Hakha, Keitheibo Sang Inn Pakhat Cu Mifir Nih An Luhhnawh!
============
Chin ramkulh, Hakha khuapi, Keitheibo sang inn pakhat cu mifir nih an luhhnawh, tiah theih a si. May 20 zan ah Keitheibo sang inn pakhat cu aho si ti hngalh lomi pahnih nih an luhhnawh i inn ngeitu hna phone an chuh hna pinah pa pakhat cu namte in a or an hmuahnak ah hliamhma a pu, tiah tualchung mi pakhat nih The Chin Post ah a chim.
Minung pahnih cu zanṭim ah Keitheibo sang inn pakhat ah kal in, “Kan rawl a ṭam tuk, zaangfahnak tein tlun inn kan onh u,” tiin an nawl hna nain inn ngeitu nih an duh lo. Voi tam tuk an auhnawh hna hnu ah innka cu an onh hna i atu bantukin thil a can hi a si, tiah tualchung mi pakhat nih a chim.
Mifir hna hi ahodah an si ti cu hngalh an si lo nain kawl holh in an holh, tiah cu thil a cangmi kong ah thil hngaltu pakhat nih a chim. Hakha, Keitheibo sang ah hi bantuk in thil a can ruangah Hakha um Khrihfabu cheukhat ah cun zapi i ralrin cio dingin Biakinn ah thawng an thanh, tiah theih a si.
NCA Minsen a Thu Veve mi RCSS le PNLA Karlak ah Kahdohnak a Chuak! Shan ram thlanglei, mahte khuakhan lairel, ukhruainak Pa-o ram, Sisai Peng, Htiphetnan khua pawngkam um Pa-o National Liberation Army(PNLA) hna sakhan umnak hmun pakhat cu Restoration Council of Shan State (RCSS) ralkap nih an va luhhnawh hna i suimilam pahnih tluk kahdohnak a chuak, tiah PNLA lei nih an thanh.
“Kahdohnak hi suimilam pahnih tluk a rau i cu hnu ah RCSS/SSA lei cu hnu ah an kir i minung thazaang an i chap. Cun, khuami hna zong leng ah chuahvah lo dingin nawl an chuah,” tiah PNLA lei nih an chim. Hi kahdohnak ah hin kaphnih thi le hliamtuar an um le um theih khawh a si rih lo. Atu aa kap mi PNLA le RCSS hna hi an phu hnih in NCA minsen a thu mi veve an si.
Mochia Thlichia Ruang Hartongmi Hna Ca Ah TNLA Nih Kyats Sing 500 AA Sinah An Pek; Thlichia ruangah hartongmi Rakhine rammi hna ca ah Ta’ang National Liberation Army(TNLA) nih Rakhine hriamtlai Arakan Army(AA) sinah Kyats sing 500 an pek i, bawmhnak an pekmi cungah AA hruaitu Htun Myat Naing nih lawmhnak bia a chim.
A luancia ni tlawmpal ah khan NUG nih kyats sing 1,000, KIO nih kyats sing 3,000 le Kokant hriamtlai MNDAA nih kyats sing 1,000 bawmhnak an pek cang hna, tiah theih a si. Rakhine ram cu thlichia nih fak tuk in a den ruangah inn le lo tampi a rawk i, harnak nganpi an ton caah bawmhchanhnak rian hma a kal khawh deuh nakding ah bawmhnak kan pek hna hi a si, tiah TNLA nih nihin May 20 ah cathanh an chuah.
“Mocha thlichia ruangah Rakhine mizapi harnak kan ton lio ah atu bantukin kanmah he ṭangṭi phu tlangcung hriamtlai hna nih an kan bawmhchanh cio caah lunglawmhnak tampi kan ngei,” tiah General Htun Myat Naing nih cun a chim.
Rakhine ramchung ah thlichia nih a hrawhmi inn le lo hna cu AA hruainak in an remh cuahmah hna i, lam le thingkung a purmi hna zong thianhhlimhnak an tuah, tiah theih a si. Credite; The Chin Post