SAC Ralkap Nih Agape Sii-inn Ah Nurse Panga(5) Le Cawbuk Sang Ah Pa Pathum(3) An Tlaih Hna!
==============
Chin ramkulh, Hakha hrambunh Agape sii-inn ah SAC ralkap nih Nurse panga(5) an tlaih hna, tiah theih a si. May 22 zinglei suimilam 2:00 hrawng ah SAC ralkap nih Agape sii-inn cu an luhhnawh i nurse panga(5) cu an kalpi hna. Nihin May 22 chun tiang ah an thlah rih hna lo, tiah tualchung mi pakhat nih The Chin Post ah a chim.
Nurse panga(5) hna hi zei ruang ah dah an tlaih hna ti cu hngalh a si lo. Agape sii-inn ah hin nihin May 22 ah mizaw operation tuah ding zong an um, tiah theih a si. Cupinah May 21 zan suimilam 11:00 hrawng ah Cawbuk sang cu SAC ralkap nih chungkhar cazin an check hna i, pa pathum(3) an tlaih hna, tiah theih a si.
Hi kong he pehtlai in tualchung mi pakhat nih, “Cawbuk sang Moe Hein pinlei khi SAC ralkap nih chungkhar cazin an check hna i, pa pathum(3) cu chungkhar cazin ah nan i tel lo an ti hna ruangah an tlaih hna i an kalpi hna,” tiah The Chin Post ah a chim.
Bungzung lei in a rak kaimi Tatma 77 SAC ralkap pawl cu Hakha an phan cang tiin thawngpang a len hnu in May 20 zan ah, Keitheibo sang ah minung pahnih(2) nih chungkhar pakhat cu an hrocer hna i an phaisa Kyats sing hra (1,000,000) hrawng zong an chuh hna. Pa pakhat zong a or ah nam in an tuk i a hliamhma he sii-inn a phan. Cu bantuk thil a can hnu May 21 le 22 zan ah Agape sii-inn ah Nurse panga(5) le Cawbuk sang pa pathum(3) cu SAC ralkap nih an tlaih hna, tiah theih a si.
Pau Dohthlennak Chung ah Chin National Defense Force(CNDF) In Ralkap 32 Nih An Nunnak An Pek Cang , Chin Miphun Martyr Ni kan tuahnak sullam cu hriamnam in raltuk a rak i thawk hlan ah rawn lei kan unau hna nih nunak an rak pekmi philhlonak ah a si, tiah an langhter.
CNDF cu Falam khua he aa pehmi ramri poh ah SAC ralkap a doh cuahmahtu kan si i, ṭangṭi phu hna he zong ral kan dohṭi. April thla lio Falam peng Var khua um SAC ralkap sakhan laak lio zong ah SAC ralkap 10 leng an thi i, 14 kan tlaih hna, tiah an langhter. CNDF chimphuannak nawlngeitu Salai Cung Ngai nih, “Kum 2 chung ah kahdohnak voi 122 a chuak i zen-kuan le hriamnam zong kan chambau ngai nain hmai kan nor chin ko,” tiah a chim.
Sagaing Peng Chaklei Kahdohnak Ah PDF Ralkap 4 Nunnak Liam; Sagaing ramṭhen, Sagaing peng chaklei ah SAC ralkap le PDF kar kahdohnak a chuak i, PDF ralkap 4 nunnak a liam, tiah theih a si.
Cupinah SAC ralkap nih rallam an sial ruangah ralhrial in a zammi tualchung mi motor pakhat aa let i, nu 1 a nunnak liam pinah minung 6 hliamhma an pu, tiah theih a si.
May 19 zinglei suimilam 6:00 hrawng ah Sagaing peng, Padu khua ah rallam a sialmi SAC ralkap 30 hrawng cu PDF nih an kah hna. SAC ralkap nih PDF sakhan pakhat an khangh leng ah bomb an hmanhmi a puah ruangah PDF ralkap 4 cu an nunnak a liam, tiah Kyaukse PDF nih an langhter.
Kangyikone le Selaygyia khua kar, Kangyikone le Padu khua kar hrawng ah May 19 zan tiang kahdohnak a chuak i SAC ralkap nih hriamngan an kah ruangah Padu khua inn 1 a rawk, tiah tualchung mi hna nih an chim. Credite; The Chin Post