Breaking News: Hakha Ah SAC Helicopter A Tla!
Breaking News: Hakha Ah SAC Helicopter A Tla!
============
March 29, tuzing 9:40am hrawngah SAC Helicopter pakhat cu Hakha khuachung Cawbuk chak ah farkung aa pah i a tla tiah kan theih!
Farkung cu a kiak dih nain Helicopter cu a puak lo tiah mithmutu pakhat nih The Chin Post ah a chim! Thawngfiang kan hlathlai cuahmah! Update khawh kan i zuam lai!
Helicopter kahnak hmanh kan neih lo Far Kung tal nih kap ko ne seh Far Kung kan ilawm. Kan thingram hna hi bawmtu ah cang hram hna seh.
Tinam Khua Inn 9 SAC Ralhrang nih an Khangh, Khuami 700 Hrawng an Zaam. Hakha he meng 36 a hlatnak hmun ah a ummi Tinam khua ah SAC ralhrang 100 hrawng zaan an riak i, inn 9 an khangh ta tiah ramlak ah a zaam vemi Tinam pastor nih The Chin Journal ah a chim.
“Ralkap 100 hrawng an si lai dah. Kan khua Baptist biakinn le Believer biakinn ah an riak i, inn an bauhmi le an firmi zong a um len ko. Lamtuk lei an lanh lai ah inn an khangh ta i inn 9 an ciam,” tiah a chim. Inn a kaangmi hi bomb nih a tlakmi theng si loin an khangh hramhrammi a si ko, tiah a chim a chap.
“Bomb tlak ruang ah a kaangmi cu a si lai lo. Khuachung an um hnu, khua in an chuah lai ah a kaangmi a si i, an khangh hramhrammi si dawh a si ko,” tiah a chim. Lamtuk khua pawng ah miphun ralkap le ralhrang karlak kahdohnak fak ngaiin a chuak i SAC ralhrang lei in a thimi le hliam a pumi an um len tiah kan theih nain mithi/hliampu a zat fiang in theih a si lo.
Tinam khua ah inn 105 a um i, an khua ning in milu 700 hrawng cu bu 6 hrawng ah an i tthen hna i ramlak ah an zaam dih hna. SAC ralhrang pawl Lamtuk khua lei ah an kal caah Lamtuk khuami pawl zong nih an khua an chuahtak, tiah thawngpang kan theih.
SAC Ralkap nih Tinam khua an khangh, Inn 9 a kang cang. Chin ramkulh, Zokhua peng, Hakha-Gangaw lam cungah a ummi Tinam khua cu SAC ralkap nih March 28 ah an khangh tiah Chin Human Rights Organization (CHRO) nih a thanh. Khuami pakhat nih khuachung a kanghnak khu cu ramtang kan zaamnak in hmuh khawh a si tiah CHRO ah a chim.
“Chun sml 12:00 hrawng ah Tinam khualuh lamton (Lannsung) in an khangh cuahmah lio a si lai dah. Biakinn tlang nih a phenh caah zeitluk tiang dah a kangh cu kan thei rih lo”. Ahohmanh nih an luh hnawh ngam hna lo caah a lang in cuanh a si ko. A kaang tiah chim khawh a sinak hi mino nih tlang in durbing (hman-bi-lu) in an bih caah a si tiah theih a si.
Tinam upa pakhat nih “Tinam khua cu inn kua khanghpiak kan si cang” tiah a pumpak Facebook cahmai ah a tar.
Tinam a kangh cuahmah lio ahhin, Lamtuk khua chung in Bom le meithal thawng pehzulh in a thang a thang. [Tinam zong ah] SAC ralkap pawl khuachung an rak luh lio ahhi biakinn tlang kha bom le methal in an kah hmasa tiah theih a si.
“Lamtuk khuahlun le khuathar karlak thlaan hmun zawn ah an i kap tiah” khuami nih The Chinland Post ah a chim.
Tinam le Lamtuk khua hnih fonh in, inn 200 leng cu SAC ralkap an rak luh bak in nithum chung ramtang ah an zaam cang tiah theih a si. Tinam khua hi minung 500 fai in, inn 103 hrawng khuasa an si i thawngpang chiat hnu ah an karh ngai i, a minung in zapi hi 700 fai hrawng an um lio a si tiah theih a si.
Nain, tutan kahdohnak nak thawng le ralkap tlunkal ruang ah khua naihniam, khuapi le ramtang ah an zaam dih tiah theih a si. Cun, Lamtuk khua zong hi inn 85 khuasa an si i minung 381 an um, nain tulio cu an zaam dih tiah theih a si.