Breaking News; Kan Kawlram Chun Mui A Tlung Ko E!!!

Kahdohnak Thawngpang Fonh!!
====================
Magway ramṭhen, Pauk peng um Pakokku pengkomh PDF sakhan pakhat cu SAC ralkap MI 35 Helicopter 1 le ke ralkap 100 leng nih an luhhnawh i an khangh, tiah Pakokku pengkomh Battalion 14, Companny 2 in ṭuanvo ngeitu pakhat nih a chim.

March ni 17 lioah Pauk peng chaklei um Pakokku pengkomh Battalion 14, Companny 2 (Black Guerrilla Force) sakhan cu MI 35 Helicopter 1 le ke ralkap 100 leng nih an luhhnawh i an khangh, tiah theih a si.

“March ni 17 ah kan sakhan cu SAC ralkap 100 leng nih, an rak luhhnawh pin ah Helicopter nih an bawmh hna. Sentari congtu kan ralkap hna nih tuan ah an hmuh hna caah kan luat dih. Kan sakhan kan sunghmi hi kyats sing 800 man tluk a si lai,” tiah Pakokku pengkomh Battalion 14, Companny 2 in ṭuanvo ngeitu pakhat nih a chim.

SAC ralkap nih Pakokku pengkomh Battalion 14, Companny 2 an sakhan an khangh caah hriamngan kuan 500 le RPG kuan tam ngai an ciam, tiah theih a si. Mutraw pengkomh ah KNU brigade 5 le SAC ralkap kar March thla cheu tiang ah kahdohnak voi 72 a cang tiah Mutraw media nih nihin March ni 20 ah a langhter.

March ni 1 in 15 tiang KNLA le SAC ralkap kar a cangmi kahdohnak ah SAC ralkap lei ralbawi 2 telh in ralkap 31 an thi, 21 nih hliamhma an tuar. KNLA lei in minung pakhat nih hliamhma a tuar tiah theih a si. Kaphnih kar i kahdohnak ah SAC ralkap leilawng 3 le thirleng(cycle) 1 KNLA brigade 5 nih an hrawhpiak hna tiah Mutraw media nih cun a langhter.

Mutraw pengkomh KNU brigade 5 hmunhma ah a luancia January thla chungah kahdohnak voi 209 le February thla chungah kahdohnak voi 178 a cang tiah a langhter chih. February thla chung kahdohnak ah SAC ralkap 96 an thi, cu chungah cun ralbawi 3 an i tel tiah tgeih a si.

A luancia thla hnih chung i kahdohnak ah SAC ralkap 116 an thi ralkap 104 nih hliamhma an tuar tiah theih a si.
Kahdohnak ah fak ngaiin hliamh a tongmi SAC ralkap nih KNU brigade 5 hmunhma chung ah vanlei kahdohnak pehtlai in a tuah. January thla le February thla chung ah vanlei kahdohnak voi 31 a tuah i bomb lung 198 a thlak caah tualchung mi 17 an nunnak a liam i 15 nih hliamhma an tuar.

A luancia 2022 kum khat chung KNU brigade 5 hmunhma ah SAC ralkap nih vanlei kahdohnak voi 35 a tuah i bomb lung 282 a thlakhnawh hna caah tualchung mi 41 an nunnak a liam pin ah minung 99 nih hliamhma an tuar. A luancia 2022 kum KNU brigade 5 hmunram ah kahdohnak voi 2737 a cang i, SAC ralkap 1307 an thi, 972 nih hliamhma an tuar tiah theih a si.

Kachin ramkulh, Putao peng ah SAC ralkap le KIA, PDF phufonh kar ni khat chung ah kahdohnak voi thum a chuak. Cu kahdohnak ah cun SAC ralkap 13 an thi, 2 kan tlaih hna tiah Putao PDF in ṭuanvo ngeitu pakhat nih a chim.

March ni 18, zinglei suimilam 7:00AM hrawng ah Putao in SAC ralkap minung thazaang 50 hrawng cio phu thum ah i ṭhen in hmun thum ah rallam an sial. Rallam sialtu SAC ralkap le tualchung hriamtlai phu kar kahdohnak a chuak i cu kahdohnak ah cun SAC ralkap 13 an thi, 2 tlaih an tong tiah theih a si.

March ni 20, zinglei ah Bago ramṭhen, Nyaunglaypin pengkomh Kyaukkyi peng Nyaungkone khua pawng ah khualtlawng leilawng pakhat cu bomb nih a puahhnawh caah leilawng chung cuangmi 3 an nunnak a liam i, hliamhma tuar zong an um tiah tualchung mi hna nih an chim.

Kyaukkyi-Taungoo lampi ah hin SAC ralkap le tualchung hriamtlai phu kar atu le atu kahdohnak a chuah lengmang caah, kaphnih nih cawlcanghnak an tuahnak hmun a si tiah tualchung mi pakhat nih a chim.

“Tutan thil a cannak hmunhma hi Nyaungkone khua pawng ah a si i, kahdohnak a chuah lengmang caah an hman tuk lonak lam a si. Cu hlan zong ah leilawng pakhat bomb nih a rak puahhnawh bal cang” tiah a chim.

Puahkehnak a can ruang ah nunnak liammi hna hi leilawng khaltu pa pakhat le a dang minung 2 tiin minung 3 an nunnak a liam, tutan puahkehnak a chuakmi kong ah mizei phu nih an hmanhmi bomb a si cu fiang tein kan thei lo tiah tualchung mi nih an chim.

March ni 18 ah SAC ralkap nih Kyaukkyi peng chung khuate ah hriamngan an thlah caah khuate khua li in tualchung mi 2,700 hrawng ralhrial dirhmun an phan tiah KNU nih March ni 19 ah cathanh a chuah.

Mandalay ramṭhen, Singu peng sui khur cawhnak hmunhma ah hlathlainak tuah ding in a kalmi SAC ralkap leilawng cu an kir lei ah bomb puahhnawh in doh an ton caah SAC ralkap 4 an thi tiah Pyin Oo Lwin pengkomh pahkahphah hruaitu Bu Zero Wan nih a chim.

March ni 19, chunhnu suimilam 1:00PM hrawng ah Singu peng sui khur cawhnak hmunhma ah hlathlainak tuah ding in a phanmi SAC ralkap leilawng 6 cu, an kir lei ah Nway Yone khua le Yemyat khua kar ah padeta bomb lung 7 kan puahhnawh hna tiah Bu Zero Wan nih cun a chim.

Leilawng 6 chung ah 1 hi bomb kan puahmi nih a hliamh caah a chung cuangmi ralkap 4 an thi, hliamhma tuar zong an tam tiah a chim chap. Karenni ramkulh, Demoeso peng nichuahlei Tanilarlay tlang in a kirmi SAC ralkap kah an ton caah 3 an thih pin ah meithal le zen-kuan tampi kan chuh hna, tiah Karenni Nationalities Defence Force (KNDF) Battalion 9 in ṭuanvo ngeitu pakhat nih a chim.

March ni 19 zinglei suimilam 4:00AM in Tanilarlay tlang in a kirmi SAC ralkap cu KA, KNDF nih, zing suimilam 6:00AM in an kah hna i zing suimilam 8:00AM tiang kahdohnak a chuak, tiah theih a si. Cu kahdohnak ah MA meithal zun 2, bomb lung 22, RPG 7 kuan lung 6, kuanbawm 9, seh meithal kuanbawm 4, Burma kuan 1497, Ngakyinmi kuan 350, G3 kuan 596 le kutcheh bomb lung 1 chuh an tong, tiah theih a si.

Demoeso peng nichuahlei ah SAC ralkap miakpi phu, 427 Battalion in ralkap le Nanhukuai um SAC ralkap nih, rallam hmun 3 in an sial. SAC kahdohnak ah KNDF Battalion 9 nih meithal kuan kawlnak an tuahmi ah zatuak 22(%) hrawng lawng a chuak rih, tiah theih a si.

Sagaing ramṭhen, Shwebo peng Shwebo khua ah raltuk a cawngmi phusawhti cu Sagaing lei an kir lio Shwebo-Kyaukmyaung lam ah bomb puahhnawh an tong i ralkap 9 an thi, hliamhma pumi zong an tam, tiah Naysakyia-Shwebo PDF in ṭuanvo ngeitu nih a chim.

March ni 18 zinglei suimilam 11:00AM hrawng ah Shwebo khua um SAC ralkap sin in raltuk cawn a dihmi pyusawhti pawl cu, Sagaing khua Tatma 33 ah riahcaw chantu leilawng 2 le ke in rallam a sialmi ralkap 40 tluk cu Shwebo-Kyaukmyaung lamthluan kip ah kah a tong, tiah theih a si.

“Thawng a kan petu nih cun SAC ralkap 20 hrawng an thi a kan ti ko nain kanmah nih bomb kan puahhnawhmi hna ah a thimi lawng kan rel hna i cathanh kan chuahmi a si,” tiah Naysagyia-Shwebo PDF in ṭuanvo ngeitu nih cun a chim.
Tipin khua a khangtu SAC ralkap pawl cu inn an khangh lioah Naysagyia-Shwebo PDF Ranger Army၊ Ghost Rider Special Task Force le Taw Gyi Kan Pah Kah Phah hna i bawm in hriamngan 80mm in kah an timh ko hna nain tlam a tlin lo caah an kir ṭhan, tiah theih a si.

Magway ramṭhen, Yesagyo peng Yelaykyun hmunram ah a ummi Myingyan Black Tiger (MBT) sakhan a luhhnawhtu SAC ralkap kah an ton caah 6 an thi, tiah Myingyan Black Tiger (MBT) in ṭuanvo ngeitu pakhat nih a chim.

March ni 18 ah Yesagyo peng Yelaykyun hmunram ah a lutmi SAC ralkap Tatma 99 Comando le Myingyan Black Tiger (MBT) kar ah nithum chung kahdohnak a chuak i, SAC ralkap 6 an thih pin ah hliamhma pumi an tam. PDF lei in ralkap 2 hliamhma an pu ve, tiah theih a si.

SAC ralkap an um rih caah zeitik caan paoh le khoika hmun paoh ah kahdohnak a chuak khomi a si caah mizapi umkal le ṭhutdir i ralrin ding in Myingyan Black Tiger (MBT) nih nawlnak le theihternak an tuah.

Cun, Sagaing ramṭhen, Myaung peng Kyaukyit sakhan in a chuakmi SAC ralkap cu bomb puahhnawh an ton caah 5 an thi, tiah Myaung Special People Defense Force -MSPDF in ṭuanvo ngeitu pakhat nih a chim.

March ni 18 zan suimilam 10:00PM hrawng ah Kyaukyit sakhan in a chuakmi SAC ralkap 30 hrawng cu, Kupin khua pawng ah Myaung Special People Defense Force -MSPDF nih bomb in an puahhnawh hna caah ralkap 5 an thi i an meithal zun hnih a kang, tiah theih a si.

“SAC ralkap 30 hrawng cu Kupin khua pawng ah kan hmanhmi bomb in Sagaing Battalion No. 4 MSPDF nih kan puahhnawh hna caah SAC ralkap 5 an thi. An meithal zun hnih zong mei nih a kangh caah a ciam dih. Ralkap hliamhma pumi zong an tam,” tiah Myaung Special People Defense Force -MSPDF in ṭuanvo ngeitu pakhat nih a chim. Crd-The Chin Post