20 leng an thih pinah hriamnam le zen-kuan zeimawzat zong MNDAA lei nih an laak, tiah The Kokang nih an thanh. June 1 ah Kokang hmunram chung ah rallam a sialmi SAC ralkap 70 leng cu MNDAA Brigade 511 nih June 4 le 5 ah an kah hna. June 4 zinglei kahdohnak ah SAC ralkap motor 1 a rawh leng ah ralkap 4 an thi. Cun, zanlei suimilam 1:00 ah kahdohnak a chuak ṭhan i, SAC ralkap 8 an thi ṭhan.
June 5 ah MNDAA le SAC ralkap pawl cu an i kap ṭhan i ralkap 16 an thih pinah tam ngai hliamhma an pu. MNDAA lei zong in hliamhma pumi an um ve, tiah theih a si. MNDAA nih SAC ralkap seh meithal kuan 230, hriamngan kuan lung 3, bomb lung 1 telh in hriamnam le zen-kuan zeimawzat an laak, tiah Khit Thit Media nih a ṭial. Sagaing ramṭhen, Butalin peng hrambunh Zarmani PDF sakhan cu SAC ralkap nih nizan June 4 zanlei suimilam 3:00 hrawng ah an luhhnawh i, an khangh pinah PDF pathum nunnak a liam, tiah PDF in ṭuanvo ngeitu pakhat nih a chim.
SAC ralkap nih an thahmi PDF ralkap pathum cu Naing Oo(kum 29), Kyaw Zin Myo(kum 19) le Hmaing Gyi(kum 34) hna an si i, SAC ralkap 120 leng nih sakhan an luhhnawh lio ah an tlaih hna i an thah hna, tiah Zarmani hruaitu nih cun a chim. “Kan sakhan chung kan um lio ah ruah lo piin SAC ralkap nih hriamngan in an kan kah i kan sakhan cu an rak luhhnawh. Kah manhnak caan kan ngeih lo caah kan zaam dih. PDF pathum hi meithal kuan nih a khen hna caah an zaam kho ti lo,” tiah a chim chap.
Nunnak a liammi PDF pathum hna hi hriamnam serchuah lei ah kan bochan tuk mi hna an si. Meithal kan i kenmi dah ti lo cu sakhan chung a ummi thilri, zen-kuan le bomb zong zeihmanh kan la manh lo. An zate kyats sing 1,000 man hrawng a si lai, tiah Zarmani PDF hruaitu pa nih cun a chim. SAC ralkap nih PDF sakhan an khangh hnu nihin June 5 zinglei tiang ah SAC ralkap pawl cu sakhan pawngkam ah an um rih.
Sagaing ramṭhen, Kalaymyo peng, Shuhkintha (Phulmawi) khua um sianginn pakhat SAC ralhrang nih helicopter in a kah caah mipi 1 a nunnak liam i, 3 nih hliamhma an tuar, tiah CNO Upper Chindwin Refion- UCR in ṭuanvo ngeitu pakhat nih a chim. Nihin June 5, zinglei suimilam 10:30 tluk ah Kalay peng, Letchaung-Yarzagyo lampi um Shuhkintha khua le sianginn cu SAC ralhrang nih helicopter pakhat in minute 5 tluk chung a kah caah mipi pakhat a nunnak liam i, 4 nih hliamhma an tuar hi a si.
“Kalaymyo in a kaimi helicopter a si lai, minute 5 lawng a kah caan hi a rau i, cu hnu ah a kir colh. Kahdohnak zong a um lo, sianginn ah tonpumhnak an ngei ti a theih caah a rak kah hi a si, hriamngan zong in an kah hna, a rawkmi kong ah thawngfiang kan thei dih rih lo” tiah a cunglei upa nih a chim. Cu pinah chun suimilam 11:37 tluk ah Kalaymyo khuapi chung umhmun a khuarmi SAC ralhrang nih hriamngan voi khat an kah ṭhan caah mipi hna kan i ralrin a herh, tiah CNO Upper Chindwin Refion- UCR nih ralrin peknak an tuahchih.