Kahdohnak Thawngpang Fonh!
==============
All Burma Students Democratic Force (ABSDF) Column 3 le ṭangṭi PDF phufonh le SAC ralkap kar kahdohnak a chuak i cu kahdohnak ah cun SAC ralkap 61 an thi, hriamnam zeimawzat kan laak khawh tiah ABSDF Column-3 nih cathanh an chuah.
March 31, ah Gangaw peng Gan khua palik sakhan cu Gangaw pengkomh PDF, ABSDF le pahkahphah phufonh nih an kahdoh hna caah SAC ralkap 45 hrawng an thi, 10 nih hliamhma an tuar pin ah G 3 meithal 4, G 4 pakhat le kuanfang zeimawzat mipi ralkap nih an laak khawh tiah theih a si.
April 3, ah Myitta tiva hrawn in rallam sialtu SAC ralkap 70 hrawng cu Gangaw pengkomh PDF, Local PDF le pahkahphah phufonh nih Gangaw peng Saidoe khua pawng ah an kahdoh hna caah SAC ralkap 5 an thi tiah theih a si. Cu pin ah April 5, ah Pale peng Ziphyukone khua in Gantaungh(ကန်းထောင့်) palik sakhan kal aa timmi SAC ralkap le pyusawhti phu hna cu Gantaunghkhua pawng ah ABSDF le ṭangṭi phukomh nih an kahdoh hna caah SAC ralkap 4 an thi.
April 7 ni zong ah Gangaw khahlahyiah 50 in a chuakmi SAC ralkap thazaang 100 hrawng le mipi ralkap kar Gangaw peng Lapu khua pawng ah kahdohnak a chuah ṭhan caah SAC ralkap 7 an thi tiah theih a si. Magway ramṭhen, Myaing peng ah Faw leilawng in a kalmi SAC ralkap hna cu mipi hriamtlai phu nih an kahdoh hna caah SAC ralkap 10 an thi tiah dohthlennak tuahtu ralkap nih an chim.
May 4, zinglei suimilam 9:45 hrawng ah Myaing in pyusawhti tampi an umnak Tayat khua a kalmi SAC ralkap hna cu an kir lei ah tualchung hriamtlai phu nih an kahdoh hna caah SAC ralkap 10 an thi tiah theih a si. SAC ralkap hna cu battalion 17 ṭatkhuai 2 hriamtlai phufonh, Middle Revolution Task Force (MRTF), RPTF, JRT le tualchung hriamtlai phufonh nih an kahdoh hna. Kaphnih i kahdohnak ah tualchung hriamtlai phu lei hliamhma tuarnak um loin hnu an tolh kho tiah theih a si.
Sagaing ramṭhen, Humalin peng SAC ralkap le Shanni National Army (SNA) an sakhan pahnih cu KIA/PDF nih May 4 zinglei ah an laak, tiah tualchung mi pakhat nih a chim. “Humalin peng Naungpuaung(နောင်ပိုအောင်) leikap ah May 4 zing suimilam 4:00 in 7:50 tiang kahdohnak a chuak i SAC ralkap le SNA sakhan TaungOo le Taungbuhla cu KIA/PDF nih an va kah i an laak khawh,” tiah tualchung mi pakhat nih cun a chim.
Tualchung mi pakhat zong nih, “SAC ralkap sakhan cu KIA/PDF nih an laak khawh pin ah hriamnam le kutcheh bomb hna zong tampi an chuh hna. SAC ralkap 35 hrawng an thi i, KIA/PDF lei in aa hliammi an um hraw lo,” tiah a chim. Humalin peng SAC ralkap sakhan KIA le PDF nih an laaknak kong he pehtlai in KIA chimphuannak nawlngeitu Colonel Naw Bu le Humalin PDF ṭuanvo ngeitu hna cu dohthlennak media pakhat a simi People’s Spring nih pehtlaihnak an tuah ko hna nain an pehtlai kho rih hna lo, tiah theih a si.
Sagaing ramṭhen, Shwebo khua in a chuakmi SAC ralkap cu bomb in kan puahhnawh hna caah ralkap 4 an thi, tiah Black Wolf Army nih an langhter. May 3 zing suimilam 6:00 hrawng ah Shwebo sianghleirun sianginn ah umhmun a khuarmi SAC ralkap 45 hrawng nih, tualchung mi an tlaihmi hna cu Ungpauk khua lei ah an kalpi hna i, Ungpauk khua lai ah an thlah ṭhan hna, tiah theih a si.
Tualchung mi an thlah hna hnu ah SAC ralkap cu Ungpauk khua nichuahlei an kal lioah lamhruang in Black Wolf-Army le Who Am I-Army nih bomb in an puahhnawh hna i hriamngan le hriamhme zong in an kah hna caah SAC ralkap 4 an thi, 3 hliam an tuar, tiah theih a si.
Cu an i kahdoh lioah Shwebo raltuk cawnnak No. 8 in Kyaukmyuang khua um Khah Mah Yah 12 chung ah kal aa timi ralkap 42 cu raltuk cawnnak camp chung an luh lioah kahdoh a tongmi ralkap hna zong Ungpauk khua ah an kir ve, tiah PDF sinin theih a si. Cu ṭhiamṭhiam in Sagaing-Monywa lam ah SAC ralkap leilawng bomb in kan puahhnawh, tiah People’s knight Defense Force Myinmu in ṭuanvo ngeitu Bo Aye Chan nih a chim.
May 4 deilei suimilam 1:00 tluk ah Sagaing in Monywa lei a kalmi SAC ralkap 90 hrawng phurtu leilawng 3 cu Wunpyi le Alakapa khua kar ah bomb lung 2 in PDF Myinmu nih an puahhnawh hna, tiah theih a si. A voi khatnak bomb puahhnawhnak ah ralkap leilawng 1 a khen i, a voi hnihnak ah a pathumnak leilawng a khen. A thimi le aa hliammi an um le um lo theih a si lo nain hliamhma pumi an tam, tiah theih a si.
Sagaing ramṭhen, Nyaungpinwin palik sakhan le Malaydaw khua um pyusawhti sakhan cu drone in bomb kan thlakhnawh caah SAC ralkap lei in 2 an thi, tiah YOUNG WOLF L.P.D.F in ṭuanvo ngeitu pakhat nih a chim. May 1 chun suimilam 12:50 hrawng ah Nyaungpinwin palik sakhan cu drone in bomb an thlak pin ah hriamngan in an kah caah ralkap 5 hliamhma an pu, tiah theih a si.
May 3 zanlei suimilam 5:00 hrawng ah Malaydaw khua um pyusawhti sakhan zong drone in PDF nih bomb an thlakhnawh caah ralkap 2 an thi, tiah theih a si. “Nyaungpinwin sakhan kahdohnak ah ralkap 5 hliamhma an pu. Malaydaw pyusawhti sakhan kahdohnak ah ralkap 2 an thi,” tiah YOUNG WOLF L.P.D.F in ṭuanvo ngeitu nih cun a chim.
Cu kahdohnak ah YOUNG WOLF L.P.D.F၊ Sadaung Revolution Army၊ Kyaukse pengkomh Pah Kah Phah le Phoenix (SGG) hna i bawm in an kah hna, tiah theih a si. Cu pin ah Magway ramṭhen, Myaing peng ah rallam a sialmi SAC ralkap cu bomb in kan puahhnawh hna caah palik sergeant 1 le pyusawhti 1 an thi, tiah Myaing Pah Kah Phah in ṭuanvo ngeitu pakhat nih a chim.
May 2 zing suimilam 6:00 hrawngah Tayetkan khua le Sukantaik khua karah pyusawhti cu rallam an sial lio tiin thawng an kan pek caah bomb in an va puahhnawh hna i, palik sergeant 1 le pyusawhti 1 an thih pin ah 1 hliam fak ngai a tuar, tiah theih a si. Cu kahdohnak ah Myaing PDF Battalion 1, Company 1 le 2(Kanung). TYK Guerrilla le Pyituh Aman phu hna i bawm in an kah hna, tiah theih a si.