Breaking News; Hakha khua hmun tampi ah meithal le bomb thawng a thang

Hakha khua hmun tampi ah meithal le bomb thawng a thang
——–
Nihin September 23, zaan suimilaam 6:30 hrawng in Hakha khua hmun tampi ah meithal le bomb thawng theih than a si.
Hakhathar Lamruk tonnak, Lungphun Tlang, Hakha University le Chin Oo Si sang ah meithal le bomb thawng pehtlai in theih a si tiah sangmi hna sin in kan theih.

“Hakhathar, Chin Oo Si sang Cozah Zung hrawng le University Sianginn hrawng in kan theih. Leisen lei hrawng zong in a thang mi a lo nain khoika set in a si cu kan thei kho lo,” tiah Dawrthar sangmi pakhat nih The Hakha Post ah a chim.

Bomb le meithal thawng a than hnu ah Khuathar sang lei in Hakhathar lei ah Council ralkap tam nawn ke in an kal i an hnu in motor pahnih nih a zulh hna tiah kan theih nain, The Hakha Post nih kan fehter kho lo.

Tu zaan meithal le bomb puahkehnak ruang ah a thi mi le hma a pu mi an um le um lo theih a si rih lo. Hi thawng kan tial lio zaan suimilaam 9:50 tiang ah meithal le bomb thawng a dai rih lo.

Breaking News: Hakha ah Dalan pakhat an kah. 2021 September 23 ni Hakha khuapi chung khuasa, uknak chuttu ralkap lei tang (Dalan) pakhat cu Hakha khuachung ah an kah i fak tak in hliam hma a pu tiah thawng kan theih.

“Atu kah a tongmi pa hi uknak chuttu ralkap lei thawngpetu a si. Dalan pical ngai a si. Hliamhma a pu i atu hi Hakha sii-inn ah an kalpi,” tiah min langhter duh lo pakhat nih a chim. Atu an kahmi pa hi U Yan Naing ti a si i Hakha khuathar sang ah an kah. Meithal kuan hma hmun thum ah a tuar tiah kan theih.

Taingen khua pawng ah Mytel seh thilri an hrawh. Chin ramkulh, Tedim peng, Taingen khua pawng ah operator pathum nih an hman mi Tower pakhat cung i Mytel seh thilri pawl cu September 21 zaan ah PDF-Zoland le CDM i bawm in an hrawh tiah theih a si.

Breaking news; Chin Ramkulh thlanglei laitlang Paletwa le chaklei laitlang Tedim khuapi chung tuzaan suimilaam 6:00 in internet line phih hram an thok.

Internet line phih ding in cazin an langhter mi chung ah Thantlang, Falam, Tedim, Mindat, Kanpetlet le Paletwa hi an si. Zei can tiang dah an phih hna lai ti theih a si lo. Credit: The Hakha Post