Breaking News; Dalaan le khuabawi pawl an fimtawl hna

Dalaan le khuabawi pawl an fimtawl hna
==========
1. Yangon Ramthen, Thanhlin Peng Bogyoke khua ah Dalaan Kala@Ye Dain cu nihin September 29 zing ah meithal zuun 3 in ah kah i a thi.

2. Sagaing Ramthen, Monywa Peng, Monzwe khuabawi U Myat Kyaw Thu zong Monywa Heroes Group (MHG) nih an fimtawl ve.
3. Minmu khua zong ah Dalaan le a hnuzuul pakhat an fimtawl rih hna.

4. Dalaan lawng hlah, Pyu-saw-htee hruaitu tiin amin thang mi Sagaing Ramthen, Khin-U Peng, Thayat khuami Ko Win Thura (kum 45) cu nihin September 28 ah meithal kahnak in a thi, tiah Khit Thit Media nih a tial.

Dalaan lawng hlah, Pyu-saw-htee hruaitu tiin amin thang mi Sagaing Ramthen, Khin-U Peng, Thayat khuami Ko Win Thura (kum 45) cu nihin September 28 ah meithal kahnak in a thi, tiah Khit Thit Media nih a tial.

Min Aung Hlaing kal aa timhnak Puta-O-PDF pawl timhcia an si cang. Kachin Ramkulh Puta-O ah kal aa tim mi Min Aung Hlaing a phanh ahcun ralthawh ding ah timhcia (ready) kan si cang, tiah Puta-O-PDF nih September 28 ah an thanh.

Hi kong ah Min Aung Hlaing cu September thla dongh asiloah October thla thokka hrawng ah Kachin Ramkulh Puta-O a tlawng lai, ti mi thawngpang a leeng mi he pehtlai in PDF pawl timhcia in an umnak a si.

Kokant ah MNDAA nih Kawl Ralkap 7 an kahthah hna. Kokant (Kokang) Pengkomh Chaklei Shin-htan hrawng ah Kokant ralkap (MNDAA) nih Kawl Ralkap 7 an kahthah hna, tiah theih a si.

September thla chuahkate khan Kokant hrawng ah hin Kawl Ralkap nih voi 2 tiang an thazaang an chap pin ah Kokant hmunhma hna ah hriamngan an thlak lengmang i atu bantuk in kahdohnak a chuah hi a si. Hi kahdohnak hi September 27, 9:30 AM hrawng in aa thok i suimilaam 2 chung hrawng an SI.

Thantlang Peng Khuate Milu an Chah bang in Thilman Van Tawng. Khuapi in Thantlang peng khuate lei ah i dor ding in a panhmi nitin in an karh bang in Thantlang le Hakha lei in lam a pih cang caah thilman zong van an tawng, tiah Thantlang peng khuate cheukhat ah kan pehtlaih khawhmi upate sin in thawngpang kan theih.

Buaktlak in khuate pakhat ah milu 300 cung hi i dor ding in a phan tharmi an um i, sianginn, inn lawngkaang le biaknak lei inn hna ah hmunhma an sersiampiak hna. Leitak-B pastor pakhat nih, “Atu tiang a rak phan tharmi hi minung 320 hrawng an si. Nihin zong ah chungkhar pahnih an rak phan tthan. An rak phak lecangka in ni 14 chung sianginn ah Quarantine kan chiah ta hna.

Atu tiang ah cun COVID-19 zawtnak a ngeimi an um rih lo,” tiah a chim. Tlangrua pastor pakhat zong nih, “Kan khua ah a phan tharmi minung 310 fai an si. A phan tharmi chung ah nufa hna pahnih COVID-19 zawtnak an ngei i inn dang te ah kan zohkhenh hna.

A rak phan tharmi paohpaoh hi ni 10 chung Quarantine kan chiah ta ve hna,” tiah a chim. Hriphi-B Baptist pastor pakhat nih cun, “A rak phan tharmi hi minung 400 leng an si kannih khua cu. Thil man zong let tam tuk in a kai. Thilri a luh khawh ti lo tik ah Phone Bill hmanh i cawk awk a um ti lo. Chiti, Datsi le Coffee Mix tiang in let tam tuk in an man a kai dih,” tiah a chim.

Tlangrua khua ah cun datsi cawk awk a um ti lonak zarh 2 chung a si cang i, facang telh in a dangdang thilri an lut kho ti lo. “Atu hi cu khual zong an rak phak ka a si i, eidin tirawl lei cun kan hnangam rih. Asinain, atu ning hin thla tam deuh a kal ahcun hmailei caah lungrethei a si ko,” tiah a cunglei Tlangrua pastor nih a chim.

Hriphi khua ah cun datsi Gallon khat ah 15,000MMK a phan. Ahlan i 35,000 man facang tun khat ah 50,000 tiang an phan. Arti pum khat ah 300MMK hrawng in cawk a hau fawn. A cunglei Leitak pastor nih, “Thilman hi cun ni khat dan bak in a kai. Hakha le Thantlang lei lam zong a pih cang tik ah lungrethei a si ko.

Asinain, atu tiang ah cun Pathian thawng in chambau tuk in kan um hna lo. Hmailei thla tam deuh a rauh ah cun lungrethei cu kan si ko,” tiah a chim. Thantlang peng telh in Chin ramkulh pengkulh pariat ah Phone Internet Line zong an thah dih tik ah lenglei thawngpang zong an thei kho ti lo. Credit: The Hakha Times, The Chin Journal