SAC Ralhrang Nih Hmunhma Nan Theih Lonak Ah Ra In Nan Thih Lengmang Nak Cha Cun Mipi Sinah Rak I Fonh Uh; Salai Htet Ni
=========
Chin ramkulh chung kahdohnak ah SAC ralhrang lei a thi mi an tam, kan lung cu a tha ve lo nain uknak tha lo cu pehzulh in kan doh peng ko lai tiah CNA chimphuannak nawlngei tu Salai Htet Ni nih a chim. 2023 March le April thla chungah Kalay-Falam-Hakha lei in a ra mi SAC ralhrang he kahdohnak ah ralhrang lei a thi le hliamhma pu mi an tam. Mah pin ah Gangaw-Hakha kar kahdohnak zong ah ralhrang lei a thi mi le hliamtuar an tam fawn.
“SAC ralhrang hna nih mah hmun le hma a si lo nak ram ah nawlpek nak in kahdohnak nan rak tuah i nan thih lengmang nak cha cun, a caan um lio ah mipi sin ah rak i fonh dih uh” tiah Salai Htet Ni nih a chim.
Hi kahdohnak ah SAC ralhrang chung in kut le ke kiat mi, mit a rawk mi tampi Hakha siizung ah thlop an si nak kong, cu hliamhma tuar mi ralhrang hna nih an pu Min Aung Hlaing an volhpamhnak kong, cung lei an pu le miakmai nak caah nawlpek nak poah tuah lo ding le mipi sin ah tha tein i fonh a bia pit deuhnak kong a cung lei upa nih a chim.
Atu lio hmunkip kahdohnak ah SAC ralhrang pawl a thi mi le hliamtuar an tam tuk caah raltuknak vanlawng tamdeuh in hmanh le mipi deuh i sel in kahdohnak a tuah chin khawh caah a hlankan in ralrin a herh nak kong zong a chimchih.
May 5 chun suimilam 1 Myanmar ram khua caan um tu ning zoh tik ah Bangladesh rili nichuah lei in May 7 ah thli chia aa thok lai i May 8 ah Cyclone thlichia thazaang der deuh mi a hrang kho. Cu thlichia cu May 10 ah Cyclone thli chia thazaang thawng mi ah cang in thli a fak kho. May 9 in 13 kar ah a bik in Rakhine tlangram lei ah ruah le thli he a fak kho mi a si.
Cu thli chia cu rili cung ah suimilam pakhat ah meng 50 in 60 tiang a phan kho. Cu thli chia ruang ruahpi sur a fak lai i ti zong a lian kho. Cu caah rili kam le tiva kam um mi hna nih ti a lianh khawh caah a hlan kan in timhtuahnak ngeih a herh nak kong Myanmar ram khua caan zohnak zung nih May 5 ah ralrin peknak thawng a thanh.