Kalay Peng Thasi Khua pawng Kahdohnak Ah SAC Ralkap 30 Hrawng An Thi
===================
Sagaing ramṭhen, Kalaymyo thlanglei Thasi khua pawng ah June 25 ah khan SAC ralkap le PDF hna cu fak ngai in chunnitlak tluk an i kap i kahdohnak ah cun SAC ralkap 30 hrawng an thi, tiah Ranger Kalay Defence Force in ṭuanvo ngeitu pakhat nih nihin June 28 ah a chim.
June 25, zinglei suumilam 7:00 hrawng ah minung thazaang 120 hrawng he SAC ralkap hna cu Kalaymyo thlanglei in hmun thum ah rallam an sial i, hmundang um SAC ralkap hna zong nih Thasi lei ah hriamngan in kah an bawm hna. Rallam sialtu SAC ralkap le tualchung hriamtlai phu hna cu zinglei suimulam 9:00 in zaanlei suimilam 5:00 hrawng tiang fak ngai in an i kap, tiah theih a si.
Thasi khua hi SAC ralkap checkgate pahnih kar ah a ummi khuangan pakhat a si i Kalay-Gangaw lamkam ah a ummi a si.
Kahdohnak ah a thi mi SAC ralkap 30 hrawng pinah hliamhma tuarmi zong an tam. Kalaymyo Sanpiah lampi cung ummi no. 228 um ralkap, Taunghpilla tlangcung um ralkap le GTC sianginn chung i umhmun a khuar mi SAC ralkap hna nih kahdohnak a chuahnak hmun lei ah hriamngan an kah, tiah theih a si.
SAC ralkap hriamngan kahnak ruangah Thasi khua mi 2 hliamhma an pu i, tualchung hriamtlai phu lei hnu tolh an timh lio ah hriamngan tlaknak in CDF-KKG in ralkap 3 le mipi vengtu(pah kah phah) ralkap 1 hliam an tuar pinah CNDF-VAKOk in ralkap pakhat nunnak a liam.
Kahdohnak um loin Thasi khuachung ah nihin tiang SAC lei nih hriamngan an thlah i, a luancia ni tlawmpal zong ah SAC hriamngan kahnak ruangah khua mi kum hnih tluk ngakchia pakhat cu a nunnak a liam i midang 3 hliamhma an tuar pinah innzuat saṭil hna zong an thi, tiah Ranger Kalay Defend Force nih an thanh.
A Liam Cia thlathum i, Ukraine ram kahdohnak hmun in Ivan Rossomakhin a rak kir hnu in Moscow khuachak lei ram khuate tualchung mi hna cu thinphang thlalau in an um tiah theih asi. A liam cia kum 3 ah khan lainawm buainak (case) in thonginn ah thlak a rak si bal a sinain, Wagner private military contractor he kahdohnak ah tel ding in aa pek hnu ah chuah zalen a rak si.
Novy Burets ah kir in, Rossomakhin nih Moscow khuachak lei lam kilometer 800 (meng 500) tluk a hlatnak khua te hna cu meithal he thah ding in a hrocer hnawh hna tiah an chim. Hi ruang ah, Palik hna nih a um kalnak hmunhma zulhdawi peng ding in an i zuam. A sinain a rak kir ni 10 hnu caan raulo te ah nutar pakhat a inn chung ah a kahthah tiah an chim.
Rossomakhin’s buainak (Case) hi a dang tein sarpiak a si lo. Associated Press nih kan hnu thla zeimawzah chung khan Wagner thiam lo canternak ah a tel ve mi hmunhma 7 an hmuh ṭhan tiah Russian media report nih a langhter.
Russia nih Ukraine kahdohnak ah a ralkap tampi kuat a timh cu lak ah Wagner mercenaries zong a talh chih tiah theih asi.
Wagner he ṭangṭi in ral a do mi paoh cu kahdohnak dih in luatnak pek nan si lai tiah bia a kamh hna. Kan hnu khan President Vladimir Putin nih Ukraine ram ah thiamlo canter a si mi hna caah ngaihthiamnak pek ansi lai tiah ca-thanh a chuah.
Kum 2021 August thla in kum 2023 May thla tiang Taliban nih an ram an lak hnu in Afghanistan ah tualchung mipi 1,000 tluk cu hriamngan puahkehnak le thazaang chuahnak in an nunnak a liam cang tiah theih asi. Kum 2021 August 15 in kum 2023 May thla karlak ah tualchung mi 1,095 an thi i 2,679 tluk nih hliam fak an tuar tiah U.N Mission to Afghanistan (UNAMA) nih an langhter.
Nunnak liam mi 700 tluk hna hi khuate Mosque khua fimcawnnak hmun le chawdawr/Bazar mipi umnak hmunhma bomb puahkehnak ruang ah a si tiah an chim. Hi buainak hi NATO hriamtlai phu an tlak hnu August 2021 Taliban nih nawlngeihnak an lak hnu ah ralthuam hmang in kahdohnak a rak chuak mi ah khan a si. I venhimnak lei ah hawi hlei in Islamic State hi harsatnak a tong mi ansi tiah an langhter.
Hi kong he pehtlai in, misual hriamtlai phu hi thilsual tuah tu ah puh an si hna tiah UNAMA nih a langhter chih.
Islamic Emirate venhimnak phu hna nih mipi himnak ding ruat in, misual hna hmunhma lak piak ding ah an cawlcang tiah theih asi.