Thawngpang Chia Fonh!
===============
Magway ramthen Pakkuko peng PDF lutlai pakhat nih sualnak a tuah mi cu tuanvo lak duh lo in a nau le 7 he SAC ralhrang sin ah tangka sing thong leng he an zam tiah Pakkuko PDF nih May 26 ah thanhca an chuah. “Pakkuko peng PDF aiawh tu phu Defense Team Pakokku-DTP lutlai Aung Thu@Snak cu dothlennak thokka in aa cawlcang mi pakhat a si i tangka kan har tuk tiin SAC ralhrang he aa pehtlai mi hna sin ah tangka hal,
thil sining lo in a cawlcangh mi cu NUG cozah le ralkap phung le phai he kalh in rian a tuan caah tualchung mipi hriamtlai phu Pah-kah-phah le hriamtlai dang zong nih chimh cawn piak a si ko in a tauhsual nak kong cu tuanvo a lak duh lo caah a tubantuk in SAC ralhrang sin ah an zam hi a si.”tiah thanhca chuah mi ah an langh ter.
Defense Team Pakokku-DTP in Aung Thu cu May 25 ni ah amah hnu zul minung 3 he meithal zun 2, tangka sing 400 he an zam. Mah pin ah Aung Thu @Snake hlenthawi nak in Earthquake Defense Force-EDF phu in Arka Soe Myint, Win Min Aung, Myat Min, That Naing Oo tiin minung 4 hna zong meithal zun 2, tangka sing 2000 tluk he SAC ralhrang sin ah a zam pi chih hna tiah an langhter chih.
Earthquake Defense Force- EDF phu minung 4 hna cu Mission kan tuah lai tiin zinglei ah an chuak, Defense Team Pakokku- DTP phu in minung 3 hna zong zanlei sangah an chuak ve. An mah hna cu a tu lio ah Pakkuko SAC ralhrang tat-mah (တပ်မ) 101 pawngkam ah an um lai zumh a si” Pakkuko Pah-kah-phah tuanvo ngeitu pakhat nih a chim.
Atu bantuk in SAC ralhrang sin ah hriamnam le tangka tampi he a zam mi hna cu dantatnak tuah an si lai,Cun Pakkuko pengchung mipi hriamtlai PDF sakhan umnak hmunhma hna zong thawngpang a chuah khawh caah a rannak in sakhan i thialkam cio dingah thawngthanhnak an tuah chih.
Mandalay ramthen Ngazun peng TGYR- Youth Guerrilla Counter Revolution phu an sakhan cu SAC ralhrang nih May 26 ni ah an khangh piak hna caah sing za leng man sungh zatlaknak an tong tiah kan theih. Myaing peng SAC ralhrang sakhan in ralhrang 50 leng hna cu rallam sial pah in PDF pawl ralram an kal kar ah an khangh piak hna hi a si.
“PDF minung 20 leng cu Myaing peng ralram ah kan kal kar a si. Sakhan ah hin minung 8 lawng an um, Ralhrang lei nih caanrem ah i lak in an kan luhhnawh hi a si. Sakhan hngak minung 8 hna nih an phurh khawh tawk thilri cu phurh in an zam pi ve. A tangmi kuan, hriamnam hna cu kan sung ve, kan sungh mi hi a man in kan chim ah cun sing 150 man tluk a si lai.” tiah LPDF lutlai pakhat nih a chim.
“Mei an khangh mi chungah AK kuan 41, 5.56 kuan, Uniform, Phone, RT seh, Cycle 2, Bomb, ei din tirawl le thilri dangdang zong ralhrang nih an khangh chih dih.”tiah a cunglei upa nih a chim. Sakhan khanghpiak a tong mi TGYR – Youth Guerrilla Counter Revolution phu hna cu i sersiam thannak ding ah bawmh an herh lio a si tiah kan theih.
A luancia May 24 ah ram le Miphun caah nunnak a petu pasalṭha Ko Wijza ruak cu May 26 ah tlamtling te in kan vui khawh, tiah Loikaw-PDF nih May 17 ah thanhca an chuah. Ko Wijza hi kum 37 a si i, atu dothlennak caan chung ah hin hmunhma tampi kahdohnak ah aa telmi zong a si pin ah upat awk tlak in rian a ṭuantu zong a si.
Ram le miphun caah nunnak a petu pasalṭha Ko Wijza cu Loikaw-PDF nih upatnak sangbik kan in pek i, dothlennak kan hmuh hlan tiang peh zulh in kan rak ṭuan lai, tiah Loikaw-PDF nih cathanh an chuahmi ah an langhter chih.