Breaking News; Hakha ah Ramkulh Lah-Wah-Kah Zung a kaang

Hakha ah Ramkulh Lah-Wah-Kah Zung a kaang
==========
Hakha khua, Chin Oo Si sang ah a um mi Ramkulh Lah-Wah-Kah Zung cu tu zaan suimilaam 10:30 hrawng in a kaang tiah kan theih.

“Zaan suimilaam 10:30 hrawng in mei alh kan hmuh. Ramkulh Lah-Wah-kah Zung a si. Zeiruang ah dah a kangh ti theih a si lo. Mei thattu zong ho hmanh an um lo,” tiah sangmi pakhat nih The Hakha Post ah a chim. Hi Zung a kanghnak kong he pehtlai in thawng fiang theih a si rih lo.

Hakha ah Ramkulh La-Wa-Kah Zung a kaang, a ciamh leisang ah Meithat motor a phan. October 14, 10:40 PM hrawng in Hakha Ramkulh (Pyine) La-Wa-Ka Zung a kaang i a ciamh leisang ah Meithat Zung in tuanvo ngeitu le an motor an phan, tiah kan theih.

“Kangh aa thok hi 10:40 hrawng ah a si i 11:15 tiang ah a ciam luklak cang. Atu 11:25 ah Meithat Zung lei an ra i an phalh cuahmah,” tiah khuami pakhat nih The ​Hakha Times ah a chim. Hi Zung a kaang mi hi zeitindah mei aa thok in zeiruang ah dah a kangh ti cu hngalh khawh a si rih lo. Credit: The Hakha Post, The Hakha Times

Hakha lei Phorhmi Ar 450 Hakha-Monywa kar ah Mibu nih an Chuh Dih Hna. Hakha lei ah an rak phorhmi ar 450 cu nihin zaanlei sml. 5:00 hrawng ah khan Hakha le Monywa karlak Nagamok Tlang (နဂါးမောက်တောင်) zawn ah minung 100 hrawng a simi mibu nih an chuh dih hna, tiah ar chuh a tongmi Hakha khuasa chungkhar hna sin in thawng kan theih.

Nihin October 13 ah Monywa in ar a phor i Hakha ah a rak tlungmi motor cu Nagamok Tlang ah a rawk i, cuka hmun ah cun mibu nih an ar vialte hramhram in an chuh dih hna hi a si. Ar chuh a tongmi chungkhar pakhat nih, “Monyaw in kan rak i thawh i Nagamok Tlang ah kan motor cu a rawk.

Motor mongtu kan chiah ta i, a neih biknak hmun ah motor hlan ding in kan kee in kan va kal. Motor kan hlan khawh i kan rak kir ah cun kan ar bawm le kan ar cu minung 100 tluk nih an rak tthial dih cang,” tiah The Chin Journal ah a chim.

Ar tlawmpal lawng i lak ding in le ar bawm tal chiah ta ding in an nawl len hna nain an duh lo pin ah an tlerh khawn hna. “Kan nawl len hna. Ar thlampal hi cu i lak ko u law kan chiahtak ko uh kan ti hna zong ah an duh lo. Cun, ar hi i lak uh law arbawm tu hi kan chiahtak ko uh kan ti hna zong ah an duh hlei lo.

Ar he arbawm he an cawi dih i lamthlang lei ah an kalpi thluahmah ko. Na kan pek lo cun nan nun him lai lo zong a kan ti,” tiah a chim chap. Ar an lakpiakmi hna hi 450 tluk a si i, ar paruk lawng an chiahpiak ta hna. Ar a chuttu mibu lak ah hin nu pawl zong an i tel.

Ar a chuttu hna minung 100 hrawng hi hriamnam le meithal zong an i ken lo i khuami sawhsawh zong an si kho, tiah an ruahdamh. Nagamok Tlang hrawnghrang hi atu bantuk in firtlai le mithah tibantuk a rak um pah lengmangnak hmun a si.

Rialti Khua ah SAC Ralhrang nih Biakinn Telh in Inn 4 an Khangh. Falam-Hakha karlak Lungrang khua pawngte Rialti khua ah SAC ralhrang nih biakinn telh in inn 4 an khangh, tiah thawng kan theih.

Rialti cu Falam peng, Thlanrawn le Lungrang karlak ah a ummi inn 7 hrawngte an umnak khua a si. “A kaangmi inn pawl lak ah Pu Sui Cem inn le Church Chairman Pu Lal Uk i a pa inn zong an i tel hna. Inn dang pawl zong hi an khangh chap khawh men,” tiah minung pakhat nih The Chin Journal ah a chim.

Ramchung le Ramleng Chinmi Dihlak Rawl-ulh Thlacam Sawmnak. Kan Chinram Nichaklei le Nithlanglei in ral nih a kan kulh bang in thaizing October 13 hi ramchung le ramleng Chinmi vialte rawl-ulh in Pathian sin bawmhal thlacam ding in timhtuah cio a si.

Camp Victoria lei zong in rawl-ulh thlacam ding in biacahnak a tuah i, HTPH Secretary Rev. Dr. Lian Hup Ling zong nih thaizing zinglei sml. 6:00 in zaanlei sml. 6:00 tiang rawl-ulh thlacamnak ngeih cio ding in sawmnak a tuah.

Falam lei kan unau hna zong nih kan Chinram ca ah rawl-ulh thlacamnak ngeih cio ding in ramchung le ramleng Laimi sin ah biacahnak an tuah. Baibal Caangthim:”Raltuk ni ca ah rangtum cu timh a si. Sihmanhsehlaw, teinak cu BAWIPA sin in a rami a si.” Credit: The Chin Journal