Karen Ram Latt Khat Tlang Sakhaan Lakthannak Ding Ah SAC Nih Russia SU30 Fighter Jet Hman A Timh!
==========
Kanren ram Myawaddy peng ah a um mi latkhat tlang Sakhan cu SAC ralhrang nih lak ṭhan an duh caah nai te ah Russia sin in a cawk mi SU30 Fighter Jet hmang in biatak chuah ai tim than tiah Ayeyarwaddy Times sin in theih a si.
Cu hlan ahcun ralhrang nih hin Kachin, Karen, Chin, Karenni, Sagaing le Mayway hna ahhin Yak -130 fighter jet hi a hman deuh. A5 vanlawng zong a hman ve tawn. A5 hna hi cu Pilot nih a mawngh an tih pah cang mi a si. Yak -130 hi datsi a heu lo caah butget a tlawm i a hman lengmang nak hi a si.
Russia ser mi SU-30 hi US dollar 35 million hrawng man a si I SU 30 cu paruk cawk ding in lungtlin a rak si. 2022 ah khan ralhrang kut ah 2 a phan cang i Pilot zong tha tein SU 30 mawngh cawnter an si cang. “Vanlawng kahdohnak hi dothlennak ah a biapi bik biachahnak tuah khotu ding ah anmah ralhrang bawi pawl nih cun an ruah caah fak deuh in vanlawng kahdohnak a tuah lai zumh a si. Cucaah dothlennak a tuah mi mipi ralkap hna nih biatak deuh in ralrinnak ngeih a hau cang” tiah CDM ralbawi Major Zin Yaw nih a chim.
Karen ram, Myawaddy peng, Lat Khat tlang ah Operation a tuah mi SAC ralkap pawl kahdohnak ah Major pakhat, Captain pakhat telh in 15 an thi, hriam tampi an lak khawh tiah Cobra Column nih a thanh.
August 15 zinglei 3:00am thawk in Myawaddy lei in Latt Khat tlang lei ah SAC ralkap nih hriamngan an kah lengmang i vanlei bawmhnak he a rak kai mi SAC ralkap pawl cu Cobra Column phufonh nih an kah hna, Major pakhat, Captain pakhat telh in 15 an thi, 20 an i hliam tiah theih a si.
Kahdohnak chung ah SAC ralkap nih hriamngan voi 300 leng, kahdohnak Jet vanlawng in voi 3, Mi-35 Helicopter in voi 3 tiah kahdoh a bawmh hna tiah Cobra Column nih an rak langhter. SAC ralkap nih hriamngan voi tamtuk an kah ruang ah Tower tung le biaknak lei inn a rawh leng ah dothlennak phu chung in minung 2 an nunnak a liam i 5 an i hliam tiah Cobra Column nih thawng an rak thanh.
BGF Ralkap Pakhat Hriam He KNLA Sin Ah CDM A Tuah. BGF ralkap pakhat cu hriam he KNLA sin ah CDM a tuah tiah KNU nih thawng a thanh. August 17 ah BGF ralkap pakhat cu hriam he KNLA sin ah CDM a tuah hi a si i hramhram in mipi a uktu SAC kuttang ah rianṭuan a duh ti lo caah KNLA he fonh in hramhram uknak doh ṭhan ding in KNLA, Cobra Column sin ah aa fonh hi a si. CDM a tuah mi BGF ralkap pa nih M16 zuun 1, kuanbawm 5 le 5.56 kuan 150 aa rak chuahpi khawh caah Thai Baht 50,000 laksawng an pek tiah theih a si.
SAC Hruainak Kuttang Ah Riantuan Duh Ti Lo Mi Thlali Chung Ah CDM Ralkap 500 An Um. SAC Hruainak kuttang ah riantuan duh ti lo mi thlali chung ah CDM ralkap 500 nih SAC an chuahtak tiah NUG Prime Minister Mahn Win Khaing Tan nih a chim tiah Khit Thit media nih a langhter. August 22, National Union Government (NUG) cozah a voi 28nak meeting ah a chim hi a si.
Ralhrang SAC kuttang ah riantuan duh ti lo in a tli mi CDM ralkap cu August thla chung ah 50 leng an si cang, April in July thla 4 tiang cazin ah Battalion Commander lutlai chang Major 1 telh in ralkap 500 an si. Mah hmah cu kanmah he pehtlainak a tuah mi an si i pehtlainak a tuah rih lo mi zong an um rih ko tiah Minister Mahn Win Khaing Tan nih NUG cozah meeting ah a chim.
Nihin ah a lamkip in thazang a zor ngai mi SAC nih CDMer cozah riantuantu pawl cu ralkap tuanter ding in cazin an lak mi zoh tik ah SAC thazang an ngei ti lo hi a fiang ko cang caah Khuapau dohthlennak ah teinak thandar thlirnak caan a nai ko cang tiah a chim chap.
Nihin Kachin ramkulh le Shan ramkulh ahcun Myanmar ram pumpi ah nifatin in kahdohnak a um cang i, SAC ralkap an thazang a der ngai ruang ah Non-CDM pawl raltu ding in min cazin lak in cheukhat cu ralkap training an kai ter cuahmah lio a si tiah People Spring news nih a chim.
2022 April 18, SAC tang ah rianṭuan duh lo in a nuar mi (CDM) ralkap 10,000 deng an si cang tiah NUG Chief Minister Mahn Win Khaing Than nih April 18 ah tuah mi Hluttaw meeting ah a rak chim bal. Cun CDM tuah a duh ko nain, a ruang tampi ruang ah a tuah kho lo mi ralkap zong an um i, anmah sin in ralkap chung thawngpang pawl kan lak khawh tiah a chim fawn.
Raltuknak vanlawng pawl he CDM nan tuah a si ahcun sing thonghra, SAC nih hman mi vanlawng, Helicopter, thilphor vanlawng, raltuknak vanlawng hrawh khawh, tlak ding in tuah hram in CDM nan tuah a si ahcun sing thongruk laksawng pek nan si lai tiah NUG nih a rak thap.
Cun, SAC nih datsi an chiahnak, hriamnam an chiahnak nan hrawh khawh a si ahcun, asilole CDM nan luh lio ah tank, khamnak mawṭaw (Armor) nan rak i put khawh a si ahcun sing thonghnih laksawng pek nan si lai tiah a rak thanh. Credit: The Chinland Post