Breaking News, Kan Chin ramkulh khua pakhat thawngpang vun theih cu e!
Kanpetlet Ah Minung 300 Hrawng Chungtlik Zawtnak Nih A Tlunh Hna, Ngakchia 3 Nunnak Liam, Chin Ramkulh Thawngpang
=================
Chin ramkulh thlanglei Kanpetlet peng khuate ralhrial an i dornak camp ah tualchung mi 300 hrawng chungtlik zawtnak nih a tlunh hna, cu chung ah a thla lawng si rihmi ngakchia 3 an nunnak a liam tiah tualchung mi hna nih RFA ah an chim.
Chungtlik zawtnak in nunnak liammi ngakchia 3 hi Ampon(အမ်ပုံ) khua, Samata(စမ္မသား) khua le Ngonlaung(ငုံလောင်း) khua hna in an si i March ni 13 in 18 kar ah an nunnak a liam tiah tualchung mi pakhat nih a chim. Chungtlik zawtnak in a zawmi hna hi kum khat tang a thla lawng a si rihmi ngakchia 50 leng, kum khat in kum hra kar ngakchia 150 le upa 100 hrawng an si tiah tualchung mi hna nih an chim.
Kanpetlet peng ah a luancia zarh khat thawk in tualchung mi hna cu chungtlik zawtnak in an zaw i, ngakchia le upa tiin minung 300 hrawng chungtlik zawtnak nih a tlunh hna tiah theih a si. Sii-ai harsat ruang ah i thlopnak ding ah kan harsa ngai tiah tualchung mi hna nih an chim. Kanpetlet peng ah SAC ralkap nih phone line an phih caah damlonak le lakhruak thil a can tikah pehtlaihnak a har ngai tiah tualchung mi hna nih an chim chap.
A luancia 2022, kum chung Kanpetlet peng ralhrial i dornak camp a ummi hna chung in a thla lawng simi ngakchia 7 le upa 10 tiin sii lei i thlopnak a um lo caah an nunnak a rak liam tiah tualchung mi hna nih an chim. Sagaing ramṭhen, Kalaymyo thonginn ah Falam peng Mualzawl khuami pa pakhat cu thonginn chung ah a nunnak a liam, tiah theih a si.
SAC nih an tlaih i thong kum 2 thlak ding in bia an khiahpiakmi Lal Pan San cu March ni 21 ah a nunnak a liam tiin an chungkhar cu SAC nih an va chimh hna, tiah theih a si. Falam peng Mualzawl khuami Lal Pan San cu CDM tuah ding in forfialnak le SAC ralkap uk duh lo langhter lamzawhnak ah teltumnak a ngei tiin Yarzatatgyi section 505(a) in SAC nih taza an cuai i, tukum February thla dongh ah kum 2 thong thlak ding in bia an rak khiahpiak, tiah theih a si.
Lal Pan San hi zeiruang ah dah a nunnak a liam ti zong hngalh a si lo i a ruak cu a chungkhar hna nih a chuahsemnak Mualzawl khua ah an vui, tiah theih a si.
Chin ramkulh, Falam khuachung in Hakha lei ah rallam sial in a kalmi SAC ralkap cu March ni 23 ah Lungrang khua pawng ah kan Chin ralkap Chin National Army (CNA), Chinland Defense Force-Hakha (CDF-Hakha) le Chinland National Defense Force (CNDF) nih an kahdoh hna caah SAC ralkap 7 an thi, hliamhmi zat fiang in theih a si rih lo.
Hi kahdohnak kong he pehtlai in, “Pathian lamhruainak thawng in kan Chin ralkap chung in thi le hliampu um lo tein an him dih ko” tiah CNA in chimphuannak nawlngeitu Salai Htet Ni nih The Chin Post ah a chim. March ni 23 zing suimilam 7:15AM hrawng ah Chin National Army (CNA) le Zomi Revolutionary Army (ZRA) cu ralram hmun pakhat ah an i kahdoh caah ZRA in pakhat a thi, CNA nih hriamnam zeimawzat zong an laak khawh tiah theih a si.
Meithal MA3 (1), kuanfang 160, kuanbawm 2, bomb 1, namte 1, phone 1 le power bank 1 hna cu CNA nih an laak khawh tiah theih a si. CNA le ZRA kaphnih kar kahdohnak ah CNA lei in hliampu le thi an um hraw lo tiah theih a si. Crd-The Chin Post